SAUNI Yojana: સૌરાષ્ટ્રના દેવભૂમિ દ્વારકા અને જામનગર જિલ્લાના નાગરિકો તેમજ ખેડૂતો માટે રાજ્ય સરકારે મહત્વનો પ્રજાલક્ષી નિર્ણય લીધો છે. વર્તમાન ચોમાસા દરમિયાન નર્મદા બેસિનમાં ઓછો વરસાદ હોવા છતાં, સ્થાનિક જરૂરિયાતોને ધ્યાનમાં રાખીને મુખ્યમંત્રી ભૂપેન્દ્ર પટેલે 'સૌની યોજના' (SAUNI Yojana) મારફતે મચ્છુ-2 જળાશયમાંથી પાણી આપવાની ખાસ મંજૂરી આપી દીધી છે.
ઓછા વરસાદ વચ્ચે રાજ્ય સરકારનો રાહતરૂપ નિર્ણય
સામાન્ય રીતે દ્વારકા અને જામનગર જિલ્લામાં પીવાનું અને સિંચાઈનું પાણી સ્થાનિક જળાશયોમાંથી પૂરું પાડવામાં આવતું હોય છે. પરંતુ ચાલુ વર્ષે નર્મદા બેસિન સહિત સંબંધિત વિસ્તારોમાં ઓછો વરસાદ નોંધાતાં જળાશયોમાં પાણીનો સંગ્રહ સામાન્ય કરતાં ઓછો રહ્યો છે. સ્થાનિક સ્તરે પાણીની અછત સર્જાય નહીં તે હેતુથી મુખ્યમંત્રીના નેતૃત્વ હેઠળ જળસંપત્તિ વિભાગે ત્વરિત કાર્યવાહી હાથ ધરી છે.
સૌની લીન્ક-1 મારફતે 600 ક્યુસેક પાણી છોડાશે
રાજ્યના જળસંપત્તિ અને પાણી પુરવઠા વિભાગના જણાવ્યા અનુસાર, મચ્છુ-2 જળાશયમાંથી સૌની લીન્ક-1 (SAUNI Link-1)ની પાઇપલાઇન મારફતે 600 ક્યુસેક પાણી ઉપાડવાની કામગીરી શરૂ કરી દેવામાં આવી છે. આ પાણી પાઇપલાઇન નેટવર્ક દ્વારા બંને જિલ્લાના નિર્ધારિત વિસ્તારો સુધી પહોંચાડવામાં આવશે.
સૌપ્રથમ પીવાના પાણીને પ્રાધાન્ય, ત્યારબાદ સિંચાઈ
રાજ્ય સરકારે પાણીના વપરાશ માટે સ્પષ્ટ પ્રાથમિકતા નક્કી કરી છે. ઉપાડવામાં આવેલા પાણીમાંથી સૌપ્રથમ સ્થાનિક નાગરિકો માટે પીવાના પાણીની જરૂરિયાત પૂરી કરવામાં આવશે. પીવાના પાણીની જરૂરિયાત સંતોષાયા બાદ બાકી રહેતું પાણી ખેડૂતોને પાક બચાવવા અને સિંચાઈ માટે પૂરું પાડવામાં આવશે.
નાગરિકો અને ખેડૂતોને મળશે મોટી રાહત
રાજ્ય સરકારના આ નિર્ણયથી દેવભૂમિ દ્વારકા અને જામનગરના ગ્રામીણ તથા શહેરી વિસ્તારોમાં પીવાના પાણીની સમસ્યા હળવી થશે. આ સાથે જ ચોમાસું પાક માટે પાણીની રાહ જોઈ રહેલા સ્થાનિક ખેડૂતોને સિંચાઈ માટે મોટો આધાર મળી રહેશે.