ભાવનગર: ગારીયાધાર પાસે શેત્રુંજી નદીમાં મૃત સિંહણ મળી, ડૂબી જવાથી મોત થયાની આશંકા

Lioness Death in Bhavnagar: ભાવનગર જિલ્લાના ગારીયાધાર નજીક ગીર લેન્ડસ્કેપ સાથે જોડાયેલા જંગલ વિસ્તારમાં ગુરુવારના રોજ એક સિંહણનો મૃતદેહ મળી આવતા વન વિભાગમાં દોડધામ મચી ગઈ છે. ભાવનગરના નાયબ વન સંરક્ષક (DCF) યોગેશ દેસાઈએ આ દુઃખદ ઘટનાની સત્તાવાર પુષ્ટિ કરી છે.

ડૂબી જવાથી મોત થયાની આશંકા 

બોટાદના DCF ગોવિંદસિંહ સરવૈયાએ ઘટનાની વિગતો આપતા જણાવ્યું કે, ગુરુવારે બપોરે અંદાજે 1:30 વાગ્યાની આસપાસ શેત્રુંજી નદી પાસે વન વિભાગના નિયમિત પેટ્રોલિંગ દરમિયાન આ સિંહણનો મૃતદેહ જોવા મળ્યો હતો. વન વિભાગના અંદાજ મુજબ આ સિંહણની ઉંમર પાંચ થી નવ વર્ષની વચ્ચે હોવાનું માનવામાં આવે છે.

સિંહણના મોતના સચોટ કારણો જાણવા માટે મૃતદેહને પોસ્ટમોર્ટમ તપાસ અર્થે કાંકરજ (Kankraj) ખાતે ખસેડવામાં આવ્યો છે. પ્રાથમિક તપાસ અને પરિસ્થિતિ જોતા એવું તારણ બહાર આવ્યું છે કે તાજેતરમાં વિસ્તારમાં પડેલા ભારે વરસાદ બાદ નદીમાં ડૂબી જવાને કારણે સિંહણનું કમકમાટીભર્યું મોત થયું હોઈ શકે છે.

શેત્રુંજી નદી સિંહોનો કુદરતી કોરિડોર

વન વિભાગના અધિકારીઓના જણાવ્યા અનુસાર, ગીર લેન્ડસ્કેપમાં મુક્તપણે વિહરતા એશિયાટિક સિંહો માટે શેત્રુંજી નદી એક કુદરતી કોરિડોર તરીકે કામ કરે છે. પરંતુ, છેલ્લા કેટલાક મહિનામાં આ પ્રદેશમાં સિંહોના મોતના સિલસિલાએ વન્યજીવ પ્રેમીઓની ચિંતા વધારી છે.

તાજેતરના સમયમાં નોંધાયેલા અન્ય સિંહોના મોતના કારણોમાં બબેસિયા વાયરસ (Babesia virus) નો ચેપ, હડકવા (rabies) અને માનવ-વન્યજીવ સંઘર્ષ જેવી બાબતો મુખ્ય રહી છે. વન વિભાગ હવે આ વિસ્તારમાં પેટ્રોલિંગ વધારીને સિંહોની સુરક્ષા સુનિશ્ચિત કરવાના પ્રયાસો કરી રહ્યું છે.