Elephant Madhuri In Vantara: જામનગરના વનતારા(Vantara)ખાતે આશરે એક વર્ષથી પણ વધુ સમયથી સારવાર લઈ રહેલી મહારાષ્ટ્રના કોલ્હાપુરની મહાદેવી નામથી જાણીતી 'હાથણી માધુરી' હવે તેના ઘરે પરત ફરશે. હવે તેની સારવાર તથા પુનર્વસનની તમામ પ્રક્રિયા પૂરી થઈ ગઈ છે અને હવે તે કોલ્હાપુર સ્થિત નંદાની મઠ ખાતે પરત ફરવા તૈયાર છે.
માધુરીની વાપસીનું આ પગલું સુપ્રીમ કોર્ટ દ્વારા નિમણૂંક કરવામાં આવેલ હાઇ પાવર્ડ કમિટી (HPC) દ્વારા કરવામાં આવેલા મૂલ્યાંકન બાદ લેવામાં આવ્યું છે.આ સમિતિએ માધુરીના સુધરેલા સ્વાસ્થ્યની સમીક્ષા કરી હતી. આ મૂલ્યાંકન બાદ ગુજરાતથી મહારાષ્ટ્ર સુધી તેના સ્થળાંતર માટે જરૂરી મંજૂરી અને ટ્રાન્ઝિટ પરમિટ આપવામાં આવ્યા હતા.
જામનગર સ્થિત વન્યજીવ પુનર્વસન અને સંરક્ષણ કેન્દ્ર વનતારા ખાતે વિશેષ તબીબી સારવાર માટે લાવવામાં આવેલી માધુરી હાથીએ એક વર્ષથી વધુ સમયની સારવાર અને પુનર્વસન પ્રક્રિયા પૂર્ણ કરી છે અને હવે તે મહારાષ્ટ્રના કોલ્હાપુર સ્થિત નંદાની મઠ ખાતે પરત ફરવા માટે તૈયાર છે.
ગંભીર સમસ્યાથી પીડાતી માધુરી હાથણી
એક વર્ષથી વધુ સમય અગાઉ જ્યારે માધુરીને વનતારા ખાતે લાવવામાં આવી ત્યારે તે અદ્યતન આર્થરાઇટિસ, લાંબા સમયથી ચાલતી પગની બીમારી અને હલનચલનની ગંભીર સમસ્યાથી પીડાતી હતી.વર્ષો સુધી મર્યાદિત હલનચલન અને સખત કૉન્ક્રિટની સપાટી પર રહેવાને લીધે તેને આ પ્રકારની મુશ્કેલી ભરેલી સ્થિતિનો સામનો કરવો પડ્યો છે. લાંબા સમય સુધી સાંકળોથી બાંધેલી રાખવામાં આવવાથી તેની કુદરતી હલનચલન વધુ મર્યાદિત થઈ હતી અને સાંધાની જકડાશ તથા હલનચલનની સમસ્યાઓ વધુ ગંભીર બની હતી.
તેની આ પ્રકારની નાજુક સ્થિતિ હોવા છતાં તહેવારો અને જાહેર સરઘસોમાં તેની પાસે કામ કરાવવામાં આવતું હતું, જેમાં દોરડાથી બાંધેલી સ્થિતિમાં ગરમ ડામરના રસ્તાઓ પર લાંબા અંતર સુધી તેને ચાલવું પડતું હતું.
માધુરીને 30 જુલાઈ 2025ના રોજ વનતારા લાવવામાં આવેલી
માધુરીને 30 જુલાઈ 2025ના રોજ HPCના આદેશ હેઠળ જામનગર ખાતેના વનતારા ખાતે લાવવામાં આવી હતી. વનતારાનું કહેવું હતું કે તેમના દ્વારા માધુરીની કોઈ કસ્ટડી માંગવામાં આવી ન હતી પણ સમિતિના આદેશનું પાલન કરીને અહીં જામનગર સ્થિત વનતારા ખાતે રાખવામાં આવેલી અને તેની પૂરી સારવાર-દેખરેખ કરવામાં આવી હતી. આ નિર્દેશોને બોમ્બે હાઈકોર્ટ અને સુપ્રીમ કોર્ટ દ્વારા પણ યથાવત રાખવામાં આવ્યો હતો.
વનતારા ખાતે અનંત અંબાણીના માર્ગદર્શન હેઠળ માધુરીને નિષ્ણાતોની ટીમ દ્વારા વ્યાપક અને વિશેષ તબીબી સારવાર આપવામાં આવી હતી જેમાં તેના શારીરિક સ્વાસ્થ્ય, હલનચલન અને ભાવનાત્મક સુખાકારીને પુનઃસ્થાપિત કરવા પર ધ્યાન કેન્દ્રિત કરવામાં આવ્યું હતું.
વનતારા ખાતે છેલ્લા એક વર્ષ દરમિયાન માધુરીએ પશુચિકિત્સકો, સંભાળ રાખનારાઓ, પોષણ નિષ્ણાતો અને વર્તણૂક નિષ્ણાતોની બહુમુખી ટીમના માર્ગદર્શન હેઠળ સઘન પુનર્વસન કાર્યક્રમમાં ભાગ લીધો હતો. તેની સારવારમાં હાઇડ્રોથેરાપી, લેસર થેરાપી, લક્ષિત પોષણ, વિશેષ પગની સંભાળ અને સતત દેખરેખનો સમાવેશ થતો હતો. આ તમામ પ્રયાસોનો હેતુ તેની હલનચલન ક્ષમતા સુધારવા, લાંબા સમયથી ચાલતી તબીબી સમસ્યાઓનું સંચાલન કરવા અને તેના સમગ્ર સ્વાસ્થ્યને પુનઃસ્થાપિત કરવાનો હતો.
હાથી એમ્બ્યુલન્સમાં પોતાની યાત્રા શરૂ કરશે
માધુરી વનતારાથી વિશેષ રીતે તૈયાર કરવામાં આવેલી હાથી એમ્બ્યુલન્સમાં પોતાની યાત્રા શરૂ કરશે. સમગ્ર યાત્રા દરમિયાન તેની સુવિધા, સુરક્ષા અને સતત તબીબી દેખરેખ સુનિશ્ચિત કરવા માટે વાંતારાની પશુચિકિત્સક અને સંભાળ ટીમના સભ્યો તેની સાથે રહેશે.