Kutch Earthquake Today: આજે કચ્છમાં માત્ર 2 મિનિટના અંતરે ભૂકંપમાં બે આંચકા નોંધાતા લોકોમાં ફફડાટ ફેલાયો છે. જો કે આ ભૂકંપમાં કોઈ જાનહાનિના અહેવાલ નથી, પરંતુ ભયના માર્યા લોકો ઘરની બહાર દોડી આવતા અફરાતફરી મચી જવા પામી હતી.
આજે બપોરે 2:20 કલાકે કચ્છના ખાવડા વિસ્તારમાં 3.6ની તીવ્રતાનો ભૂંકપનો પ્રથમ આંચકો આવ્યો હતો. આ ભૂકંપનું કેન્દ્ર બિંદુ ખાવડાથી 32 કિલોમીટર દૂર નોંધાયું હતુ. જેની અસર આસપાસના ગ્રામ્ય વિસ્તારોમાં પણ અનુભવાઈ હતી.
પ્રથમ આંચકાની બે મિનિટ બાદ એટલે કે 2:22 કલાકે કચ્છના ધોળાવીરા નજીક બીજો ભૂંકપનો આંચકો અનુભવાયો હતો. આ આંચકાની તીવ્રતા રિક્ટર સ્કેલ પર 3.2ની નોંધાઈ હતી. તેમજ તેનું કેન્દ્ર બિંદુ ધોળાવીરાથી 32 કિલોમીટર દૂર નોંધાયું હતુ.
ઉલ્લેખનીય છે કે, ભૂકંપ ઝોન-5માં સમાવિષ્ટ કચ્છ જિલ્લામાં અવારનવાર ભૂકંપના આંચકા આવતા રહે છે. ગાંધીનગર સ્થિત સીસ્મોલોજી કચેરીના આંકડા અનુસાર, અગાઉ 22 એપ્રિલ, 2025ના રોજ રાતે 11:26 કલાકે કચ્છના દૂધઈથી ઉત્તર-ઉત્તર પશ્ચિમ દિશામાં 17 કિમી દૂર કેન્દ્રબિંદુ ધરાવતો 5ની તીવ્રતાનો આંચકો અનુભવાયો હતો. આ આંચકાની અસર આખા કચ્છ જિલ્લામાં અનુભવાઈ હતી. જેના પગલે રાતે ભરનિંદ્રામાં સૂતેલા લોકો ભયના માર્યા ઘરની બહાર દોડી આવ્યા હતા.