Amreli: અમરેલી જિલ્લામાં નકલી ખાતર વેચતા તત્વો સામે સ્પેશિયલ ઓપરેશન ગ્રુપ (SOG) એ લાલ આંખ કરી છે. બાબરાના ખંભાળામાં થયેલી તપાસ બાદ, અમરેલીના મોટા આંકડિયા ગામની સીમમાં ધમધમતી ડુપ્લીકેટ ખાતર બનાવવાની ફેક્ટરી પર દરોડા પાડી પોલીસે લાખોનો મુદ્દામાલ કબજે કર્યો છે.
મોટા આંકડિયા-પીપળલગ માર્ગ પર આવેલી 'નીરી એગ્રી પ્રોડક્ટ' નામની કંપનીમાં ચાલી રહેલા આ કૌભાંડમાં પોલીસને હલકી ગુણવત્તાનું એમોનિયમ સલ્ફેટ ખાતર (50 થેલી) અને POLYHALITE-IPL ખાતર (25 બેગ). બ્રાન્ડેડ કંપનીના નામે છેતરપિંડી કરવા માટે રાખેલી 'ગુજરાત સરદાર ફર્ટિલાઇઝર' ની આશરે 5600 ખાલી બેગ ઝડપાઇ છે. ખાતર મિક્સ કરવા અને પેકિંગ કરવા માટેના 3 મશીનો જપ્ત કરવામાં આવ્યા છે.
થોડા દિવસો પહેલા બાબરાના ખંભાળા ગામેથી ઇફકોની બેગમાં નકલી ખાતર મળવાની ઘટના સામે આવી હતી. આ કેસની કડીઓ જોડતા પોલીસ સીધી મોટા આંકડિયાની આ ફેક્ટરી સુધી પહોંચી હતી.
પ્રાથમિક તપાસમાં બહાર આવ્યું છે કે, અહી હલકી ગુણવત્તાના પાવડરને બ્રાન્ડેડ બેગમાં ભરી ખેડૂતોને પધરાવી દેવાનું મોટું રેકેટ ચાલતું હતું.
અમરેલી SOG એ આ ઓપરેશનમાં કુલ રૂ. 16,74,000/- નો મુદ્દામાલ જપ્ત કરી સફળતા મેળવી છે. જોકે, આ ફેક્ટરીનો મુખ્ય સંચાલક ભરત ચીમનભાઈ ધાનાણી હાલ પોલીસ પકડથી દૂર છે. પોલીસે આરોપીને ઝડપી પાડવા માટે ચક્રો ગતિમાન કર્યા છે.