Ahmedabad Flower Show 2027: અમદાવાદના સાબરમતી રિવરફ્રન્ટ ખાતે જાન્યુઆરી 2027માં યોજાનારા ફ્લાવર શૉ માટે મ્યુનિસિપલ કોર્પોરેશન દ્વારા અત્યારથી તૈયારીઓ શરૂ કરી દેવામાં આવી છે. અગાઉ વિવિધ જાતના દેશી-વિદેશી છોડથી વિશાળ ડિસ્પ્લે તૈયાર કરવા માટે 8 કરોડ રૂપિયાનો ખર્ચ કરવાનું નક્કી કરવામાં આવ્યું હતુ. હવે ફ્લાવર શોમાં 20 જેટલા ફૂડ સ્ટોલ રૂ. 5 લાખની બેઝ પ્રાઈઝથી હરાજી કરવાનો નિર્ણય લેવામાં આવ્યો છે.
જાન્યુઆરી 2027માં યોજાનાર ફ્લાવર શોને લઈને AMC દ્વારા જુદા-જુદા પ્રકારના સ્ટોલની હરાજી કરવામાં આવશે. આશરે 10 નર્સરી સ્ટોલની હરાજી પ્રત્યેક સ્ટોલ દીઠ 2.5 લાખ રૂપિયાની પ્રારંભિક (બેઝ) કિંમતે કરવાનો નિર્ણય લેવાયો છે. આ ઉપરાંત, અન્ય 8 જેટલા સ્ટોલની પણ જાહેર હરાજી કરવામાં આવશે, જેની બેઝ પ્રાઈઝ 2 લાખ રૂપિયા નક્કી કરાઈ છે.
જ્યારે 20 ફૂડ સ્ટોલની પણ હરાજી યોજાશે, જેની બેઝ પ્રાઈઝ 5 લાખ રૂપિયા રાખવામાં આવી છે. ગત વર્ષે પણ ફૂડ સ્ટોલ માટે આ જ કિંમત (રૂ. 5 લાખ) નક્કી કરાઈ હતી, જોકે તે વેળાએ ઊંચી બેઝ પ્રાઈઝને કારણે તમામ ફૂડ સ્ટોલ વેચાઈ શક્યા નહતા.
અગાઉના વર્ષે આ ફ્લાવર શો 29 દિવસ સુધી ચાલ્યો હતો અને આશરે 11 લાખ નાગરિકોએ તેની મુલાકાત લીધી હતી. સામાન્ય રીતે આ ફ્લાવર શોમાં મુલાકાતીઓનો ધસારો 8 લાખથી 13 લાખની વચ્ચે રહેતો હોય છે. અહીં ભારે માત્રામાં લોકો આવતા હોવાને કારણે જ સ્ટોલના ભાવ ઊંચા રાખવામાં આવે છે.