ફાલ્ગુની પાઠકના ગરબા ઉત્સવમાં ટિકિટના ભાવ આસમાને, સૌથી મોંઘી કેટેગરીની કિંમત લાખોમાં

falguni pathak garba 2026 tickets price: નવરાત્રીમાં ગરબાના તાલે ઝૂમવા માટે લોકોમાં ભારે ઉત્સાહ જોવા મળે છે. આ દરમિયાન મુંબઈમાં યોજાઈ રહેલો ગાયિકા ફાલ્ગુની પાઠકનો નવરાત્રી ઉત્સવ ટિકિટના ભાવને કારણે ચર્ચામાં આવ્યો છે. અહીં સામાન્ય ટિકિટથી લઈને પ્રીમિયમ VIP પોડ સુધીના વિકલ્પો ઉપલબ્ધ છે. ખાસ વાત એ છે કે 12 લોકો બેસી શકે તેવા એક્સક્લુઝિવ VIP પોડની કિંમત ₹2.04 લાખ રાખવામાં આવી છે. તો ચાલો જાણીએ આ ઉત્સવની ટિકિટના ભાવ અને તેમાં મળતી સુવિધાઓ વિશે.

ફાલ્ગુની પાઠકના ગરબા ઉત્સવની ટિકિટના ભાવ

મુંબઈના જિયો વર્લ્ડ કન્વેન્શન સેન્ટરમાં 'વેસ્ટ એવન્યુ રિયલ્ટી નવરાત્રી ઉત્સવ 2026'નું આયોજન કરવામાં આવ્યું છે. આ નવરાત્રી ઉત્સવ 11થી 19 ઑક્ટોબર સુધી યોજાવાનો છે. 'ગરબા ક્વીન' તરીકે જાણીતી ફાલ્ગુની પાઠકના લાઇવ ગરબા જોવા માટે મોટી સંખ્યામાં લોકો ઉત્સુક છે. જોકે, આ વખતે ઉત્સવની ટિકિટના ભાવ પણ લોકોનું ધ્યાન ખેંચી રહ્યા છે. ઉપલબ્ધ માહિતી અનુસાર, ટિકિટની કિંમત ₹2,000થી શરૂ થઈને ₹2.04 લાખ સુધી જાય છે.

સૌથી મોંઘી ટિકિટ ₹2.04 લાખની

આ ઉત્સવમાં સૌથી મોંઘી કેટેગરી 'એક્સક્લુઝિવ પોડ' છે. તેની કિંમત ₹2.04 લાખ છે. આ ખાસ પ્રાઇવેટ VIP જગ્યામાં એકસાથે 12 લોકો બેસી શકે છે. આ પેકેજમાં ₹10,000નું ફૂડ એન્ડ બેવરેજ વાઉચર પણ સામેલ છે. જોકે, આ વાઉચરનો ઉપયોગ માત્ર નિર્ધારિત દિવસે જ કરી શકાય છે. પરિવાર કે મિત્રો સાથે ખાસ રીતે ગરબાની મજા માણવા ઇચ્છતા લોકો માટે આ પ્રીમિયમ વિકલ્પ રાખવામાં આવ્યો છે.

પરિવાર અને મિત્રો માટે ગ્રુપ પેકેજ

જે લોકો પરિવાર કે મિત્રો સાથે ગરબા રમવા જવા માગે છે તેમના માટે ગ્રુપ ટિકિટના વિકલ્પો પણ ઉપલબ્ધ છે. પાંચ લોકોના ગ્રુપ પેકેજની કિંમત ₹13,000 છે. આ પ્રમાણે એક વ્યક્તિદીઠ ₹2,600નો ખર્ચ થાય છે. જ્યારે 10 લોકોના ગ્રુપ પેકેજ માટે ₹25,000 ચૂકવવા પડે છે, એટલે કે વ્યક્તિદીઠ ₹2,500 થાય છે.

ગરબા ઉત્સવમાં શું છે ખાસ?

આ વર્ષે ફાલ્ગુની પાઠકનો નવરાત્રી ઉત્સવ મુંબઈના જિયો વર્લ્ડ કન્વેન્શન સેન્ટરની અંદર યોજાઈ રહ્યો છે. આ સ્થળ સંપૂર્ણપણે એર-કન્ડિશન્ડ છે. અહીં કાર્પેટવાળો ડાન્સ ફ્લોર તૈયાર કરવામાં આવ્યો છે, જેથી લોકો ગરબાના તાલે ઝૂમી શકે. આ ઉપરાંત, ઉત્સવ દરમિયાન દરરોજ મહાઆરતી, લાઇવ પરફોર્મન્સ અને શાનદાર લાઇટિંગની વ્યવસ્થા પણ રાખવામાં આવી છે.

પાર્કિંગથી લઈને ખાણીપીણી સુધીની સુવિધા

ઉત્સવમાં આવતા લોકો માટે પેઇડ પાર્કિંગની સુવિધા ઉપલબ્ધ છે. સાથે જ ખાણીપીણી માટે પણ વ્યવસ્થા કરવામાં આવી છે. નવરાત્રીના નવ દિવસ દરમિયાન ફાલ્ગુની પાઠકના ગરબા અને લાઇવ પરફોર્મન્સ આ કાર્યક્રમનું મુખ્ય આકર્ષણ છે. ફાલ્ગુની પાઠક દાયકાઓથી નવરાત્રીના ગરબા ઉત્સવ સાથે જોડાયેલાં છે અને તેમના ગરબા ગીતો ગુજરાત સહિત દેશભરમાં લોકપ્રિય છે. આ વર્ષે તેમના મુંબઈના ગરબા ઉત્સવમાં ટિકિટના ઊંચા ભાવને કારણે પણ લોકોમાં ચર્ચા જોવા મળી રહી છે.