Study Abroad 2027: વિદેશમાં ઉચ્ચ અભ્યાસ કરવાનું સપનું જોતા ગુજરાતના અનેક વિદ્યાર્થીઓ માટે વર્ષ 2027 એક નવી તક લઈને આવી શકે છે. ખાસ કરીને જર્મની અને આયર્લેન્ડ જેવા દેશો ભારતીય વિદ્યાર્થીઓમાં લોકપ્રિય બની રહ્યા છે. જોકે, વિદેશ અભ્યાસ માટે માત્ર સારો દેશ કે જાણીતી યુનિવર્સિટી પસંદ કરવી પૂરતી નથી. કોર્સની પસંદગીથી લઈને રહેવાનો ખર્ચ, વિઝા નિયમો અને ભવિષ્યમાં નોકરીની તકો સુધીની બાબતોનું અગાઉથી આયોજન કરવું જરૂરી છે. ત્યારે જાણીએ કે 2027ના ઇન્ટેક માટે જર્મની કે આયર્લેન્ડ પસંદ કરતાં પહેલાં કઈ બાબતો ધ્યાનમાં રાખવી જોઈએ.
જર્મની કે આયર્લેન્ડ, ભારતીય વિદ્યાર્થીઓ માટે કયો દેશ બની રહ્યો છે પસંદગી?
વિદેશમાં અભ્યાસ માટે જતાં ભારતીય વિદ્યાર્થીઓની સંખ્યામાં સતત વધારો થઈ રહ્યો છે. ખાસ કરીને જર્મની અને આયર્લેન્ડ ઉચ્ચ શિક્ષણ માટે વિદ્યાર્થીઓનું ધ્યાન ખેંચી રહ્યા છે. આ અંગે ગુજરાતી જાગરણે TOEFL અને GRE પરીક્ષાનું સંચાલન કરતી સંસ્થા ETSના સાઉથ એશિયાના એક્ઝિક્યુટિવ ડિરેક્ટર કરન લલિત (Karan Lalit) સાથે ખાસ વાતચીત કરી હતી.
વાતચીત દરમિયાન તેમણે 2027ના શૈક્ષણિક સત્ર માટે તૈયારી કરી રહેલા ગુજરાતના વિદ્યાર્થીઓને કોર્સ, યુનિવર્સિટી, નાણાકીય આયોજન, ભાષા કૌશલ્ય અને વિઝા સંબંધિત મહત્વપૂર્ણ બાબતો સમજાવી હતી.
જર્મનીમાં ભારતીય વિદ્યાર્થીઓની સંખ્યા વધી
જર્મની ભારતીય વિદ્યાર્થીઓ માટે ઉચ્ચ શિક્ષણનું લોકપ્રિય કેન્દ્ર બની રહ્યું છે. DAAD ઇન્ડિયાના આંકડા અનુસાર, વિન્ટર સેમેસ્ટર 2025/26 દરમિયાન જર્મન યુનિવર્સિટીઓમાં ભારતીય વિદ્યાર્થીઓની સંખ્યા 17.5% વધીને 69,816 થઈ હતી. આ સાથે ભારતીય વિદ્યાર્થીઓ જર્મનીમાં સૌથી મોટો આંતરરાષ્ટ્રીય વિદ્યાર્થી સમૂહ બન્યા છે.
જર્મની ખાસ કરીને એન્જિનિયરિંગ, ટેક્નોલોજી, સાયન્સ અને રિસર્ચ આધારિત અભ્યાસક્રમો માટે જાણીતું છે. અહીંની ઘણી સરકારી યુનિવર્સિટીઓમાં ટ્યુશન ફી ઓછી અથવા અમુક કિસ્સાઓમાં શૂન્ય હોય છે. જોકે, વિદ્યાર્થીઓએ સેમેસ્ટર ફી, રહેવાનો ખર્ચ અને અન્ય જરૂરી ખર્ચને પણ ધ્યાનમાં રાખવો જોઈએ.
