PM Modi Birthday: દેશના વડાપ્રધાન નરેન્દ્ર મોદીના જન્મદિવસની પૂર્વસંધ્યાએ તેમના જન્મસ્થળ વડનગર શહેરમાં ઉત્સવ અને દિવાળી જેવો માહોલ જોવા મળી રહ્યો છે. વડાપ્રધાનના આગમન અને જન્મદિનની ઉજવણીને લઈને સમગ્ર શહેરમાં ભારે થનગનાટ જોવા મળી રહ્યો છે. ઐતિહાસિક વિરાસત ધરાવતું શર્મિષ્ઠા તળાવ અને પવિત્ર હાટકેશ્વર મહાદેવ મંદિર પરિસરને આકર્ષક તથા રંગબેરંગી રોશનીથી શણગારવામાં આવ્યા છે, જેને નિહાળવા માટે સ્થાનિક નાગરિકો મોટી સંખ્યામાં ઉમટી પડ્યા છે.
કેન્દ્રીય ગૃહમંત્રી અમિત શાહ સવારે વડનગરની મુલાકાતે
આવતીકાલે વડાપ્રધાનના જન્મદિન નિમિત્તે યોજાનાર ભવ્ય કાર્યક્રમોને લઈને વહીવટી તંત્ર અને સુરક્ષા એજન્સીઓ દ્વારા તૈયારીઓને આખરી ઓપ આપી દેવામાં આવ્યો છે. આ વિશેષ ઉજવણીમાં સહભાગી થવા માટે કેન્દ્રીય ગૃહમંત્રી અમિત શાહ સવારે 9:30 કલાકે વિશેષરૂપે વડનગર પહોંચશે.
મહાઆરતી અને જળ ગ્રહણ: ગૃહમંત્રી સવારે સૌપ્રથમ શર્મિષ્ઠા તળાવ ખાતે પહોંચશે, જ્યાં તળાવના પવિત્ર ઘાટ પર ભવ્ય મહાઆરતીનું આયોજન કરવામાં આવ્યું છે. આરતી બાદ તેઓ ઉપસ્થિત જનમેદનીને સંબોધિત કરશે અને તળાવના ઘાટ પરથી પવિત્ર જળ કળશમાં ગ્રહણ કરશે.
પદયાત્રા અને હાટકેશ્વર મહાદેવના દર્શન: શર્મિષ્ઠા તળાવથી ગૃહમંત્રી પદયાત્રા કરીને ઐતિહાસિક હાટકેશ્વર મહાદેવ મંદિર પહોંચશે. ત્યાં તેઓ ભગવાન હાટકેશ્વરના ચરણોમાં શીશ ઝુકાવીને પૂજન-અર્ચન કરશે અને દેશની સમૃદ્ધિ માટે પ્રાર્થના કરશે.
વારાણસી માટેની બાઈક રેલીને પ્રસ્થાન અને સ્વચ્છતા અભિયાન
મંદિરે દર્શન કર્યા બાદ ગૃહમંત્રી અમિત શાહ વડનગરથી કાશી (વારાણસી) માટે રવાના થનારી ખાસ બાઈક રેલીને લીલી ઝંડી આપીને પ્રસ્થાન કરાવશે. આ બાઈક રેલી બંને સાંસ્કૃતિક નગરો વચ્ચેના સેતુને વધુ મજબૂત બનાવશે. આ ઉપરાંત, તેઓ વડનગર રેલવે સ્ટેશન ખાતે આયોજિત વિશેષ સ્વચ્છતા અભિયાનમાં સક્રિયપણે જોડાઈને શ્રમદાન પણ કરશે.
આ ભવ્ય કાર્યક્રમમાં મહારાષ્ટ્રના નાયબ મુખ્યમંત્રી એકનાથ શિંદે અને કેન્દ્રીય રાજ્યમંત્રી અનુપ્રિયા પટેલ સહિત અનેક અગ્રણી રાજકીય મહાનુભાવો અને વરિષ્ઠ નેતાઓ વિશેષ ઉપસ્થિત રહેશે. વડનગરના નાગરિકોમાં આ વિશેષ દિવસને લઈને ભારે ઉત્સાહ જોવા મળી રહ્યો છે અને સમગ્ર નગરમાં ઉત્સવ જેવો માહોલ છવાયેલો છે.