Ahmedabad Seventh Day School News: અમદાવાદમાં આવેલી સેવડ સ્કૂલમાં ઓફલાઇન શિક્ષણ ફરી શરૂ કરવા માટે આયોજન હાથ ધરવામાં આવ્યું છે. વિદ્યાર્થીની હત્યાની ગંભીર ઘટના બાદથી સ્કૂલમાં પ્રત્યક્ષ શિક્ષણ બંધ કરી દેવામાં આવ્યું હતું. છેલ્લા લગભગ એક મહિનાથી આ સ્કૂલમાં શૈક્ષણિક કાર્ય ઓનલાઇન માધ્યમથી ચાલી રહ્યું છે. હવે રાજ્ય સરકારનું હકારાત્મક વલણ અને વાલીઓની સતત ડિમાન્ડને ધ્યાનમાં રાખીને પ્રત્યક્ષ શૈક્ષણિક કાર્ય ફરી શરૂ કરવા માટેની તૈયારીઓ ચાલી રહી છે. શક્યતા છે કે ગુરુવારથી અથવા તો આવતા સોમવારથી આ ઓફલાઇન શિક્ષણની શરૂઆત થઈ શકશે.
ઓફલાઇન શિક્ષણ શરૂ કરવા માટે શિક્ષણ વિભાગે સકારાત્મક વલણ દર્શાવ્યું છે. રાજ્ય સરકાર દ્વારા જિલ્લા શિક્ષણ અધિકારીને પણ આ બાબતે સૂચનાઓ આપવામાં આવી હતી. આ પ્રક્રિયાના ભાગરૂપે આવતી કાલે કોર્ટમાં એક જવાબ રજૂ કરવામાં આવશે, જે શાળા તરફથી અથવા તો જિલ્લા શિક્ષણ અધિકારી તરફથી હોઈ શકે છે. કોર્ટમાં જવાબ રજૂ થયા બાદ જ શિક્ષણ કાર્ય શરૂ થવાની શક્યતાઓ જોવા મળી રહી છે. ટૂંક સમયમાં જ શિક્ષણ ક્યારથી શરૂ થાય છે તે અંગેનો નિર્ણય આવે તેવી પ્રબળ શક્યતાઓ છે.
શાળાકીય શિક્ષણ શરૂ કરવામાં આવે ત્યારે સુરક્ષા વ્યવસ્થા જાળવી રાખવા પર વિશેષ ભાર મૂકવામાં આવ્યો છે. જિલ્લા શિક્ષણ અધિકારી દ્વારા જિલ્લા પોલીસ કમિશનરનો પણ અભિપ્રાય માંગવામાં આવ્યો હતો. પોલીસે આ બાબતે સકારાત્મકતા દર્શાવી છે અને શાળા શરૂ થાય તેવા સંજોગોમાં પોલીસ બંદોબસ્ત આપવાની તૈયારી પણ દર્શાવી છે. આથી, પોલીસ બંદોબસ્ત સાથે જ સ્કૂલમાં શિક્ષણ કાર્ય ફરી શરૂ કરવામાં આવશે તેવા આસાર વરતાઈ રહ્યા છે.
પ્રત્યક્ષ શિક્ષણની શરૂઆત તબક્કાવાર રીતે કરવામાં આવશે. પ્રથમ તબક્કે ધોરણ ૧૦ અને ધોરણ ૧૨ના વિદ્યાર્થીઓનું શિક્ષણ શરૂ થશે. આ વિદ્યાર્થીઓની બોર્ડની પરીક્ષા હોવાથી તેમને પહેલા પ્રાથમિકતા આપવામાં આવી છે. ધોરણ 10 અને 12નું પ્રત્યક્ષ શિક્ષણ શરૂ થયા બાદ રાબેતા મુજબ અન્ય ધોરણના વિદ્યાર્થીઓ માટે પણ શૈક્ષણિક કાર્ય શરૂ કરવાનું આયોજન ઘડી કાઢવામાં આવ્યું છે.
છેલ્લા કેટલાક દિવસોથી સેવડ સ્કૂલમાં શૈક્ષણિક કાર્યને લઈને ચાલી રહેલી પ્રક્રિયા હવે અંતિમ તબક્કામાં છે. વાલીઓની માંગણીઓ અને રાજ્ય સરકારના હકારાત્મક વલણના પરિણામે એક મહિનાથી બંધ રહેલું પ્રત્યક્ષ શિક્ષણ ટૂંક સમયમાં જ પુનઃસ્થાપિત થાય તેવું જણાઈ રહ્યું છે. તમામ પરિસ્થિતિ પર સત્તાવાળાઓ દ્વારા નજર રાખવામાં આવી રહી છે, અને ગુરુવાર અથવા આવતા સોમવાર સુધીમાં વિદ્યાર્થીઓ ફરી સ્કૂલમાં પ્રત્યક્ષ શિક્ષણ લેતા થઈ શકે તેવી સંભાવના પ્રબળ બની છે.