TMKOC Cast At 44th Annual India Day Parade: ન્યૂયોર્કના મેનહટનમાં 16 ઓગસ્ટ, રવિવારના રોજ ફેડરેશન ઑફ ઈન્ડિયન એસોસિએશન્સ (FIA) દ્વારા 44મી વાર્ષિક ઈન્ડિયા ડે પરેડનું શાનદાર આયોજન કરવામાં આવ્યું હતું. 'હર્મની ઇન હેરિટેજ' (Harmony in Heritage) થીમ આધારિત આ ભવ્ય પરેડમાં અંદાજે 200,000 લોકો ઉમટી પડ્યા હતા. આ ભવ્ય આયોજનમાં લોકપ્રિય ટીવી સિરિયલ 'તારક મહેતા કા ઉલ્ટા ચશ્મા'ની ટીમે ભારે જનમેદનીનું આકર્ષણ જમાવ્યું હતું. વિશેષ વાત એ હતી કે આ વર્ષની પરેડ ભારતના 80મા સ્વતંત્રતા દિવસ અને અમેરિકાની 250મી વર્ષગાંઠને સમર્પિત હતી.
'તારક મહેતા કા ઉલ્ટા ચશ્મા'ની ટીમે કેવી રીતે જમાવ્યું આકર્ષણ?
આ પણ વાંચો
આ પરેડમાં સૌથી વધુ ભીડ 'તારક મહેતા કા ઉલ્ટા ચશ્મા'ના ફ્લોટ પર જોવા મળી હતી. મેડિસન એવન્યુ પર ભારતીય ડાયસ્પોરાએ પોતાના મનપસંદ કલાકારોને જોવા ભારે ઉત્સાહ દર્શાવ્યો હતો. આ ફ્લોટ પર સિરિયલના નિર્માતા અસિત કુમાર મોદી સાથે દિલીપ જોશી (જેઠાલાલ), મંદાર ચંદવાડકર (ભીડે), મુનમુન દત્તા (બબીતાજી), સોનાલિકા જોશી (માધવી), બલવિંદર સિંહ સૂરી (સોઢી) અને નીતિશ ભાલુની (ટપ્પુ) જેવા લોકપ્રિય કલાકારોએ ચાહકોનું અભિવાદન ઝીલ્યું હતું.
પરેડમાં કયા વિશેષ મહેમાનો અને નેતાઓએ આપી હાજરી?
ન્યૂયોર્ક રાજ્યના ગવર્નર કેથી હોચુલે આ ગૌરવપૂર્ણ પરેડનું નેતૃત્વ કર્યું હતું. તેમની સાથે સ્થાનિક વહીવટીતંત્રના અનેક અગ્રણીઓ જોડાયા હતા, જેમાં ન્યૂયોર્ક સ્ટેટ સેનેટર જેરેમી કુની, કોંગ્રેસમેન શ્રી થાનેદાર, એસેમ્બલીમેન ડેવિડ વેઇપ્રિન, રિપબ્લિકન એટર્ની જનરલ પદના ઉમેદવાર સરિતા કોમિરેડ્ડી હાજર રહ્યા હતા. આ ઉપરાંત, મુખ્ય અતિથિ તરીકે બોલિવૂડ અભિનેત્રી પૂજા હેગડે અને સાઉથ ફિલ્મોના જાણીતા અભિનેતા-દિગ્દર્શક અદિવી શેષ પણ ઉપસ્થિત રહ્યા હતા.
પરેડ દરમિયાન કયા સાંસ્કૃતિક કાર્યક્રમો યોજાયા?
મેડિસન એવન્યુ પરથી કુલ 55 ફ્લોટ્સ પસાર થયા હતા, જે સાંસ્કૃતિક સંગઠનો, વ્યવસાયો અને વિવિધ પ્રાદેશિક સંસ્થાઓનું પ્રતિનિધિત્વ કરતા હતા. તેમાં ન્યૂયોર્ક સ્થિત ભારતના કોન્સ્યુલેટ જનરલનો ખાસ ફ્લોટ પણ સામેલ હતો. માર્ચિંગ બેન્ડ અને વિવિધ પ્રદેશોના ડાન્સ ટ્રુપ્સ દ્વારા શાનદાર પ્રસ્તુતિ કરવામાં આવી હતી.
આ ઉપરાંત, FIA દ્વારા ઈસ્ટ 26મી સ્ટ્રીટ પર ફૂડ ફેસ્ટિવલ અને કમ્યુનિટી બૂથનું આયોજન કરાયું હતું. જ્યારે ઈસ્ટ 25મી અને 26મી સ્ટ્રીટ વચ્ચે આયોજિત લાઈવ કાર્યક્રમમાં બપોર દરમિયાન પરંપરાગત સંગીત અને નૃત્યની રજૂઆતો થઈ હતી. સમગ્ર કાર્યક્રમનું સંચાલન અને મહેમાનોનું સ્વાગત FIAના ચેરમેન અંકુર વૈદ્ય અને પ્રમુખ શ્રીકાંત અક્કાપલ્લી દ્વારા કરવામાં આવ્યું હતું.