PM Modi Jamnagar Gujarat visit: પ્રધાનમંત્રી નરેન્દ્ર મોદીએ આજે જામનગરના પ્રવાસે હતા, જ્યાં તેમણે એક ભવ્ય જાહેર સભાને સંબોધતા ગુજરાતની વિકાસયાત્રા અને ભાજપ પ્રત્યે જનતાના અતૂટ વિશ્વાસની પ્રશંસા કરી હતી. પીએમ મોદીએ ગુજરાતના ઔદ્યોગિક પરિવર્તનનો ઉલ્લેખ કરતા જણાવ્યું હતું કે, જે રાજ્ય ક્યારેક માત્ર મીઠાના ઉત્પાદન માટે જાણીતું હતું, તે આજે આધુનિક ટેકનોલોજી અને ઉત્પાદન ક્ષેત્રે વિશ્વના નકશા પર ચમકી રહ્યું છે.
હાલારના આંગણે લોકપ્રિય પ્રધાનસેવકનું ભવ્ય અભિવાદન...
— BJP Gujarat (@BJP4Gujarat) May 10, 2026
પશ્ચિમ બંગાળ, આસામ અને પુડુચેરીમાં લોકશાહીના મહાપર્વમાં ભવ્ય વિજય પ્રાપ્ત કર્યા બાદ, છોટી કાશી જામનગરના આંગણે પધારેલા માનનીય પ્રધાનમંત્રી શ્રી @narendramodi જીનું જામનગરવાસીઓ દ્વારા અદકેરું સ્વાગત કરવામાં આવ્યું. pic.twitter.com/K6DXmwxtDO
મીઠાથી વિમાન સુધી સફર વિશે શું કહ્યું?
આ પણ વાંચો
પીએમ મોદીએ ગુજરાતના વિકાસ મોડેલને રેખાંકિત કરતા કહ્યું કે, ગુજરાતે છેલ્લા બે દાયકામાં પાયાના સ્તરેથી પરિવર્તન જોયું છે. એક સમયે ગુજરાત માત્ર દરિયાકાંઠાના મીઠા માટે ઓળખાતું હતું, પરંતુ આજે પરિસ્થિતિ બદલાઈ છે. ગુજરાતે સેમિકન્ડક્ટર ચિપ્સના ઉત્પાદનમાં દેશમાં અગ્રણી સ્થાન મેળવ્યું છે. આ સાથે જ મેટ્રો કોચ અને રેલ્વે લોકોમોટિવનું ઉત્પાદન પણ રાજ્યમાં વેગ પકડી રહ્યું છે. તેમજ પ્રધાનમંત્રીએ જાહેરાત કરી હતી કે ગુજરાત હવે વિમાન ઉત્પાદનના ક્ષેત્રમાં પણ મોટી છલાંગ લગાવવા માટે તૈયાર છે, જે આવનારા સમયમાં રોજગારીની નવી તકો ઉભી કરશે.
પર્યાવરણ અને ક્લાયમેટ ચેન્જમાં અગ્રેસર
પર્યાવરણના મુદ્દે ગુજરાતની દીર્ઘદ્રષ્ટિની પ્રશંસા કરતા પીએમએ જણાવ્યું હતું કે, જ્યારે વિશ્વ આજે ક્લાયમેટ ચેન્જ પર ચર્ચા કરી રહ્યું છે, ત્યારે ગુજરાતે વર્ષો પહેલા જ અલગ 'ક્લાયમેટ વિભાગ'ની સ્થાપના કરી હતી. આવું કરનાર ગુજરાત દેશનું પ્રથમ રાજ્ય છે. પર્યાવરણીય સંરક્ષણ સાથે વિકાસ કેવી રીતે કરી શકાય, તે ગુજરાતે વિશ્વને શીખવ્યું છે.
ચાર પેઢીનો અતૂટ વિશ્વાસ: ભાજપ પર જનસમર્થન
સભાને સંબોધતા વડાપ્રધાને ગુજરાતના લોકોના પ્રેમ અને આશીર્વાદનો ખાસ ઉલ્લેખ કર્યો હતો. તેમણે ભાવુક સ્વરે કહ્યું કે, "વર્તમાન રાજકીય યુગમાં કોઈ એક પક્ષ પર આટલા લાંબા સમય સુધી લોકોનો વિશ્વાસ ટકી રહેવો અને સમય જતાં તે વધવો, એ રાજકીય વિશ્લેષકો માટે અભ્યાસનો વિષય છે." તેમણે ઉમેર્યું કે ગુજરાતમાં ભાજપ પાસે ત્રણથી ચાર પેઢીઓનું સમર્થન છે. જે દાદા-પડદાદાએ આશીર્વાદ આપ્યા હતા, તે જ પરંપરા આજે યુવા પેઢી પણ જાળવી રહી છે. આ વિશ્વાસ વિકાસની રાજનીતિ અને જન કલ્યાણના કાર્યોને કારણે ઊભો થયો છે.
બંગાળ ચૂંટણી અને લોકોની સંવેદના વિશે શું કહ્યું?
પીએમ મોદીએ પોતાના ભાષણમાં પશ્ચિમ બંગાળના ચૂંટણી પરિણામોનો પણ ઉલ્લેખ કર્યો હતો. તેમણે કહ્યું કે ગુજરાતના લોકો પણ બંગાળની સ્થિતિને લઈને ચિંતિત છે અને બંગાળના દુઃખમાં સહભાગી છે. તેમણે અનુભવ વર્ણવતા કહ્યું કે, "ચૂંટણી પરિણામો પછી બંગાળની જનતામાં જે આનંદ જોવા મળ્યો, તે અદભૂત હતો. એવું લાગતું હતું કે જાણે કોઈ મોટા બંધનમાંથી મુક્તિ મળી હોય. લોકોની આંખોમાં ખુશીના આંસુ એ વાતનો પુરાવો છે કે પરિવર્તન કેટલું ઊંડું છે." પીએમએ સ્વીકાર્યું કે તેમની લાંબી રાજકીય કારકિર્દીમાં તેમણે આ પહેલીવાર અનુભવ્યું છે કે કોઈ ચૂંટણી પરિણામનો પ્રભાવ જનમાનસ પર આટલો પ્રબળ હોય.
જામનગરની આ સભા દ્વારા પીએમ મોદીએ ફરી એકવાર ગુજરાતના સામર્થ્ય અને ભાજપની મજબૂત પકડનો સંદેશ આપ્યો છે. વિકાસના વિઝન સાથે ભાવનાત્મક જોડાણને જોડીને તેમણે જામનગરની જનતાનો આભાર માન્યો હતો અને ખાતરી આપી હતી કે ગુજરાતની આ વિકાસયાત્રા અવિરત ચાલુ રહેશે.