RailOne App News: ભારતીય રેલવે દ્વારા ડિજિટલ ઇન્ડિયાને વેગ આપવા અને મુસાફરોને સુવિધાજનક મુસાફરી પૂરી પાડવા માટે એક મહત્વપૂર્ણ જાહેરાત કરવામાં આવી છે. રેલવેની આધુનિક એપ ‘રેલવન’ (RailOne) પર હવેથી ટિકિટ બુક કરાવનારા મુસાફરોને ટિકિટના કુલ મૂલ્ય પર સીધું 3 ટકા ડિસ્કાઉન્ટ આપવામાં આવશે. આ પગલાથી રેલવે સ્ટેશનો પર ટિકિટ બારીઓ પર થતી ભીડમાં ઘટાડો થવાની અને ડિજિટલ પેમેન્ટને પ્રોત્સાહન મળવાની આશા છે.
તમામ ડિજિટલ માધ્યમો પર મળશે છૂટ
અત્યાર સુધી મુસાફરોને માત્ર આર-વોલેટ (R-Wallet) દ્વારા અનરિઝર્વ (જનરલ) ટિકિટ બુક કરવા પર જ 3 ટકા બોનસ કેશબેક મળતું હતું. પરંતુ હવે રેલવેએ તેના વ્યાપમાં વધારો કર્યો છે. હવે જો કોઈ મુસાફર આર-વોલેટ સિવાયના અન્ય ડિજિટલ માધ્યમો જેવા કે UPI, ડેબિટ કાર્ડ અથવા ક્રેડિટ કાર્ડ દ્વારા ટિકિટ બુક કરશે, તો તેને ટિકિટની મૂળ કિંમત પર 3 ટકાનું સીધું ડિસ્કાઉન્ટ મળશે. આ ઉપરાંત, આર-વોલેટથી બુકિંગ કરનારા મુસાફરો માટે 3 ટકા બોનસ કેશબેકની સુવિધા પણ અગાઉની જેમ જ ચાલુ રહેશે.
14 જાન્યુઆરીથી છ મહિના માટે યોજના અમલી
રેલવેની આ ડિસ્કાઉન્ટ યોજના 14 જાન્યુઆરીથી 14 જુલાઈ સુધી પ્રાયોગિક ધોરણે અમલમાં રહેશે. આ છ મહિનાના સમયગાળા દરમિયાન રેલવે પ્રશાસન મુસાફરોના પ્રતિસાદ અને ડિજિટલ પેમેન્ટના ટ્રેન્ડનું બારીકાઈથી મૂલ્યાંકન કરશે. જો આ યોજના સફળ રહેશે અને મુસાફરો તરફથી સકારાત્મક પ્રતિસાદ મળશે, તો ભવિષ્યમાં આ ડિસ્કાઉન્ટ યોજનાને કાયમી બનાવવામાં આવી શકે છે અથવા અન્ય સેવાઓમાં પણ લાગુ કરવામાં આવી શકે છે.
UTS એપ હવે ‘રેલવન’માં સમાઈ ગઈ
રેલવેએ મુસાફરોની સરળતા માટે એક મોટું ટેકનિકલ એકીકરણ પણ કર્યું છે. અગાઉ જનરલ અને પ્લેટફોર્મ ટિકિટ માટે વપરાતી UTS એપને હવે ‘રેલવન’ એપમાં મર્જ (એકીકૃત) કરી દેવામાં આવી છે. હવે મુસાફરોને રિઝર્વેશન અને અનરિઝર્વ ટિકિટ માટે અલગ-અલગ એપ રાખવાની જરૂર નહીં રહે. પ્લેટફોર્મ ટિકિટથી લઈને લાંબા અંતરની મુસાફરી સુધીની તમામ સેવાઓ હવે એક જ ‘ઓલ-ઇન-વન’ પ્લેટફોર્મ પર ઉપલબ્ધ છે.
રેલવેનો આ નિર્ણય ખાસ કરીને રોજિંદા મુસાફરો અને બજેટમાં મુસાફરી કરવા ઈચ્છતા લોકો માટે વરદાન સાબિત થશે. ડિસ્કાઉન્ટની સાથે સાથે પેમેન્ટની સુગમતા મુસાફરીને વધુ યાદગાર અને ખિસ્સાને પોસાય તેવી બનાવશે.