Ahmedabad News: અમદાવાદમાં આગામી સમયમાં યોજાનારી ભગવાન જગન્નાથની ઐતિહાસિક રથયાત્રા અને ચોમાસાની ઋતુને ધ્યાનમાં રાખીને અમદાવાદ મ્યુનિસિપલ કોર્પોરેશન (AMC) એક્શન મોડમાં આવ્યું છે. લાખો શ્રદ્ધાળુઓની સુરક્ષાને ધ્યાનમાં રાખીને નાગરિક સંસ્થાએ શહેરભરમાં, ખાસ કરીને રથયાત્રાના રૂટ પર આવતી જર્જરિત અને જોખમી ઇમારતો સામે કડક કાર્યવાહી શરૂ કરી છે.
રથયાત્રાના રૂટ અને જૂના શહેર પર વિશેષ ધ્યાન
ભગવાન જગન્નાથની રથયાત્રા એ અમદાવાદના સૌથી મોટા ધાર્મિક ઉત્સવોમાંનો એક છે, જેમાં હજારો શ્રદ્ધાળુઓ ઉમટી પડે છે. આ શોભાયાત્રા જૂના શહેરના ગીચ વસ્તીવાળા વિસ્તારોમાંથી પસાર થતી હોવાથી જાહેર સલામતી અત્યંત મહત્વની બની જાય છે. AMC વહીવટી તંત્ર દ્વારા હાથ ધરવામાં આવેલા ખાસ નિરીક્ષણમાં માત્ર સેન્ટ્રલ ઝોનમાં જ 274 જેટલી ખતરનાક ઇમારતોની ઓળખ કરવામાં આવી છે. ખાસ કરીને ખાડિયા વોર્ડમાં, જ્યાંથી રથયાત્રાનો મુખ્ય ભાગ પસાર થાય છે. ત્યાં મિલકત માલિકો અને કબજેદારોને તાત્કાલિક નોટિસ ફટકારવામાં આવી છે.
સરકારી અને ખાનગી મિલકતોની તપાસ
તંત્ર દ્વારા કરવામાં આવેલી આ કામગીરીમાં કોઈ પણ પ્રકારની બાંધછોડ રાખવામાં આવી નથી. તપાસ દરમિયાન સરકારી, અર્ધ-સરકારી, ખાનગી, વ્યક્તિગત અને ધાર્મિક ટ્રસ્ટની માલિકીની મિલકતોનું ઝીણવટભર્યું નિરીક્ષણ કરવામાં આવ્યું હતું. જે ઇમારતો જોખમી જણાઈ છે, તેના માલિકોને માળખાના જોખમી ભાગો તાત્કાલિક દૂર કરવા અને જરૂરી સમારકામ કરવા આદેશ આપવામાં આવ્યો છે. જેથી રથયાત્રા દરમિયાન કોઈ અનિચ્છનીય અકસ્માત ન સર્જાય.
આંકડાકીય વિગતો અને કાયદાકીય કાર્યવાહી
AMCના ડેટા મુજબ, વર્ષ 2023 થી 2025 દરમિયાન શહેરભરમાં 1,251 જોખમી ઇમારતોને નોટિસ આપવામાં આવી હતી. વર્ષ 2026માં ઓળખાયેલી નવી 274 ઇમારતો સાથે હવે કુલ નોટિસ આપવામાં આવેલી મિલકતોની સંખ્યા 1,525 પર પહોંચી ગઈ છે. આ તમામ નોટિસ ગુજરાત પ્રાંતીય મ્યુનિસિપલ કોર્પોરેશન (GPMC) કાયદાની કલમ 264 હેઠળ જારી કરવામાં આવી છે.
મિલકત માલિકોની રહેશે સંપૂર્ણ જવાબદારી
કોર્પોરેશને મિલકત માલિકોને કડક ચેતવણી આપી છે કે, જો જોખમી માળખું તૂટી પડવાને કારણે કોઈ જાનહાનિ થશે. તો તેની સંપૂર્ણ જવાબદારી જે-તે માલિક અથવા કબજેદારની રહેશે. નાગરિકોને ખાસ અપીલ કરવામાં આવી છે કે, તેઓ જોખમી જાહેર કરાયેલા બાંધકામોમાં પ્રવેશ ન કરે અથવા ત્યાં રહેવાનું ટાળે. રથયાત્રાના ઉત્સવ દરમિયાન ભીડને જોતા, આસપાસના રહીશોને પણ સતર્ક રહેવા અને જરૂરી સાવચેતી રાખવા વિનંતી કરવામાં આવી છે.