CM Bhupendra Patel Shastra Pujan: મુખ્યમંત્રી ભૂપેન્દ્ર પટેલે વિજયાદશમીના પાવન પર્વે ગાંધીનગર સ્થિત મુખ્યમંત્રી નિવાસસ્થાને શાસ્ત્રોક્ત વિધિથી શસ્ત્ર પૂજન કરીને ભારતીય સંસ્કૃતિની પ્રાચિન પરંપરાને જાળવી હતી. અસત્ય પર સત્યના વિજયના પ્રતીક સમા વિજયા દશમીના પર્વે શસ્ત્રપૂજનની પરંપરા દ્વારા તેમણે શસ્ત્ર અને શાસ્ત્રની રક્ષા તથા તેના મહત્ત્વને ઉજાગર કર્યું હતું.
મુખ્યમંત્રી ભુપેન્દ્ર પટેલે પોતાની સુરક્ષા-સલામતી વ્યવસ્થામાં ફરજ બજાવતા સુરક્ષાકર્મીઓના શસ્ત્રોનું શાસ્ત્રોક્ત વિધિથી મુખ્યમંત્રી નિવાસના પ્રાંગણમાં પૂજન કર્યું હતું. આ સાથે તમામ સુરક્ષાકર્મીઓને વિજયાદશમી પર્વની હાર્દિક શુભકામનાઓ પાઠવી હતી. આ પ્રસંગે મુખ્યમંત્રીએ સુરક્ષાકર્મીઓને પ્રેરણાદાયી માર્ગદર્શન આપતા ફરજ, કર્તવ્ય ભાવના અને કર્મયોગના મહત્ત્વ વિશે વિસ્તૃત સમજ આપી હતી.
મુખ્યમંત્રી ભુપેન્દ્ર પટેલે જણાવ્યું હતું કે, રક્ષા અને સુરક્ષાનું દાયિત્વ નિભાવવાની સાથે સંવેદના, કરુણા અને સત્કર્મોની ભાવના જાળવી રાખીને કર્તવ્ય પથ પર અવિરત કાર્યરત રહેવું એ જ સાચો કર્મયોગ અને ફરજનિષ્ઠા છે. કર્તવ્યપાલન સાથે માનવીય મૂલ્યોનું જતન અને સત્કર્મો દ્વારા આધ્યાત્મિક ઉન્નતિનો વિચાર પણ જીવનમાં એટલો જ મહત્વનો છે.
મુખ્યમંત્રી ભુપેન્દ્ર પટેલની સુરક્ષા વ્યવસ્થાની જવાબદારી સંભાળતા પોલીસ અધિક્ષક તેજસ પટેલે શસ્ત્ર પૂજનના અવસરે મુખ્યમંત્રીનું સ્વાગત કર્યું હતું. આ પ્રસંગે મુખ્યમંત્રી સુરક્ષા-સલામતી વ્યવસ્થામાં ફરજ બજાવતા નાયબ પોલીસ અધિક્ષક, પોલીસ ઈન્સ્પેક્ટર, પોલીસ સબ-ઇન્સ્પેક્ટર, કમાન્ડોઝ તથા વાહન ચાલકો સહિતના સુરક્ષાકર્મીઓ ઉપસ્થિત રહ્યા અને શસ્ત્ર પૂજનમાં સહભાગી થયા હતા.
ઉલ્લેખનીય છે કે, મુખ્યમંત્રી નિવાસસ્થાને વિજયા દશમીના પર્વે શસ્ત્ર પૂજન કરવાની આ પરંપરા વડાપ્રધાન નરેન્દ્ર મોદીએ ગુજરાતના મુખ્યમંત્રી તરીકે તેમના કાર્યકાળ દરમિયાન શરૂ કરાવી હતી, જે આજે પણ પરંપરાગત શ્રદ્ધા અને કર્તવ્ય નિષ્ઠાની ભાવના સાથે જાળવી રાખવામાં આવી રહી છે.