Gujarat Weather Forecast Today and Tomorrow | આજનું અને આવતીકાલનું હવામાન: ગુજરાતમાં મોટાભાગના વિસ્તારોમાં મેઘરાજાએ વિરામ લીધો છે. કેટલાક વિસ્તારોમાં હળવાથી મધ્યમ વરસાદી ઝાપટાં વરસી રહ્યાં છે. જોકે જોઇએ તેવી મેઘ મહેર જોવા મળી રહી નથી. ત્યારે હવામાન વિભાગે આગામી સાત દિવસ રાજ્યમા હળવા વરસાદી માહોલની આગાહી કરી છે. હવામાન વિભાગ અનુસાર, આજે અમદાવાદ, વડોદરા, સુરત, રાજકોટ સહિત સમગ્ર ગુજરાતમાં હળવોથી મધ્યમ વરસાદ થઇ શકે છે. સાથેજ 24થી 30 ઓગસ્ટ દરમિયાન પણ રાજ્યમાં આ જ પ્રકારનો વરસાદી માહોલ રહી શકે છે. બંગાળની ખાડીમાં એક લો પ્રેશર સક્રિય થયું છે અને નવું વેસ્ટર્ન ડિસ્ટર્બન્સ પણ સક્રિય છે.
આજે આ જિલ્લાઓમાં જોવા મળી શકે વરસાદી માહોલ
હવામાન વિભાગ અનુસાર, આજે 23 ઓગસ્ટ 2026ના રોજ અરવલ્લી, ખેડા, પંચમહાલ, દાહોદ, મહીસાગર, વડોદરા, છોટા ઉદેપુર, નર્મદા, ભરૂચ, સુરત, ડાંગ, તાપી, નવસારી, વલસાડ જિલ્લામાં કેટલાક સ્થળોએ હળવોથી મધ્યમ વરસાદ થઇ શકે છે. જ્યારે સાબરકાંઠા, વાવ-થરાદ, પાટણ, મહેસાણા, ગાંધીનગર, આણંદ, અમદાવાદ, સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દેવભૂમિ દ્વારક, ગીર સોમનાથ, બોટાદ, કચ્છ જિલ્લામાં છૂટાછવાયા સ્થળોએ હળવોથી મધ્યમ વરસાદ થઇ શકે છે.
24થી 30 ઓગસ્ટ શું છે વરસાદ અંગે આગાહી
24થી 30 ઓગસ્ટ 2026 દરમિયાન મહેસાણા, ગાંધીનગર, બનાસકાંઠા સહિત ઉત્તર ગુજરાત તથા સુરત, નવસારી અને વલસાડ સહિતના દક્ષિણ ગુજરાતમાં ઉપરાંત અમદાવાદ, વડોદરા અને આણંદ સહિત મધ્ય ગુજરાત તેમજ જામનગર, ભાવનગર અને રાજકોટ સહિતના સૌરાષ્ટ્ર અને કચ્છ જિલ્લામાં છૂટાછવાયા સ્થળોએ હળવોથી મધ્યમ વરસાદ થઇ શકે છે.
બંગાળની ખાડી પર એક લો પ્રેશર એરિયા સક્રિય
હવામાન વિભાગ દ્વારા અપાયેલી વિગતવાર માહિતી મુજબ, પશ્ચિમ બંગાળ-બાંગ્લાદેશના દરિયાકાંઠે ઉત્તર બંગાળની ખાડી પર બનેલા ઉપલા હવાના ચક્રવાતી પરિભ્રમણની અસર હેઠળ, ઉત્તર પશ્ચિમ બંગાળની ખાડી અને તેની આસપાસના વિસ્તારોમાં આજે એક લો પ્રેશર એરિયા સક્રિય થયો છે. આ સાથે સંકળાયેલું ચક્રવાતી પરિભ્રમણ સમુદ્ર સપાટીથી 7.6 કિલોમીટર સુધી વિસ્તરેલું છે અને તે ઊંચાઈ સાથે દક્ષિણ-પશ્ચિમ તરફ નમી રહ્યું છે. આ ઉપરાંત, મોન્સૂન ટ્રફ હાલમાં સમુદ્ર સપાટીથી અમૃતસર, પટિયાલા, મોરાદાબાદ, લખનૌ, દેહરી, પુરુલિયા, ઉત્તર પશ્ચિમ બંગાળની ખાડી પરના હળવા દબાણ ક્ષેત્રના કેન્દ્ર અને ત્યાંથી દક્ષિણ-પૂર્વ તરફ પૂર્વ મધ્ય બંગાળની ખાડીમાંથી પસાર થઈ રહ્યું છે.
એક વેસ્ટર્ન ડિસ્ટર્બન્સ પણ મધ્ય અને ઉપલા ટ્રોપોસ્ફેરિક વેસ્ટર્લીઝમાં 5.8 કિલોમીટરની ઊંચાઈ પર સક્રિય છે. ગતકાલનું ઉત્તરપૂર્વ મધ્ય પ્રદેશ અને તેની આસપાસના વિસ્તારો પરનું લો પ્રેશર ક્ષેત્ર આજે નબળું બન્યું છે, અને તેની સાથે સંકળાયેલું ચક્રવાતી પરિભ્રમણ હાલ પૂર્વ ઉત્તર પ્રદેશ પર સમુદ્ર સપાટીથી 0.9 કિલોમીટરની ઊંચાઈ પર છે, જે ગુજરાત રાજ્ય માટે ખાસ મહત્વનું નથી. પ્રદેશ પર નીચલા સ્તરે દક્ષિણ-પશ્ચિમીથી પશ્ચિમી પવનો ફૂંકાઈ રહ્યા છે.