Gandhinagar girl rape case: ગાંધીનગરના સેક્ટર-24 સ્થિત ઈન્દિરાનગર છાપરા વિસ્તારમાં એક 4 વર્ષની બાળકી સાથે થયેલા દુષ્કર્મ કેસમાં કોર્ટે દાખલારૂપ ચુકાદો સંભળાવ્યો છે. કોર્ટે માત્ર સાડા પાંચ મહિનાના ટૂંકા ગાળામાં જ આ જઘન્ય અપરાધના આરોપી રામનીત દેવનંદન રામરૂપ યાદવને દોષિત ઠેરવીને આજીવન કારાવાસની સજા ફટકારી છે.
દોષિતને 'આજીવન કેદ', પીડિતાને વળતરનો આદેશ
માત્ર 4 વર્ષની બાળકી સાથે દુષ્કર્મ ગુજારનાર ગુનેગાર રામનીત દેવનંદન રામરૂપ યાદવને કોર્ટે આજીવન કારાવાસની સજા ફટકારી છે. સાથે જ કોર્ટે સ્પષ્ટ હુકમ કર્યો છે કે, આરોપી જેલમાં મરે પછી જ તેનો મૃતદેહ પરિવારને સોંપવામાં આવે. આ ઉપરાંત, ભોગ બનનાર બાળકીને 10 લાખ રૂપિયાનું વળતર ચૂકવવાનો પણ આદેશ કરવામાં આવ્યો છે.
ઘરમાંથી અપહરણ કરી બાળકીનું દુષ્કર્મ આચર્યું
આ હૃદયદ્રાવક ઘટના 15 ડિસેમ્બર, 2025 ના રોજ બની હતી. આરોપીએ રાત્રિના સમયે ઘરમાં સૂતેલી 4 વર્ષની બાળકીનું અપહરણ કર્યું, અને તેને નજીકની ઝાડીઓમાં લઈ જઈને દુષ્કર્મ આચર્યું હતું. જે બાદ નરાધમ બાળકીને મૃત સમજીને ત્યાં જ છોડી દીધી અને ભાગી ગયો હતો.
જોકે, બાળકી જીવતી છે કે મરી ગઈ તે તપાસવા થોડીવાર પછી ગુનેગાર પાછો પણ આવ્યો હતો. બીજી તરફ, હોશમાં આવતા જ તે બાળકી હિંમતભેર લથડતા પગે પોતાના ઘરે પરિવાર પાસે પરત ફરી અને સમગ્ર હકીકત જણાવી હતી.
વતનમાં ભાગે તે પહેલા આરોપીને પોલીસે દબોચ્યો
પોલીસ તપાસમાં સામે આવ્યું કે, કરિયાણાની દુકાને ખરીદી કરવા આવતા આરોપીની નજર બાળકી પર પડી હતી. તેણે 10 દિવસ અગાઉ આ કૃત્ય માટે પ્લાન બનાવીને બાળકીની રેકી કરી હતી. ગુનો આચરીને તે પોતાના વતન બિહાર ભાગી જવાની ફિરાકમાં હતો, પરંતુ પોલીસે ટેકનિકલ સર્વેલન્સ અને બાતમીદારોની મદદથી માત્ર 5 જ દિવસમાં તેને ઝડપી લીધો હતો.
પોલીસ પર હુમલો કરતા પોલીસે કર્યું હતું ફાયરિંગ
ધરપકડ બાદ જ્યારે પોલીસના રી-કન્સ્ટ્રક્શન દરમિયાન આરોપીએ પોલીસ પર હુમલો કરીને ભાગવાનો પ્રયાસ કર્યો હતો. આ પરિસ્થિતિમાં પોલીસે પોતાના આત્મરક્ષણ અને નરાધમને રોકવા માટે 3 રાઉન્ડ ફાયરિંગ કર્યું હતું, જેમાં એક ગોળી આરોપીના પગમાં વાગી હતી. ત્યારબાદ તેને સિવિલ હોસ્પિટલમાં સારવાર આપીને રિમાન્ડ પર લેવાયો હતો.
13 દિવસની રાત-દિવસની મહેનત અંતે રંગ લાવી
આ અંગે ગાંધીનગરના SP રવિ તેજા વાસમ શેટ્ટીએ જણાવ્યું કે, અલગ-અલગ એજન્સીઓના સંકલન અને FSL ટીમની મદદથી પોલીસે મજબૂત વૈજ્ઞાનિક પુરાવા એકત્ર કર્યા હતા. માસૂમને ઝડપી ન્યાય અપાવવા માટે પોલીસે રાત-દિવસ એક કરીને માત્ર 13 દિવસમાં જ ચાર્જશીટ તૈયાર કરી દીધી હતી. પોલીસની ઝડપી કામગીરી અને ફાસ્ટ ટ્રેક કોર્ટના ચુકાદાથી સમાજમાં કડક દાખલો બેઠો છે.