Gujarat Rain Forecast Today and Tomorrow | આજનું અને આવતીકાલનું હવામાન: ગુજરાતમાં ચોમાસાની વિદાય પહેલા મેઘરાજા વિવિધ વિસ્તારોમાં પોતાની હાજરી નોંધાવી રહ્યા છે. આજે હવામાન વિભાગ (IMD) દ્વારા રાજ્યમાં 5 સપ્ટેમ્બરથી 11 સપ્ટેમ્બર સુધીના હવામાનની આગાહી જાહેર કરવામાં આવી છે. આ સપ્તાહ દરમિયાન રાજ્યના મોટાભાગના વિસ્તારોમાં હળવાથી મધ્યમ વરસાદની સંભાવના વ્યક્ત કરવામાં આવી છે. ખાસ કરીને દક્ષિણ ગુજરાત, ઉત્તર ગુજરાત, મધ્ય ગુજરાત અને સૌરાષ્ટ્ર-કચ્છના વિવિધ જિલ્લાઓમાં છૂટાછવાયા સ્થળોએ વરસાદી માહોલ જળવાઈ રહેશે. ચાલો જાણીએ આજે 5 સપ્ટેમ્બર થી 11 સપ્ટેમ્બર 2026 સુધી રાજ્યના કયા કયા વિસ્તારોમાં વરસાદ વરસશે.
5 થી 8 સપ્ટેમ્બર દરમિયાન દક્ષિણ ગુજરાતમાં વિશેષ અસર
હવામાન વિભાગના જણાવ્યા અનુસાર, 5 થી 8 સપ્ટેમ્બર દરમિયાન દક્ષિણ ગુજરાતના છોટા ઉદેપુર, નર્મદા, સુરત, તાપી, નવસારી, ડાંગ, વલસાડ તેમજ દમણ અને દાદરા નગર હવેલીમાં કેટલાક સ્થળોએ હળવાથી મધ્યમ વરસાદ પડી શકે છે.
બીજી તરફ, આ જ સમયગાળા દરમિયાન રાજ્યના અન્ય વિસ્તારો જેમ કે કચ્છ, વાવ-થરાદ, બનાસકાંઠા, પાટણ, મહેસાણા, સાબરકાંઠા, અરવલ્લી, ગાંધીનગર, અમદાવાદ, ખેડા, મહીસાગર, પંચમહાલ, દાહોદ, વડોદરા, આણંદ, ભરૂચ, સુરેન્દ્રનગર, મોરબી, રાજકોટ, જામનગર, દેવભૂમિ દ્વારકા, પોરબંદર, જૂનાગઢ, ગીર સોમનાથ, અમરેલી, ભાવનગર, બોટાદ અને દીવમાં છૂટાછવાયા સ્થળોએ હળવાથી મધ્યમ વરસાદનું પૂર્વાનુમાન છે.
9 સપ્ટેમ્બરે સુરત સહિતના વિસ્તારોમાં છૂટાછવાયો વરસાદ
9 સપ્ટેમ્બરના રોજ વરસાદની પેટર્નમાં સામાન્ય ફેરફાર જોવા મળશે. આ દિવસે છોટા ઉદેપુર, નર્મદા, તાપી, નવસારી, ડાંગ, વલસાડ, દમણ અને દાદરા નગર હવેલીમાં કેટલાક સ્થળોએ હળવોથી મધ્યમ વરસાદ વરસી શકે છે. જોકે, સુરતનો સમાવેશ હવે અન્ય ઝોન સાથે કરવામાં આવ્યો છે, જેથી સુરત સહિત ઉત્તર ગુજરાત, મધ્ય ગુજરાત, સૌરાષ્ટ્ર અને કચ્છના તમામ ઉપરોક્ત જિલ્લાઓમાં માત્ર છૂટાછવાયા સ્થળોએ જ હળવાથી મધ્યમ વરસાદની આગાહી કરવામાં આવી છે.
10 અને 11 સપ્ટેમ્બરે સમગ્ર રાજ્યમાં સાર્વત્રિક હળવો વરસાદ
10 અને 11 સપ્ટેમ્બરના રોજ વરસાદનું જોર સમગ્ર રાજ્યમાં એકસમાન રહેવાની શક્યતા છે. આ બંને દિવસો દરમિયાન રાજ્યના તમામ ઝોન - દક્ષિણ ગુજરાત (સુરત, વલસાડ, નવસારી વગેરે), મધ્ય ગુજરાત (અમદાવાદ, વડોદરા, ખેડા વગેરે), ઉત્તર ગુજરાત (બનાસકાંઠા, મહેસાણા વગેરે) અને સૌરાષ્ટ્ર-કચ્છના તમામ જિલ્લાઓ તેમજ દમણ, દીવ અને દાદરા નગર હવેલીમાં માત્ર છૂટાછવાયા સ્થળોએ જ હળવાથી મધ્યમ વરસાદ થવાની સંભાવના વ્યક્ત કરવામાં આવી છે.