80 Hippos Vantara Offer: માનવતા અને પ્રાણી સંરક્ષણ ક્ષેત્રે એક ઐતિહાસિક પહેલ કરતા, રિલાયન્સ ઇન્ડસ્ટ્રીઝના એક્ઝિક્યુટિવ ડાયરેક્ટર અને 'વનતારા'ના સ્થાપક અનંત મુકેશ અંબાણીએ કોલંબિયા સરકારને એક મહત્વપૂર્ણ અપીલ કરી છે. કોલંબિયાની મેગડાલેના નદીના પટમાં રહેતા 80 હિપ્પોપોટેમસને મારવાના આદેશ સામે તેમણે વાંધો ઉઠાવી, આ પ્રાણીઓને સુરક્ષિત રીતે ભારત લાવી જામનગરના વનતારામાં આજીવન આશ્રય આપવાનો પ્રસ્તાવ મૂક્યો છે.
શા માટે લેવાયો હતો મારવાનો નિર્ણય?
કોલંબિયામાં હિપ્પોપોટેમસની સમસ્યા 1980ના દાયકાથી શરૂ થઈ હતી. મૂળ આફ્રિકાના આ પ્રાણીઓ ત્યાં લાવવામાં આવ્યા બાદ, કુદરતી શિકારીઓના અભાવે તેમની સંખ્યા ઝડપથી વધીને 200 સુધી પહોંચી ગઈ છે. આ જંગી સંખ્યાને કારણે સ્થાનિક ઇકોસિસ્ટમને નુકસાન અને નાગરિકોની સુરક્ષા પર જોખમ ઊભું થતા, કોલંબિયન સત્તાવાળાઓએ 80 હિપ્પોને મારી નાખવાનો નિર્ણય કર્યો હતો.
અનંત અંબાણીનો માનવીય પ્રસ્તાવ
આ સમાચાર સામે આવ્યા બાદ, તાજેતરમાં જ પ્રાણી કલ્યાણ માટે 'ગ્લોબલ હ્યુમેન એવોર્ડ' મેળવનાર અનંત અંબાણીએ કોલંબિયાના પર્યાવરણ મંત્રી ઇરેન વેલેઝ ટોરેસને પત્ર લખીને આ નિર્ણય પર પુનર્વિચાર કરવા વિનંતી કરી છે.
તેમણે પત્રમાં જણાવ્યું હતું કે, "આ 80 હિપ્પોએ પોતાનું જન્મસ્થળ જાતે પસંદ કર્યું નથી, અને અત્યારે જે અસ્થિર પરિસ્થિતિ સર્જાઈ છે તેના માટે તેઓ જવાબદાર નથી. જો આપણી પાસે વૈજ્ઞાનિક પદ્ધતિથી તેમને બચાવવાની ક્ષમતા હોય, તો તેમને મારવાને બદલે સુરક્ષિત સ્થળાંતર કરવું એ આપણી નૈતિક જવાબદારી છે."
વનતારાની સજ્જતા અને ઓફર
વનતારાએ માત્ર આશ્રયની જ નહીં, પરંતુ સમગ્ર પ્રક્રિયા માટે જરૂરી તમામ સંસાધનો પૂરા પાડવાની તૈયારી દર્શાવી છે. આ પ્રસ્તાવમાં નીચેની બાબતો સામેલ છે:
વૈજ્ઞાનિક સ્થળાંતર: અનુભવી વેટરનરી ડોક્ટર્સની ટીમ અને પ્રાણીઓને પકડવા માટેની નિષ્ણાત ટુકડી.
સંપૂર્ણ નાણાકીય સહાય: કોલંબિયાથી ભારત સુધીના પરિવહન અને લોજિસ્ટિક્સનો તમામ ખર્ચ વનતારા ભોગવશે.
કુદરતી આવાસ: જામનગરમાં હિપ્પો માટે કોલંબિયા જેવું જ જળચર અને કુદરતી વાતાવરણ તૈયાર કરવામાં આવશે.
આજીવન સંભાળ: તમામ 80 હિપ્પોના ખોરાક અને તબીબી સારવારની કાયમી જવાબદારી.
પર્યાવરણ અને સુરક્ષા વચ્ચે સંતુલન
અનંત અંબાણીએ ભારપૂર્વક જણાવ્યું છે કે કરુણા અને જાહેર સુરક્ષા વિરોધી નથી. યોગ્ય આયોજન દ્વારા નદી કિનારે રહેતા સમુદાયોનું રક્ષણ પણ કરી શકાય છે અને પ્રાણીઓનો જીવ પણ બચાવી શકાય છે. તેમણે વિનંતી કરી છે કે જ્યાં સુધી વનતારાની આ વૈકલ્પિક દરખાસ્તનું યોગ્ય મૂલ્યાંકન ન થાય, ત્યાં સુધી હિપ્પોને મારવાની પ્રક્રિયા સ્થગિત રાખવામાં આવે.
વૈશ્વિક પ્રભાવ અને ભારતની ભૂમિકા
આ પગલું પ્રાણી કલ્યાણ પ્રત્યે ભારતની વધતી જતી વૈશ્વિક ભૂમિકાને ઉજાગર કરે છે. આ પ્રોજેક્ટના અમલીકરણ માટે ભારત અને કોલંબિયા બંને દેશોની સરકારો તેમજ આંતરરાષ્ટ્રીય વન્યજીવ સત્તામંડળોની મંજૂરી મેળવવાની પ્રક્રિયા વનતારા દ્વારા હાથ ધરવામાં આવશે.
વનતારા વિશે
ગુજરાતના જામનગરમાં સ્થિત વનતારા વિશ્વનું સૌથી મોટું વન્યજીવ બચાવ અને પુનર્વસન કેન્દ્ર છે, જે અત્યાધુનિક હોસ્પિટલ અને હજારો પ્રાણીઓ માટે કુદરતી આવાસ ધરાવે છે. આ પ્રસ્તાવ ફરી એકવાર સાબિત કરે છે કે વનતારા માટે 'દરેક જીવ મહત્વનો છે'.