ટાઈગર શ્રોફથી લઈને સલમાન ખાન અને રણવીર સિંહ: લોરેન્સ બિશ્નોઈ ગેંગે અગાઉ કોને-કોને આપી છે ધમકી?

Lawrence Bishnoi Gang: મુંબઈમાં બોલીવુડ અભિનેતા ટાઈગર શ્રોફ પર થયેલા ફાયરિંગ હુમલાની જવાબદારી લોરેન્સ બિશ્નોઈ ગેંગે (Lawrence Bishnoi Gang) સ્વીકારી હોવાનો દાવો છે અને અન્ય બોલીવુડ હસ્તીઓને પણ ચેતવણી આપી છે. આ ઘટના વિવિધ બોલીવુડ કલાકારો, પંજાબી ગાયકો અને કેટલાક રાજકારણીઓને નિશાન બનાવતી બિશ્નોઈ ગેંગની ધમકીઓની શ્રેણી દર્શાવે છે, જેમાંથી મોટાભાગના કિસ્સામાં કડીઓ સલમાન ખાન સાથે જોડાયેલી છે.

ટાઈગર શ્રોફ પર જીવલેણ હુમલો-ધમકીનો મામલો

રવિવારે સાંજે મુંબઈનાજુહુ વિસ્તારમાં બોલીવુડ અભિનેતા ટાઈગર શ્રોફની કાર પર અજાણ્યા હુમલાખોરોએ ગોળીબાર કર્યો હતો. આ ઘટના બાદ કોટા પોલીસે ત્રણ આરોપીઓની ધરપકડ કરી છે. ગોળીબારની આ ઘટનામાં અભિનેતા ટાઇગર શ્રોફ આબાદ બચ્યો હતો, જ્યારે તેના ડ્રાઇવર અને અન્ય એક વ્યક્તિને ગોળી વાગતા ઈજા પહોંચી હતી.

લોરેન્સ બિશ્નોઈ ગેંગે સોશિયલ મીડિયા પોસ્ટ દ્વારા આ હુમલાની જવાબદારી લીધી હોવાનો અહેવાલ છે. ગેંગે દાવો કર્યો કે, ટાઈગર શ્રોફને અગાઉ ફોન પર ચેતવણી આપવામાં આવી હતી અને સલમાન ખાન સાથે કામ કરવાનો પ્રયાસ કરવા બદલ તેને નિશાન બનાવવામાં આવ્યો હતો. ગેંગે સલમાન ખાન સાથે કામ કરનારા અન્ય લોકોને પણ નિશાન બનાવવાની ધમકી આપી છે.

લોરેન્સ બિશ્નોઈ ગેંગના નિશાના પર બોલીવુડ સેલેબ્સ

આ પહેલીવાર નથી જ્યારે લોરેન્સ બિશ્નોઈ ગેંગે બોલીવુડની હસ્તીઓને ધમકી આપી હોય. આ અગાઉ પણ અનેક અભિનેતા, ફિલ્મ નિર્માતાઓ અને જાણીતી હસ્તીઓને આ ગેંગ સાથે જોડાયેલી ધમકી અથવા ખંડણીના મેસેજ મળ્યા છે:

• સલમાન ખાન (Salman Khan)

સલમાન ખાન છેલ્લા ઘણા વર્ષોથી લોરેન્સ બિશ્નોઈ ગેંગના નિશાના પર રહ્યો છે. આ ધમકીઓ મુખ્યત્વે 1998ના કાળિયાર હરણ શિકાર કેસ (1998 blackbuck hunting case) સાથે જોડાયેલી છે. સલમાન ખાનને અનેક ધમકીભર્યા ઈમેલ અને ફોન કોલ્સ મળ્યા છે.

એપ્રિલ 2024 માં, મુંબઈ સ્થિત સલમાન ખાનના નિવાસસ્થાન ગેલેક્સી એપાર્ટમેન્ટ (Galaxy Apartments) બહાર બે હુમલાખોરોએ ગોળીબાર કર્યો હતો. આ હુમલો બિશ્નોઈ ગેંગ સાથે જોડાયેલો હોવાનું સામે આવ્યું હતું, જેમાં અનમોલ બિશ્નોઈનું નામ સામે આવ્યું હતું.

