Bharuch Blast: ભરૂચ જિલ્લાના વાગરા તાલુકામાં આવેલી સાયખા GIDC સ્થિત 'સિન્ઝીલ ફાર્મા' (Synzeal Pharma) કંપનીના પ્લાન્ટમાં અચાનક રિએક્ટર ફાટતાં મોટી હોનારત સર્જાઈ છે. પ્લાન્ટમાં ઉત્પાદન પ્રક્રિયા દરમિયાન થયેલા ગોઝારા વિસ્ફોટને કારણે સમગ્ર વિસ્તારમાં અફરાતફરી મચી ગઈ હતી અને કામદારોમાં દોડધામ થઈ પડી હતી.
2 કામદારોના મોતની આશંકા
આ પણ વાંચો
પ્રાથમિક અહેવાલો અનુસાર, આ દુર્ઘટનામાં 2 કામદારોના મોત થયા હોવાની આશંકા સેવાઈ રહી છે, જ્યારે 5 અન્ય કામદારો ગંભીર રીતે ઘાયલ થયા છે. બનાવની જાણ થતાં જ બચાવ કામગીરી હાથ ધરી તમામ ઇજાગ્રસ્તોને તાત્કાલિક સારવાર અર્થે ભરૂચની ખાનગી હોસ્પિટલમાં ખસેડવામાં આવ્યા છે. જોકે, જાનહાનિ અને ઇજાગ્રસ્તોની ચોક્કસ સંખ્યા અંગે સ્થાનિક તંત્ર કે કંપની દ્વારા હજુ સુધી કોઈ સત્તાવાર પુષ્ટિ કરવામાં આવી નથી.
વિસ્ફોટનું કારણ અસ્પષ્ટ: તપાસનો ધમધમાટ
કંપનીના રિએક્ટરમાં કઈ પ્રક્રિયા ચાલી રહી હતી અને બ્લાસ્ટ કયા સમયે થયો તે અંગેની વિગતો મેળવાઈ રહી છે. રાસાયણિક પ્રક્રિયામાં ગડબડ, ટેકનિકલ ખામી કે દબાણમાં ફેરફાર જેવા કારણોસર આ બ્લાસ્ટ થયો હોવાનું પ્રાથમિક દ્રષ્ટિએ માનવામાં આવે છે, પરંતુ ચોક્કસ કારણ નિષ્ણાતોની તપાસ બાદ જ સામે આવશે. સ્થાનિક પોલીસ, ફાયર બ્રિગેડ અને ઔદ્યોગિક સલામતી વિભાગ દ્વારા ઘટનાસ્થળે પહોંચી તપાસનો ધમધમાટ શરૂ કરવામાં આવ્યો છે.
ઔદ્યોગિક સુરક્ષા સામે ફરી ઊઠ્યા સવાલો
ઔદ્યોગિક હબ ગણાતા ભરૂચના સાયખા GIDC વિસ્તારમાં આવેલી ફાર્મા કંપનીમાં બનેલી આ ઘટનાએ કેમિકલ અને ફાર્મા એકમોમાં કામદારોની સુરક્ષા સામે ફરી એકવાર ગંભીર સવાલો ઊભા કર્યા છે. ઉત્પાદન એકમમાં સુરક્ષાના સાધનોની સ્થિતિ, રિએક્ટરની નિયમિત જાળવણી અને સુરક્ષા નિયમોનું પાલન થતું હતું કે નહીં તે અંગે પણ તપાસ હાથ ધરવામાં આવશે. જો કંપની પ્રબંધનની બેદરકારી કે નિયમભંગ સામે આવશે તો કાયદેસરની કાર્યવાહી થઈ શકે છે. હાલમાં તંત્ર દ્વારા સત્તાવાર માહિતી અને તપાસ અહેવાલની રાહ જોવાઈ રહી છે.