Dahod: દાહોદ જિલ્લાના લીમખેડા તાલુકાના દુધિયા ગામે આવેલી ‘ધી ઉન્નતિ સેવિંગ્સ એન્ડ ક્રેડિટ સોસાયટી’માં કરોડો રૂપિયાનું આર્થિક કૌભાંડ પ્રકાશમાં આવતા સમગ્ર પંથકમાં ચકચાર મચી ગઈ છે. સામાન્ય લોકોની આસ્થા અને નાણાંકીય સુરક્ષાનું પ્રતીક ગણાતી આ મંડળીમાં જવાબદાર લોકોએ જ વિશ્વાસઘાત કરતા ખાતેદારો અને સભાસદોમાં ભારે રોષ જોવા મળી રહ્યો છે.
ઓડિટ વર્ષ 2024-25 દરમિયાન મંડળીના હિસાબોની ચકાસણી કરવામાં આવી હતી, જેમાં આ ભ્રષ્ટાચારનો પર્દાફાશ થયો હતો. તપાસમાં સામે આવ્યું કે, મંડળીના બે સભાસદો અને એક કલેક્શન ક્લાર્ક સહિત કુલ ચાર આરોપીઓએ એકબીજા સાથે મળીને પૂર્વ આયોજિત કાવતરું રચ્યું હતું.
આરોપીઓએ મંડળીના હિસાબોમાં છેડછાડ કરવા માટે ખોટા દસ્તાવેજો અને બોગસ બેંક સ્ટેટમેન્ટ બનાવ્યા હતા. આ ડમી દસ્તાવેજોના આધારે તેમણે મંડળીના ભંડોળમાંથી રૂપિયા 1.33 કરોડથી વધુની રકમ પોતાના અંગત ઉપયોગ માટે વાપરી નાખી હતી, જેના કારણે સંસ્થાને મોટું આર્થિક નુકસાન પહોંચ્યું છે.
આ ગંભીર કૌભાંડ સામે આવતા મંડળીના સત્તાધીશો ચોંકી ઉઠ્યા હતા. આ સમગ્ર મામલે ભરતભાઈ પટેલે લીમખેડા પોલીસ સ્ટેશનમાં ઉપરોક્ત ચાર આરોપીઓ વિરુદ્ધ સત્તાવાર ફરિયાદ નોંધાવી હતી. જેના આધારે લીમખેડા પોલીસે IPCની સંબંધિત કલમો હેઠળ ગુનો દાખલ કરીને કાયદેસરની તપાસ હાથ ધરી છે.
સહકારી મંડળીઓમાં ગરીબ અને મધ્યમ વર્ગના લોકો પોતાની જીવનભરની કમાણી જમા કરાવતા હોય છે. આવી સંસ્થાઓમાં થયેલી ઉચાપતને કારણે હવે ખાતેદારોની થાપણો સામે જોખમ ઊભું થયું છે. હાલ આ મામલે લીમખેડા પોલીસે સઘન તપાસ શરૂ કરી છે અને આરોપીઓને ઝડપી પાડવા માટે ચક્રો ગતિમાન કર્યા છે.
પોલીસ દ્વારા આરોપીઓની પૂછપરછ બાદ જ આ કૌભાંડમાં અન્ય કોઈની સંડોવણી છે કે કેમ? તે અંગે સ્પષ્ટતા થઈ શકશે. આ ઘટનાએ ગ્રામ્ય વિસ્તારોની સહકારી મંડળીઓની કાર્યપદ્ધતિ પર અનેક સવાલો ઉભા કર્યા છે.