Mehsana News: મહેસાણા શહેરમાં દેશભક્તિનો અનેરો માહોલ જોવા મળ્યો હતો. શહેરના પંડિત દીનદયાળ ઉપાધ્યાય ટાઉનહોલ ખાતે સંસ્કાર ભારતી જિલ્લા સમિતિ દ્વારા 'સ્વરાજનો શંખનાદ: વંદે માતરમ્' નાટકનું ભવ્ય મંચન કરવામાં આવ્યું હતું. આ કાર્યક્રમમાં ઉપસ્થિત નગરજનોને રાષ્ટ્રભક્તિના રંગે રંગી દીધા હતા.
વંદે માતરમ્ના 150 વર્ષના ઈતિહાસની ઝલક
સ્વરાજનો શંખનાદ: વંદે માતરમ્ નાટક દ્વારા આઝાદીના સંગ્રામ અને ભારતના રાષ્ટ્રગીત વંદે માતરમના 150 વર્ષના ગૌરવશાળી ઈતિહાસને મંચ પર જીવંત કરવામાં આવ્યો હતો. આ નાટક પાછળનો મુખ્ય હેતુ યુવા પેઢીમાં દેશપ્રેમ અને રાષ્ટ્રભાવનાનું સિંચન કરવાનો હતો.
માત્ર 7 દિવસની મહેનત અને ભવ્ય પ્રસ્તુતિ
આ ઐતિહાસિક નાટકના લેખન અને દિગ્દર્શનની જવાબદારી પ્રોફેસર કમલ જોશીએ સંભાળી હતી. આશ્ચર્યજનક વાત એ છે કે, કલાકારોએ આ નાટકને માત્ર સાત દિવસની સઘન મહેનત બાદ મંચ પર સફળતાપૂર્વક પ્રસ્તુત કર્યું હતું, જેને મહેસાણાના શહેરીજનોએ ઉમળકાભેર વધાવી લીધું હતું.
સેલિબ્રિટીઝ અને સન્માનિત મહાનુભાવો
આ કાર્યક્રમમાં મનોરંજન જગતની અનેક નામાંકિત હસ્તીઓએ હાજરી આપી કલાકારોનો ઉત્સાહ વધાર્યો હતો, જેમાં મુખ્યત્વે 'મહાભારત' સિરિયલમાં શ્રીકૃષ્ણની ભૂમિકા ભજવનાર જાણીતા અભિનેતા નીતિશ ભારદ્વાજ અને 'તારક મહેતા કા ઉલ્ટા ચશ્મા'ના લોકપ્રિય પાત્ર પત્રકાર પોપટલાલ ભજવનાર શ્યામ પાઠક ઉપસ્થિત રહ્યા હતા.
આ ઉપરાંત તારક મહેતા ટીમના અય્યર અને ઈન્સ્પેક્ટર ચાલુ પાંડે પણ આ કાર્યક્રમમાં સહભાગી થયા હતા. જાણીતા હાસ્ય કલાકાર પદ્મશ્રી શાહબુદ્દીન રાઠોડ તથા પદ્મશ્રી હાજીભાઈ રમકડું વિશેષરૂપે ઉપસ્થિત રહ્યા હતા.
પ્રેક્ષકોએ ઉત્કૃષ્ટ આયોજનની પ્રશંસા કરી
આ કાર્યક્રમના સમાપન સમયે ઉપસ્થિત તમામ અતિથિઓ અને નાગરિકોએ સંસ્કાર ભારતી મહેસાણાની ટીમ અને કલાકારોના અથાક પરિશ્રમ અને ઉત્કૃષ્ટ આયોજનની મુક્ત મને પ્રશંસા કરી હતી. આ નાટકે મહેસાણાના સાંસ્કૃતિક આકાશમાં દેશભક્તિનો નવો સિતારો ટાંક્યો છે.