Morbi Road Accident: મોરબી જિલ્લાના પીપળીયા હાઈવે પર લુટાવદર ગામ નજીક એક હૃદયદ્રાવક અને ભયાનક માર્ગ અકસ્માત સર્જાયો છે. રેતી ભરેલા બેકાબૂ ડમ્પરે કારને જોરદાર ટક્કર મારતા 2 શ્રમિકોના ઘટનાસ્થળે જ ઘાતકી મોત નીપજ્યા છે, જ્યારે 6 લોકો ગંભીર રીતે ઈજાગ્રસ્ત થયા હોવાનું જાણવા મળ્યું છે.
બેકાબૂ ડમ્પરે કારને પાછળથી ફટકારી
આ પણ વાંચો
પ્રાપ્ત માહિતી અનુસાર, પીપળીયા હાઈવે પર લુટાવદર નજીક પુરપાટ ઝડપે આવી રહેલા રેતી ભરેલા ડમ્પરે આગળ જઈ રહેલી કારને અડફેટે લીધી હતી. આ ટક્કર એટલી ભયાનક અને પ્રચંડ હતી કે, કાર અને ડમ્પર બંને વાહનોના ફુરચે ફુરચા ઉડી ગયા હતા. અકસ્માત સર્જાતા જ હાઈવે પર ચીસાચીસ અને અફરાતફરીનો માહોલ સર્જાયો હતો.
2ના મોત, 6ની હાલત નાજુક
કારમાં કુલ 8 શ્રમિકો મુસાફરી કરી રહ્યા હતા. ડમ્પરની ટક્કર બાદ શ્રમિકો કારમાં ગંભીર રીતે ફસાઈ ગયા હતા. ઘટનાની જાણ થતાં જ સ્થાનિક લોકો અને પોલીસ કાફલો ઘટનાસ્થળે દોડી આવ્યો હતો. ભારે જહેમત બાદ ફસાયેલા લોકોને બહાર કાઢવામાં આવ્યા હતા. આ ઘટનામાં 2 શ્રમિકોના મોત થયા જ્યારે 6 ગંભીર રીતે ઈજાગ્રસ્ત થયા હોવાનું સામે આવ્યું છે.
ઈજાગ્રસ્તોને રાજકોટ ખસેડાયા
અકસ્માતમાં ગંભીર રીતે ઘવાયેલા તમામ 6 શ્રમિકોની તબિયત વધુ નાજુક જણાતા તેમને પ્રાથમિક સારવાર આપ્યા બાદ તાત્કાલિક રાજકોટની હોસ્પિટલમાં ખસેડવામાં આવ્યા છે. આ ઘટનાને પગલે મૃતકોના પરિવારજનોમાં ભારે શોકનું મોજું ફરી વળ્યું છે. ઘટના અંગે સ્થાનિક પોલીસે અકસ્માતે મોતનો ગુનો નોંધી આગળની બચાવ અને કાનૂની કાર્યવાહી હાથ ધરી છે.