Ahmedabad Accident: અમદાવાદ શહેરના એસ.પી.રીંગ રોડ પર અકસ્માતના બનાવો સતત વધી રહ્યા છે, ત્યારે ગઈકાલે મોડી રાતે ઓગણજથી ભાડજ તરફ જતાં રોડ પર વધુ એક અકસ્માતની ઘટના સામે આવી છે. જેમાં બેકાબુ કાર આગળ જતી ટ્રકમાં ધડાકાભેર ઘુસી ગઈ હતી. આ અકસ્માતમાં એક યુવકનું સ્થળ પર જ મોત નીપજ્યું છે, જ્યારે અન્ય ચાર મિત્રો ઘાયલ થયા છે.
આ અંગે પ્રાપ્ત વિગતો પ્રમાણે, બાપુનગરની વિષ્ણુજીની ચાલી રહેતા પ્રેમ ભદોરિયાના મિત્રો અર્ટીગા કાર લઈને મળવા આવ્યા હતા. જ્યાં તમામ મિત્રોએ બિયરની પાર્ટી કરીને મોડી રાતે નાના ચિલોડા કારમાં ગેસ ભરાવવા ગયા હતા. જ્યાંથી પરત ફરતી વખતે ભગીરથસિંહ ઝાલા કાર ચલાવી રહ્યો હતો અને તેઓ ગોધાવી તરફ જઈ રહ્યા હતા.
આ પણ વાંચો
આ દરમિયાન તેમની કાર એસ.પી. રીંગ રોડ પર ઓગણજથી ભાડજ જવાના રોડ પર આવેલી ગોકુળ હોટલ પાસે પહોંચ્યા, ત્યારે વળાંક પર કાર ચાલક ભગીરથસિંહે સ્ટીયરિંગ પરથી કાબુ ગુમાવ્યો હતો. જે બાદ બેકાબુ બનેલી કાર ધડાકાભેર આગળ જતી ટ્રકમાં ઘુસી ગઈ હતી.
આ અકસ્માતમાં કારની પાછળની સીટમાં બેઠેલા અશોક ઠાકરે નામના યુવકનું ગંભીર ઈજાઓને પગલે સ્થળ પર જ કમકમાટીભર્યું મોત નીપજ્યું હતુ. જ્યારે કાર ચાલક ભગીરથસિંહ, સમરસિંહ, ટકાભાઈ ઉર્ફે ભવાની અને પવન રાજા નામના મિત્રો ઘાયલ થયા હતા. જે પૈકી ભગીરથસિંહ અને સમરસિંહની હાલત ગંભીર જણાતા તેઓને અસારવા સિવિલમાં ખસેડવામાં આવ્યા છે.
જ્યારે અન્ય બે મિત્રોને સોલા સિવિલમાં સારવાર આપવામાં આવી રહી છે. હાલ તો આ સમગ્ર મામલે એ ડિવિઝ ટ્રાફિક પોલીસે કાર ચાલક ભગીરથસિંહ ઝાલા વિરુદ્ધ ગુનો દાખલ કરીને આગળની કાયદેસરની કાર્યવાહી હાથ ધરી છે.