Petrol Diesel LPG Price Hike: દેશમાં સામાન્ય જનતાના માસિક બજેટ પર ફરી એકવાર મોંઘવારીની તલવાર લટકી રહી છે. આંતરરાષ્ટ્રીય બજારમાં બદલાતી આર્થિક પરિસ્થિતિઓ અને ક્રુડ ઓઇલ (Crude Oil)ની કિંમતોમાં થઈ રહેલા ભારે ઉછાળાને કારણે આગામી સમયમાં પેટ્રોલ અને ડીઝલના ભાવમાં વધારો થવાની આશંકા વ્યક્ત કરવામાં આવી રહી છે. એટલું જ નહીં, રસોઈ ગેસ (LPG)ના વધતા ભાવે પણ સામાન્ય માનવીની ચિંતામાં મોટો વધારો કર્યો છે.
આંતરરાષ્ટ્રીય બજારમાં ક્રૂડ ઓઈલની અસ્થિરતા
વૈશ્વિક સ્તરે મિડલ ઈસ્ટ અને અન્ય પ્રમુખ ક્ષેત્રોમાં ચાલી રહેલા તણાવના કારણે ક્રૂડ ઓઈલની કિંમતોમાં અસ્થિરતા જોવા મળી રહી છે. ક્રૂડ ઓઈલના ભાવ ઊંચા સ્તરે જળવાઈ રહેવાને કારણે ભારત જેવા આયાત-નિર્ભર દેશો પર સરકારી તેલ કંપનીઓની ઓપરેટિંગ કોસ્ટ વધી જાય છે. નિષ્ણાતોના મતે, જો વૈશ્વિક બજારમાં આ સ્થિતિ લાંબો સમય ટકી રહે તો રિટેલ બજારમાં પેટ્રોલ અને ડીઝલના ભાવ પર તેની સીધી અસર જોવા મળી શકે છે.
રસોડાના બજેટ પર LPG સિલિન્ડરનો બોજ
વાહન ચલાવવાના ખર્ચની સાથે-સાથે રસોડાનું બજેટ પણ ખોરવાઈ રહ્યું છે. કોમર્શિયલ અને ઘરેલુ એલપીજી સિલિન્ડરના ભાવમાં સમયાંતરે થતા ફેરફારોને કારણે મધ્યમ વર્ગીય પરિવારોની મુશ્કેલીઓ વધી છે. હોટલ, રેસ્ટોરન્ટ અને નાના વેપારીઓ માટે કોમર્શિયલ ગેસના ઊંચા ભાવ પહેલાથી જ ચિંતાનો વિષય બન્યા હતા અને હવે સામાન્ય ગ્રાહકોને પણ રસોઈ ગેસ માટે વધુ ના ચૂકવવા પડે તેવી સ્થિતિ ઊભી થઈ રહી છે.
સામાન્ય જનતા પર શું થશે અસર?
પેટ્રોલ અને ડીઝલના ભાવમાં વધારો થવાનો સીધો અર્થ એ છે કે માલસામાનની હેરફેર (ટ્રાન્સપોર્ટેશન) મોંઘી બનશે. ટ્રાન્સપોર્ટ ખર્ચ વધવાથી શાકભાજી, અનાજ અને રોજિંદા ઉપયોગની તમામ જરૂરિયાતમંદ વસ્તુઓના ભાવમાં પણ વધારો જોવા મળી શકે છે. હાલમાં દેશના અલગ-અલગ શહેરોમાં ઇંધણના ભાવ પહેલેથી જ ઉચ્ચા સ્તરે છે, ત્યારે આ નવું અપડેટ આમ આદમીની ચિંતાઓને વધુ ઘેરી બનાવી રહ્યું છે. સરકાર અને તેલ કંપનીઓ દ્વારા આ અંગે આગામી દિવસોમાં કેવા પગલાં લેવામાં આવે છે તેના પર સૌની નજર ટકેલી છે.