Junagadh: પરંપરાગત મહાશિવરાત્રી મેળાને ચાલુ વર્ષે 'મિની કુંભ' તરીકે ઉજવવામાં આવી રહ્યો છે. કલેક્ટર અનિલકુમાર રાણાવસિયા અને કમિશનર તેજસ પરમારના સીધા માર્ગદર્શન હેઠળ જૂનાગઢ મહાનગરપાલિકા દ્વારા મેળામાં આવતા લાખો શ્રદ્ધાળુઓની સુવિધા માટે આરોગ્ય, સફાઈ અને પીવાના પાણીનું વ્યાપક આયોજન કરવામાં આવ્યું છે.
ભવનાથ ક્ષેત્ર અને શહેરમાં વિવિધ સ્થળોએ આરોગ્ય સેવાઓ પૂરી પાડવા માટે 30 થી વધુ મેડિકલ અને પેરામેડિકલ સ્ટાફ તૈનાત કરવામાં આવ્યો છે. ભારતી આશ્રમ પાસેની નાકોડા ભૈરવ હોસ્પિટલ 24 કલાક કાર્યરત છે, જ્યાં ઓક્સિજનની સુવિધા સાથે આ વર્ષે વેન્ટિલેટરની વિશેષ વ્યવસ્થા કરવામાં આવી છે.
વન વિસ્તાર હોવાથી સર્પદંશ (Snake bite) માટેના જરૂરી ઇન્જેક્શન પણ ઉપલબ્ધ રખાયા છે. અત્યાર સુધીમાં 5,711 જેટલા લોકોએ આરોગ્ય સેવાનો લાભ લીધો છે.
મેળામાં 10 જેટલી 108 એમ્બ્યુલન્સ ઉપરાંત, ટ્રાફિક વાળા વિસ્તારોમાંથી દર્દીઓને ઝડપથી બહાર કાઢવા માટે બે મોબાઈલ બુલેટ એમ્બ્યુલન્સની વ્યવસ્થા કરાઈ છે. ઉતારા મંડળોના સ્વયંસેવકોને હેલ્થ કીટ આપી તેમને સીપીઆર (CPR) ની તાલીમ પણ આપવામાં આવી છે. અત્યાર સુધીમાં બે ગંભીર કેસોને વધુ સારવાર માટે GMERS (GMERS) સિવિલ હોસ્પિટલમાં રીફર કરવામાં આવ્યા છે.
સ્વચ્છતા જાળવવા માટે 11 સેનેટરી ઇન્સ્પેક્ટર અને 210 સફાઈ કામદારો કાર્યરત છે. અન્નક્ષેત્રો અને આશ્રમોમાંથી કચરો એકત્ર કરવા 15 પીકઅપ વાહન, 6 ડમ્પર, ટ્રેક્ટર અને જેસીબી જેવા સાધનો દ્વારા દિવસમાં બે વાર કચરો ડમ્પિંગ સાઈડ પર પહોંચાડવામાં આવે છે.
રવેડીના રૂટને 8 ઝોનમાં વહેંચીને સફાઈ અને માર્ગો ધોવાની કામગીરી હાથ ધરાઈ છે. શ્રદ્ધાળુઓ માટે 25 પાર્કિંગ સ્થળો પર શૌચાલયની વ્યવસ્થા કરવામાં આવી છે. ભવનાથ વિસ્તારમાં 11 કાયમી શૌચાલયો ઉપરાંત મોબાઈલ ટોયલેટ પણ મૂકવામાં આવ્યા છે, જેની 24 કલાક સફાઈ કરવામાં આવે છે.
પાણી વિતરણની વ્યવસ્થામાં 100 થી વધુ કર્મચારીઓ જોડાયેલા છે. તમામ પાર્કિંગ સ્થળો પર 2000 લિટરની ટાંકીઓ મુકાઈ છે. વાહનો પ્રતિબંધિત હોય તેવા રૂટ પર 15થી વધુ જગ્યાએ પીવાના પાણીના જગ અને શ્રદ્ધાળુઓના આરામ માટે બેઠક વ્યવસ્થા કરવામાં આવી છે.
ભવનાથ વોટર ટ્રીટમેન્ટ પ્લાન્ટ ખાતે નવો આરઓ (RO) પ્લાન્ટ ઉભો કરી ત્યાંથી પાણીનું વિતરણ કરવામાં આવે છે. ભવનાથ વિસ્તારમાં 5000 લિટરની 95 થી વધુ ટાંકીઓ ઇન્સ્ટોલ કરવામાં આવી છે. શહેરના 132 અને વન વિભાગના 85 ઉતારાઓમાં પાઈપલાઈન દ્વારા પાણી પૂરું પાડવામાં આવે છે.
લોકોની તંદુરસ્તી જાળવવા માટે અત્યાર સુધીમાં 200 જેટલા પાણીના નમૂનાઓ લેવામાં આવ્યા છે અને 100 ટકા ક્લોરીનયુક્ત શુદ્ધ પાણી પૂરું પાડવામાં આવી રહ્યું છે. આમ જૂનાગઢ મહાનગરપાલિકા દ્વારા 24 કલાક સતત મોનિટરિંગ કરી શ્રદ્ધાળુઓ માટે તમામ પાયાની સુવિધાઓ સુનિશ્ચિત કરવામાં આવી છે.