Mahisagar News:મહીસાગર જિલ્લામાં ગુલિયન-બારે સિન્ડ્રોમ (GBS)ના શંકાસ્પદ કેસો સામે આવતા જિલ્લા વહીવટી તંત્ર અને આરોગ્ય વિભાગ દ્વારા સઘન પગલાં લેવામાં આવી રહ્યા છે. આ પરિસ્થિતિને ધ્યાનમાં રાખીને જિલ્લા કલેક્ટર અર્પિત સાગરે લુણાવાડાના જય શ્રી નગર અને ગણેશ સોસાયટીની પ્રત્યક્ષ મુલાકાત લઈને આરોગ્ય વિભાગ દ્વારા ચાલી રહેલી ડોર-ટુ-ડોર સર્વેની કામગીરીનું નિરીક્ષણ કરી સ્થિતિની ગંભીરતાથી સમીક્ષા કરી હતી.
કલેક્ટર સાગરે લુણાવાડા જનરલ હોસ્પિટલની પણ મુલાકાત લઈને ત્યાં ચાલી રહેલી સારવાર અને વ્યવસ્થાઓનો તાગ મેળવ્યો હતો તેમજ સંબંધિત અધિકારીઓને જરૂરી માર્ગદર્શક સૂચનો આપ્યા હતા. તેમણે મીડિયાને માહિતી આપતા જણાવ્યું હતું કે હાલ લુણાવાડા વિસ્તારમાં આરોગ્ય વિભાગની કુલ 21 ટીમો સંપૂર્ણપણે કાર્યરત છે. આ ટીમો દ્વારા જય શ્રી નગર સોસાયટીમાં 59 ઘર અને ગણેશ સોસાયટીમાં 61 ઘરનો સર્વે સફળતાપૂર્વક પૂર્ણ કરવામાં આવ્યો છે.
મેડિકલ ઓફિસર અને ફીમેલ હેલ્થ વર્કર સહિતની વિશેષ ટીમો ઘરે-ઘરે ફરીને નાગરિકો અને ખાસ કરીને બાળકોના સ્વાસ્થ્યની કાળજીપૂર્વક તપાસ કરી રહી છે. જો કોઈ પણ વ્યક્તિમાં આ બીમારીના શંકાસ્પદ લક્ષણો જોવા મળે, તો તેમને તાત્કાલિક ધોરણે હોસ્પિટલ ખાતે ખસેડવાની સુચારુ વ્યવસ્થા ગોઠવવામાં આવી છે. તાજેતરમાં, આરોગ્ય ટીમ દ્વારા કુમાર છાત્રાલયની મુલાકાત લેવામાં આવી હતી, જ્યાં ઝાડા-ઉલટીની તકલીફ અનુભવતા 6 બાળકોને સારવાર અર્થે જનરલ હોસ્પિટલ ખસેડવામાં આવ્યા હતા. રાહતની વાત એ છે કે આ 6 બાળકોમાંથી 4 બાળકો સંપૂર્ણ સ્વસ્થ થઈ જતાં તેમને હોસ્પિટલમાંથી રજા આપવામાં આવી છે, જ્યારે બાકી રહેલા 2 બાળકોની તબિયત પણ હાલ સ્થિર છે અને તેમને પણ ટૂંક સમયમાં રજા આપવામાં આવશે.
સંભવિત જોખમોને ટાળવા અને વ્યાપક તકેદારીના ભાગરૂપે જિલ્લાની શાળાઓ, કેન્ટીન, આંગણવાડીઓ તેમજ મધ્યાહ્ન ભોજન (MDM) કેન્દ્રો પર ફૂડ સેફ્ટીની સઘન ચકાસણી હાથ ધરવામાં આવશે. આ તપાસ દરમિયાન જ્યાં પણ સ્વચ્છતા અને ફૂડ સેફ્ટીના નિયમોનું ઉલ્લંઘન જણાશે, ત્યાં કડક કાર્યવાહી કરવાની સાથે જવાબદારોને નોટિસ ફટકારવાના સ્પષ્ટ નિર્દેશો પણ આપવામાં આવ્યા છે.
આ ઉચ્ચસ્તરીય મુલાકાત અને નિરીક્ષણ દરમિયાન આરોગ્ય અધિકારી સી.આર. પટેલિયા, લુણાવાડા પ્રાંત અધિકારી ઉમેશ શાહ, નગરપાલિકાના ચીફ ઓફિસર સહિત આરોગ્ય વિભાગની સમગ્ર ટીમ ઉપસ્થિત રહી હતી અને પરિસ્થિતિને પહોંચી વળવા માટે જરૂરી સંકલન જાળવ્યું હતું. જિલ્લા તંત્ર દ્વારા નાગરિકોને પણ અફવાઓથી દૂર રહીને સાવચેતી રાખવા અને આરોગ્ય વિભાગને સહકાર આપવા અપીલ કરવામાં આવી છે.