• રણવીર સિંહ (Ranveer Singh)

અભિનેતા રણવીર સિંહને વોટ્સએપ વોઈસ મેસેજ દ્વારા ₹10 કરોડની ખંડણી માંગતી ધમકી મળી હતી, જે અમેરિકાના નંબર પરથી મોકલવામાં આવી હતી. આ ધમકી મોકલનારે પોતાને હરી ચંદ જાટ ઉર્ફે હેરી બોક્સર (Harry Boxer) ગણાવ્યો હતો, જે લોરેન્સ બિશ્નોઈ ગેંગ સાથે જોડાયેલો હોવાનું કહેવાય છે. આ ધમકી 1 ફેબ્રુઆરી 2026 ના રોજ ફિલ્મ નિર્માતા રોહિત શેટ્ટીના ઘર બહાર થયેલા ફાયરિંગના થોડા સમય બાદ જ મળી હતી.

• રોહિત શેટ્ટી (Rohit Shetty)

1 ફેબ્રુઆરી 2026 ના રોજ, મુંબઈના જુહુ સ્થિત ફિલ્મ નિર્માતા રોહિત શેટ્ટીના નિવાસસ્થાન બહાર ગોળીબાર કરવામાં આવ્યો હતો. ગોળીઓ તેમની બાલ્કનીના કાચની રેલિંગ પર વાગી હતી. આ હુમલો શુભમ લોંકર (Shubham Lonkar) સાથે જોડાયેલી ગેંગ સાથે સંબંધિત હોવાનું સામે આવ્યું હતું, જેનો હેતુ ખંડણી વસૂલવાન અને ફિલ્મ ઈન્ડસ્ટ્રીમાં ભયનો માહોલ ઉભો કરવાનો હતો.

• આયુષ શર્મા (Aayush Sharma)

અભિનેતા અને સલમાન ખાનના બહેનોઈ આયુષ શર્માને પ્રોટોન મેઈલ (Proton Mail) દ્વારા ધમકીભર્યો ઈમેલ મળ્યો હતો. ધમકીભર્યો મેઈલ મોકલનારે લોરેન્સ બિશ્નોઈ ગેંગ સાથે સંબંધ હોવાનો દાવો કર્યો હતો.

• મુનાવર ફારુકી (Munawar Faruqui)

કોમેડિયન અને રિયાલિટી ટીવી પર્સનાલિટી મુનાવર ફારુકીને દિલ્હીમાં આયોજીત એક કાર્યક્રમ દરમિયાન બિશ્નોઈ ગેંગના શંકાસ્પદ સભ્યો દ્વારા ટ્રેક અને ટાર્ગેટ કરવામાં આવ્યો હોવાનું બહાર આવ્યું હતું. આ ધમકી બાદ મુંબઈ પોલીસે તેની સુરક્ષા વધારી દીધી હતી.

બોલીવુડથી આગળ પણ ધમકીઓનો વ્યાપ

લોરેન્સ બિશ્નોઈ ગેંગની ધમકી અને હુમલા માત્ર બોલીવુડ પૂરતા મર્યાદિત નથી. પંજાબી ગાયકો અને રાજકીય હસ્તીઓ પણ આવી અનેક ઘટનામાં લક્ષ્યાંક બની છે. પંજાબી ગાયક સિદ્ધુ મૂસેવાલાની 29 મે, 2022ના રોજ પંજાબના માનસા જિલ્લામાં ગોળી મારીને હત્યા કરવામાં આવી હતી. તેઓ પોતાના બે મિત્રો સાથે મહિન્દ્રા થાર (Mahindra Thar SUV) માં મુસાફરી કરી રહ્યા હતા, ત્યારે હુમલાખોરોએ તેમના વાહન પર અંધાધૂંધ ગોળીબાર કર્યો હતો. ગંભીર રીતે ઘવાયેલા મુસેવાલાને હોસ્પિટલમાં મૃત જાહેર કરવામાં આવ્યા હતા.