આયર્લેન્ડમાં પણ ભારતીય વિદ્યાર્થીઓનો રસ વધ્યો
બીજી તરફ આયર્લેન્ડ પણ ભારતીય વિદ્યાર્થીઓ માટે અભ્યાસનું આકર્ષક સ્થળ બની રહ્યું છે. હાયર એજ્યુકેશન ઓથોરિટીના ડેટા મુજબ, વર્ષ 2024/25 દરમિયાન આયર્લેન્ડમાં 9,175 ભારતીય વિદ્યાર્થીઓ નોંધાયા હતા. આ સંખ્યા અગાઉના વર્ષની સરખામણીએ લગભગ 30% વધુ હતી. આયર્લેન્ડમાં ખાસ કરીને ટેક્નોલોજી, બિઝનેસ, ફાર્માસ્યુટિકલ્સ અને ફાઇનાન્સ જેવા ક્ષેત્રોમાં અભ્યાસની સારી તકો ઉપલબ્ધ છે. જોકે, અહીં યુનિવર્સિટીની ફી અને ડબલિન જેવા મોટા શહેરોમાં રહેવાનો ખર્ચ વધુ હોઈ શકે છે.
દેશ નહીં, પહેલાં તમારા કોર્સ અને કરિયરનું લક્ષ્ય નક્કી કરો
કરન લલિતના જણાવ્યા અનુસાર, વિદ્યાર્થીઓએ માત્ર યુનિવર્સિટીના રેન્કિંગને આધારે નિર્ણય ન લેવો જોઈએ. તેના બદલે જે કોર્સમાં પ્રવેશ મેળવવો હોય તેનું અભ્યાસક્રમ, ફેકલ્ટી, પ્રેક્ટિકલ લર્નિંગ, રિસર્ચ અને ઇન્ડસ્ટ્રી સાથેના જોડાણની માહિતી મેળવવી જોઈએ.
જો વિદ્યાર્થી એન્જિનિયરિંગ, ટેક્નોલોજી કે રિસર્ચ ક્ષેત્રમાં આગળ વધવા માંગતો હોય તો જર્મની એક સારો વિકલ્પ બની શકે છે. જ્યારે ટેક્નોલોજી, બિઝનેસ, ફાર્માસ્યુટિકલ્સ અને ફાઇનાન્સમાં રસ ધરાવતા વિદ્યાર્થીઓ આયર્લેન્ડની યુનિવર્સિટીઓના અભ્યાસક્રમો તપાસી શકે છે. આ ઉપરાંત પસંદ કરેલો કોર્સ અંગ્રેજી ભાષામાં ઉપલબ્ધ છે કે નહીં અને વિદ્યાર્થીની અગાઉની શૈક્ષણિક લાયકાત પ્રવેશના માપદંડો સાથે મેળ ખાય છે કે નહીં તે પણ તપાસવું જરૂરી છે.
માત્ર ટ્યુશન ફી નહીં, રહેવા સહિતનો ખર્ચ પણ ગણો
વિદેશ અભ્યાસનું આયોજન કરતી વખતે સૌથી મહત્વની બાબત બજેટ છે. ઘણા વિદ્યાર્થીઓ માત્ર યુનિવર્સિટીની ટ્યુશન ફી જોઈને નિર્ણય લે છે, પરંતુ વિદેશમાં રહેવા દરમિયાન અન્ય અનેક ખર્ચ પણ થાય છે. તેમાં રહેઠાણ, ભોજન, ટ્રાન્સપોર્ટ, હેલ્થ ઇન્સ્યોરન્સ, વિઝા ફી, સિક્યોરિટી ડિપોઝિટ અને આવવા-જવાનો ખર્ચ સામેલ છે. જર્મનીની ઘણી સરકારી યુનિવર્સિટીઓમાં ટ્યુશન ફી ઓછી હોય છે, પરંતુ સેમેસ્ટર કન્ટ્રિબ્યુશન અને રહેવાનો ખર્ચ ચૂકવવો પડે છે. બીજી તરફ આયર્લેન્ડમાં ટ્યુશન ફી ઉપરાંત મોટા શહેરોમાં મકાન ભાડે મેળવવું પણ ખર્ચાળ બની શકે છે.
વિદ્યાર્થીઓએ પાર્ટ-ટાઇમ નોકરી કે અભ્યાસ પૂર્ણ થયા પછી મળનારી સંભવિત સેલેરીના આધારે જ બજેટ નક્કી ન કરવું જોઈએ. તેના બદલે પોતાની આર્થિક ક્ષમતા પ્રમાણે ખર્ચનું આયોજન કરવું અને સ્કોલરશિપના વિકલ્પો અગાઉથી તપાસવા જોઈએ.
