Bharuch News: ભરૂચ જિલ્લા ક્રાઇમ બ્રાન્ચે અંકલેશ્વર નજીક ગેરકાયદે કેમિકલનો કાળો કારોબાર ચલાવતા તત્વો સામે લાલ આંખ કરીને મોટી સફળતા હાંસલ કરી છે. બાતમીના આધારે પોલીસે કાપોદ્રા પાટિયા પાસે આવેલ એક ગોડાઉનમાં અચાનક દરોડો પાડી રૂ. 10.34 લાખની કિંમતનો 2130 કિલોગ્રામ શંકાસ્પદ કેમિકલનો જથ્થો ઝડપી પાડ્યો છે. આ કામગીરી દરમિયાન પોલીસે સ્થળ પરથી બે આરોપીઓની અટકાયત કરી આગળની કાયદેસરની કાર્યવાહી હાથ ધરી છે.
મળતી માહિતી મુજબ, ભરૂચ ક્રાઇમ બ્રાન્ચની ટીમને ચોક્કસ બાતમી મળી હતી કે અંકલેશ્વર નજીક કાપોદ્રા પાટિયા પાસે આવેલા 'ગુરુદેવ એન્ટરપ્રાઇઝ' નામના ગોડાઉનમાં ગેરકાયદેસર રીતે શંકાસ્પદ કેમિકલનો સંગ્રહ અને હેરફેર કરવામાં આવી રહી છે. આ બાતમીના આધારે ક્રાઇમ બ્રાન્ચની ટીમે ગોડાઉન પર અચાનક દરોડો પાડ્યો હતો. આકસ્મિક તપાસ દરમિયાન ગોડાઉનમાં કેમિકલયુક્ત પ્લાસ્ટિકની થેલીઓનો મોટો જથ્થો મળી આવ્યો હતો, જેનાથી ગેરકાયદે કેમિકલના વેપારનું કૌભાંડ ખુલ્લું પડ્યું હતું.
પોલીસે સ્થળ પરથી ૨,૧૩૦ કિલોગ્રામ જેટલું શંકાસ્પદ કેમિકલ કબજે કર્યું હતું. આ ઉપરાંત, કેમિકલની હેરફેર માટે ઉપયોગમાં લેવાતા એક આઇસર ટેમ્પોને પણ પોલીસે જપ્ત કર્યો છે. કેમિકલ અને વાહન મળીને કુલ રૂ. ૧૦.૩૪ લાખનો મુદ્દામાલ પોલીસ દ્વારા કાયદેસર રીતે જપ્ત કરવામાં આવ્યો છે.
આ ગેરકાયદે પ્રવૃત્તિમાં સંકળાયેલા બે ઇસમોની ક્રાઇમ બ્રાન્ચે ઘટનાસ્થળેથી જ ધરપકડ કરી લીધી છે. આ શંકાસ્પદ કેમિકલનો જથ્થો ક્યાંથી લાવવામાં આવ્યો હતો, તેને ક્યાં સપ્લાય કરવાનો હતો અને આ નેટવર્કમાં અન્ય કેટલા લોકો સામેલ છે તે દિશામાં પોલીસે ઊંડાણપૂર્વક પૂછપરછ અને તપાસ તેજ કરી છે. industrial ઝોન ગણાતા અંકલેશ્વરમાં ક્રાઇમ બ્રાન્ચની આ કાર્યવાહીથી ગેરકાયદે કેમિકલનો વેપાર કરતા તત્વોમાં ભારે ફાફડાટ વ્યાપી ગયો છે.