Gandhinagar Cultural Forum Garba: ગાંધીનગર કલ્ચરલ ફોરમના ગરબા ગ્રાઉન્ડ ખાતે નવરાત્રી દરમિયાન દુર્ગાષ્ટમીના પાવન અવસરે હજારો દીવડાઓના ઝગમગાટ વચ્ચે વિદ્યા અને કળાના દેવી મા સરસ્વતીનું દિવ્ય સ્વરૂપ સાકાર થયું હતું. આ ભવ્ય આયોજનમાં મેદનીની સુનિયોજિત ગોઠવણી દ્વારા 5100 થી વધુ પ્રજ્વલિત દીવાના પ્રકાશથી વીણાવાદિની મા સરસ્વતીની અદ્ભુત આકૃતિ પ્રગટ કરવામાં આવી હતી.
ગાંધીનગર કલ્ચરલ ફોરમ છેલ્લા 32 વર્ષથી શુદ્ધ પરંપરાગત રાસ-ગરબા અને અષ્ટમીની આવી દિવ્ય સમૂહ મહાઆરતીના ભવ્ય આયોજન માટે જાણીતું છે. સંસ્થાની ત્રણ દાયકા જૂની આ પરંપરા અનુસાર યોજાયેલ ભવ્ય મહાઆરતીમાં હજારો ખેલૈયાઓ અને ઉપસ્થિત શ્રદ્ધાળુઓએ હાથમાં પ્રજ્વલિત દીવડાઓ ધારણ કરીને એકસાથે મા જગદંબાની આરતી ઉતારીને સમગ્ર વાતાવરણને ભક્તિમય બનાવી દીધું હતું.
આ પણ વાંચો
જ્ઞાન, કળા, સંગીત અને સાહિત્યની અધિષ્ઠાત્રી દેવી મા સરસ્વતીનું દિવ્ય સ્વરૂપ પ્રગટાવીને ખેલૈયાઓએ મા જગદંબાની ભાવપૂર્વક આરાધના કરી હતી. કલ્ચરલના ગરબાની વિશેષતા સમાન આ મહાઆરતીમાં હજારો દીવડાઓના સુમેળભર્યા પ્રકાશથી જ્યારે વીણાવાદિનીનું સ્વરૂપ પ્રગટ થયું, ત્યારે સમગ્ર ગરબા મેદાન ભક્તિ, શ્રદ્ધા અને આધ્યાત્મિક ચેતનાથી ઝંકૃત થઈ ઊઠ્યું હતું.
આ અદ્ભુત અને અલૌકિક દ્રશ્ય નિહાળીને ગરબા ગ્રાઉન્ડમાં ઉપસ્થિત હજારો લોકોએ સામૂહિક રીતે ‘અહો!’ના ઉદગાર સાથે આ દિવ્ય અનુભૂતિને વધાવી લીધી હતી. હાથમાં વીણા ધારણ કરનાર મા સરસ્વતીના સ્વરૂપમાં જ્ઞાનનો પ્રકાશ, સર્જનાત્મકતાની ચેતના અને સૂર-તાલનો સમન્વય પ્રતિબિંબિત થતો હતો. સાક્ષાત્ વીણાવાદિની મા સરસ્વતીનું ગરબા આંગણે પ્રાગટ્ય થયું હોય તેવી ભાવવિભોર અનુભૂતિએ ઉપસ્થિત સૌ કોઈને મંત્રમુગ્ધ કર્યા હતા.