વિઝા અને અભ્યાસ પછી નોકરીની તકો વિશે જાણો
વિદેશમાં અભ્યાસ માટે પ્રવેશ મેળવવો જેટલો મહત્વપૂર્ણ છે, તેટલું જ જરૂરી વિઝા અને પોસ્ટ-સ્ટડી વર્ક પરમિશનના નિયમો સમજવા પણ છે. જર્મની અને આયર્લેન્ડ બંને દેશોના વિઝા નિયમો અલગ છે. વર્ષ 2027ના ઇન્ટેક સુધીમાં આ નિયમોમાં ફેરફાર પણ થઈ શકે છે. તેથી વિદ્યાર્થીઓએ કોઈ એજન્ટની માહિતી પર આધાર રાખવાને બદલે સંબંધિત દેશની સત્તાવાર સરકારી વેબસાઇટ પરથી વિઝા, નાણાકીય પુરાવા અને અભ્યાસ બાદ કામ કરવાની પરવાનગી અંગેની નવીનતમ માહિતી તપાસવી જોઈએ.
આ ઉપરાંત સ્થાનિક ભાષાનું જ્ઞાન પણ રોજિંદા જીવન અને નોકરી મેળવવામાં મદદરૂપ બની શકે છે. ખાસ કરીને જર્મનીમાં જર્મન ભાષાનું જ્ઞાન નોકરીની તકો વધારવામાં ઉપયોગી થઈ શકે છે. આયર્લેન્ડમાં અંગ્રેજી ભાષા મુખ્ય
હોવાથી વિદ્યાર્થીઓએ ત્યાંના જોબ માર્કેટ અને સ્પર્ધાને સમજવી જોઈએ.
2027ના ઇન્ટેક માટે અત્યારથી જ શરૂ કરો તૈયારી
વિદેશમાં અભ્યાસ માટે છેલ્લી ઘડીએ દોડધામ ન કરવી પડે તે માટે વિદ્યાર્થીઓએ અત્યારથી જ જરૂરી દસ્તાવેજો તૈયાર કરવા જોઈએ. માર્કશીટ, પાસપોર્ટ, સ્ટેટમેન્ટ ઑફ પર્પઝ (SOP), રેફરન્સ લેટર્સ અને લેંગ્વેજ ટેસ્ટની તૈયારી માટે સમય નક્કી કરવો જોઈએ. અંગ્રેજી ભાષા પર સારી પકડ હોવી પણ જરૂરી છે, કારણ કે તે માત્ર યુનિવર્સિટીમાં પ્રવેશ મેળવવા માટે જ નહીં, પરંતુ અભ્યાસ દરમિયાન લેક્ચર્સ સમજવા અને અન્ય વિદ્યાર્થીઓ સાથે વાતચીત કરવા માટે પણ ઉપયોગી છે.
TOEFL iBT પરીક્ષા વિશ્વના 160થી વધુ દેશોની 13,500થી વધુ યુનિવર્સિટીઓ અને સંસ્થાઓમાં માન્ય છે. તેમાં જર્મની, આયર્લેન્ડ, અમેરિકા, બ્રિટન અને કેનેડાની અનેક સંસ્થાઓનો સમાવેશ થાય છે. જોકે, દરેક યુનિવર્સિટીની ભાષા પરીક્ષા અને સ્કોર સંબંધિત શરતો અલગ હોઈ શકે છે.
યોગ્ય આયોજનથી વિદેશ અભ્યાસનું સપનું થશે સાકાર
કરન લલિતના જણાવ્યા અનુસાર, ગુજરાતના વિદ્યાર્થીઓએ વિદેશ અભ્યાસ માટે ઉતાવળમાં નિર્ણય લેવાને બદલે પોતાની શૈક્ષણિક લાયકાત, બજેટ, પસંદગીના કોર્સ અને ભવિષ્યના કરિયર લક્ષ્યોને ધ્યાનમાં રાખવા જોઈએ. જર્મની હોય કે આયર્લેન્ડ, યોગ્ય દેશની પસંદગી ત્યારે જ સફળ સાબિત થઈ શકે જ્યારે ત્યાં મળતું શિક્ષણ, રહેવાનો ખર્ચ અને કરિયરની તકો વિદ્યાર્થીની જરૂરિયાતો સાથે મેળ ખાતી હોય.
