Gujarat SIR Update: ગુજરાતમાં ચાલી રહેલા મતદાર યાદીના ખાસ સઘન સુધારણા કાર્યક્રમ (Special Intensive Revision - SIR) અંતર્ગત ચોંકાવનારા આંકડા સામે આવ્યા છે. મુખ્ય ચૂંટણી અધિકારી (CEO) ની કચેરી દ્વારા સોમવારે જાહેર કરાયેલા એક નિવેદન મુજબ, રાજ્યમાં 85 વર્ષથી વધુ વયના 4.21 લાખથી વધુ વરિષ્ઠ નાગરિકો નોંધાયા છે, જેમની ચકાસણીની કામગીરી હાલ ચાલી રહી છે.
લાખોની સંખ્યામાં મૃત અને સ્થળાંતરિત મતદારો
ચૂંટણી પંચની સઘન તપાસમાં મતદાર યાદીમાં રહેલી મોટી ક્ષતિઓ બહાર આવી છે. નિવેદનમાં જણાવ્યા અનુસાર, યાદીમાં 17.94 લાખથી વધુ એવા મતદારોના નામ હતા જેઓ મૃત્યુ પામ્યા છે. આ ઉપરાંત, 10.20 લાખથી વધુ મતદારો તેમના નોંધાયેલા સરનામે ગેરહાજર મળી આવ્યા હતા. સૌથી મોટી સંખ્યા સ્થળાંતરિત મતદારોની છે, જેમાં 40 લાખથી વધુ મતદારો કાયમી ધોરણે અન્ય સ્થળે રહેવા ગયા હોવાનું તપાસમાં સામે આવ્યું છે.
ડુપ્લિકેટ એન્ટ્રી અને ચકાસણી પ્રક્રિયા દરમિયાન 11.58 લાખથી વધુ 'ડેમોગ્રાફિકલી સિમિલર એન્ટ્રીઓ' (DSE) એટલે કે વસ્તી વિષયક સમાનતા ધરાવતી એન્ટ્રીઓ ધ્યાનમાં આવી છે. હાલમાં બૂથ લેવલ ઓફિસર (BLO) અને ચૂંટણી નોંધણી અધિકારી (ERO) ના સ્તરે આ શંકાસ્પદ એન્ટ્રીઓની ખરાઈ કરવામાં આવી રહી છે.
74 લાખ ફોર્મ્સ પરત મળ્યા નથી
ચૂંટણી તંત્રના જણાવ્યા અનુસાર, વિતરણ કરાયેલા ફોર્મ્સમાંથી 74 લાખથી વધુ ગણતરી ફોર્મ્સ હજુ સુધી પરત આવ્યા નથી. આ મુદ્દે 7 થી 9 ડિસેમ્બર દરમિયાન માન્ય રાજકીય પક્ષોના BLO અને બૂથ લેવલ એજન્ટો (BLA) વચ્ચે શ્રેણીબદ્ધ બેઠકો યોજવામાં આવી રહી છે. અત્યાર સુધીમાં આવી 37,000 થી વધુ બેઠકો યોજાઈ ચૂકી છે. જે મતદારોના ફોર્મ પરત નથી મળ્યા, તેમની યાદી જિલ્લા ચૂંટણી અધિકારીની વેબસાઇટ પર જાહેર કરવામાં આવી રહી છે અને ટૂંક સમયમાં તે CEO ની વેબસાઇટ પર પણ ઉપલબ્ધ થશે.
કામગીરી અંતિમ તબક્કામાં
ઉલ્લેખનીય છે કે, ગુજરાતમાં SIR પ્રક્રિયા 27 ઓક્ટોબરથી શરૂ કરવામાં આવી હતી અને તે 11 ડિસેમ્બરના રોજ પૂર્ણ થશે. રાજ્યભરમાં 5.08 કરોડ મતદારોને ગણતરી ફોર્મનું વિતરણ કરવામાં આવ્યું હતું અને હાલમાં ગણતરીના તબક્કાની 99.76 ટકા કામગીરી પૂર્ણ થઈ ગઈ છે.