Taarak Mehta Ka Ooltah Chashmah: લોકપ્રિય ટેલિવિઝન શો 'તારક મહેતા કા ઉલ્ટા ચશ્મા' માં 'દયાબેન'ના પાત્રથી ઘેર ઘેર ઓળખ મેળવનાર અભિનેત્રી દિશા વાકાણી અને શોના નિર્માતા અસિત કુમાર મોદી (Asit Modi) વચ્ચેના અતૂટ સંબંધે ફરી એકવાર સૌનું ધ્યાન ખેંચ્યું છે. દિશા વાકાણી, જેમણે 2017માં પ્રસૂતિ રજા લીધા બાદ શોમાંથી વિરામ લીધો હતો અને હજી સુધી પરત ફર્યા નથી, તેમને ફેન્સે આજે પણ ખૂબ યાદ કરે છે.
આ વર્ષે, દિશા વાકાણીએ 'તારક મહેતા…' શોના નિર્માતા અસિત કુમાર મોદી સાથે રક્ષાબંધનના પવિત્ર તહેવારની ઉજવણી કરી. આ પ્રસંગે, દિશાએ અસિત કુમાર મોદીને રાખડી બાંધી. નોંધનીય છે કે, શો છોડ્યાના આઠ વર્ષ પછી પણ, દિશા વાકાણી અને નિર્માતા અસિત કુમાર મોદી વચ્ચેનો સંબંધ અકબંધ રહ્યો છે, જે જોઈને ચાહકોમાં ભારે ઉત્સાહ જોવા મળ્યો.
આ પણ વાંચો
અસિત કુમાર મોદીએ તેમના સત્તાવાર ઇન્સ્ટાગ્રામ હેન્ડલ પર આ ઉજવણીનો એક વીડિયો શેર કર્યો છે. આ વીડિયોમાં દિશા વાકાણી દ્વારા રાખડી બાંધવામાં આવ્યા બાદ અસિત કુમાર મોદી દિશાના ચરણ સ્પર્શ કરતા અને તેમના આશીર્વાદ લેતા જોવા મળ્યા હતા. આ ઉપરાંત, દિશા પણ તેમના પગ સ્પર્શ કરતી જોવા મળી હતી. આ ભાવુક ક્ષણોએ સોશિયલ મીડિયા પર ચાહકોનું દિલ જીતી લીધું છે.
આ પ્રસંગે અસિત કુમાર મોદીએ ભાવુક કેપ્શન લખ્યું હતું. તેમણે જણાવ્યું કે, 'કેટલાક સંબંધો ભાગ્ય દ્વારા વણાયેલા હોય છે… તે લોહીના સંબંધો નથી, પણ હૃદયના સંબંધો છે! disha vakani ફક્ત અમારી 'દયા ભાભી' નથી, પણ મારી બહેન છે. વર્ષોથી હાસ્ય, યાદો અને નિકટતા વહેંચતા, આ સંબંધ સ્ક્રીનની બહાર ઘણો આગળ વધી ગયો છે. આ રાખી, એ જ અતૂટ વિશ્વાસ અને એ જ ઊંડી નિકટતા ફરીથી અનુભવાઈ… આ બંધન હંમેશા એવું જ મધુર અને મજબૂત રહે.'