Nana Patekar Last Video: ભારતીય સિનેમાના દિગ્ગજ અભિનેતા નાના પાટેકરના નિધનના સમાચારથી ચાહકોમાં શોકની લાગણી છવાઈ ગઈ છે. 75 વર્ષની વયે તેમના અવસાન બાદ સોશિયલ મીડિયા પર તેમનો એક વીડિયો ઝડપથી વાયરલ થઈ રહ્યો છે. આ વીડિયોમાં નાના પાટેકરે જીવન અને મૃત્યુ વિશે કરેલી વાત આજે લોકો માટે ચર્ચાનો વિષય બની છે. ખાસ વાત એ છે કે નિધનના થોડા દિવસ પહેલાં તેમણે કહ્યું હતું, "મને ખબર નથી કે કાલે હું અહીં હોઈશ કે નહીં", જે શબ્દો હવે તેમના ચાહકોને વધુ ભાવુક બનાવી રહ્યા છે.
નિધન બાદ કેમ ચર્ચામાં આવ્યો આ વીડિયો?
નાના પાટેકરના નિધન બાદ સોશિયલ મીડિયા પર તેમનો એક વીડિયો ઝડપથી વાયરલ થઈ રહ્યો છે. આ વીડિયો ગોવાના ડોના પાઉલામાં યોજાયેલા એક કાર્યક્રમનો હોવાનું જણાવવામાં આવી રહ્યું છે. કાર્યક્રમ દરમિયાન નાના પાટેકરે જીવનના સત્ય, પરિવાર અને માનવ સંબંધો વિશે ખુલ્લેઆમ વાત કરી હતી. તેમના સંબોધનનો વીડિયો હવે લાખો લોકો શેર કરી રહ્યા છે.
‘મને ખબર નથી કે કાલે હું અહીં હોઈશ કે નહીં...’
કાર્યક્રમ દરમિયાન નાના પાટેકરે કહ્યું હતું કે, “મને ખબર નથી કે કાલે હું અહીં હોઈશ કે નહીં. દરેક વ્યક્તિના જીવનમાં એક દિવસ એવો આવવાનો જ છે. પરંતુ તે પહેલાં આપણે પોતાની જાતને પૂછવું જોઈએ કે શું આપણે જે કરવું જોઈએ તે કરી રહ્યા છીએ?” તેમણે પરિવાર અને નજીકના સંબંધોની મહત્તા વિશે પણ વાત કરી હતી. તેમના આ શબ્દો આજે સોશિયલ મીડિયા પર સૌથી વધુ ચર્ચામાં છે.
45 મિનિટ સુધી CPR આપવા છતાં ન બચાવી શકાયા
અહેવાલો અનુસાર, ગુરુવારે સવારે આશરે 5:20 વાગ્યે ગોવા સ્થિત ઘર પર નાના પાટેકરને છાતીમાં અચાનક સખત દુખાવો થયો હતો અને તેઓ બેભાન થઈને ઢળી પડ્યા હતા. ઇમરજન્સી મેડિકલ ટીમે સ્થળ પર જ તેમને કાર્ડિયાક મસાજ અને CPR આપવાનું શરૂ કર્યું હતું અને તુરંત ડોના પાઉલા સ્થિત મણિપાલ હોસ્પિટલ ખસેડવામાં આવ્યા હતા.
મણિપાલ હોસ્પિટલના ઓન્કોલોજી વિભાગના વડા ડૉ. શેખર સાલકરે જણાવ્યું હતું કે, ડૉક્ટરોની ટીમે સતત 45 મિનિટ સુધી CPR આપીને તેમના હૃદયના ધબકારા પાછા લાવવાનો તમામ શક્ય પ્રયાસ કર્યો હતો, પરંતુ સફળતા મળી ન હતી. કાનૂની પ્રક્રિયાના ભાગરૂપે મેડિકો-લીગલ કેસ (MLC) નોંધવામાં આવ્યો છે અને પોસ્ટમોર્ટમ કરાવવામાં આવ્યું છે.તેમના નિધનના સમાચાર સામે આવતા જ ફિલ્મ જગત અને ચાહકોમાં શોકની લાગણી ફેલાઈ ગઈ હતી.
'ગમન' થી 'ઓ રોમિયો' સુધીની યાદગાર ફિલ્મી સફર
નાના પાટેકરે 1978માં ફિલ્મ ‘ગમન’થી પોતાની ફિલ્મી કારકિર્દીની શરૂઆત કરી હતી. ત્યારબાદ ‘પરિંદા’, ‘ક્રાંતિવીર’, ‘પ્રહાર’, ‘અબ તક છપ્પન’, ‘રાજનીતિ’ અને ‘વેલકમ’ જેવી અનેક હિટ ફિલ્મોમાં તેમણે પોતાના દમદાર અભિનયથી અલગ ઓળખ બનાવી હતી. તેમના સંવાદ બોલવાની અનોખી શૈલી અને શક્તિશાળી અભિનયને કારણે તેઓ ભારતીય સિનેમાના સૌથી લોકપ્રિય કલાકારોમાં સામેલ થયા હતા.
વડાપ્રધાન મોદી સહિત દેશભરમાંથી ભાવાંજલિ
નાના પાટેકરના નિધન બાદ રાજકીય અને ફિલ્મ જગતની અનેક જાણીતી હસ્તીઓએ તેમને શ્રદ્ધાંજલિ અર્પણ કરી છે. ચાહકો પણ સોશિયલ મીડિયા પર તેમની ફિલ્મોના દ્રશ્યો, સંવાદો અને યાદોને શેર કરીને તેમને ભાવભીની વિદાય આપી રહ્યા છે. તેમના અવસાનથી ભારતીય સિનેમાએ એક દમદાર અવાજ અને અનોખા અભિનેતાને ગુમાવ્યો છે.