EPFO New Rules 2026: કર્મચારી ભવિષ્ય નિધિ સંગઠન (EPFO) ના આવતા કર્મચારીઓ માટે સરકારે એક મહત્વપૂર્ણ નિર્ણય લીધો છે. નવા નિયમો મુજબ, EPFO હેઠળ આવરી લેવા માટેની મૂળભૂત વેતન (Basic Salary + DA) ની મર્યાદા ₹15,000થી વધારીને ₹25,000 કરવામાં આવી છે. સરકારના આ ઐતિહાસિક નિર્ણયથી ખાનગી ક્ષેત્રના અંદાજે 51 લાખ નવા કર્મચારીઓ સીધા સામાજિક સુરક્ષા કવચ હેઠળ આવશે.
મળશે ત્રણ પ્રમુખ નાણાકીય લાભો
ખાનગી ક્ષેત્રના નોકરીયાતો માટે EPFO નિવૃત્તિ સુરક્ષાની સૌથી ભરોસાપાત્ર યોજના છે. આ નિર્ણયથી કર્મચારીઓને મુખ્યત્વે ત્રણ રીતે લાભ મળશે:
એકમ-રકમ ફંડ: નિવૃત્તિ સમયે EPF ખાતામાં જમા વ્યાજ સહિતની તમામ રકમ એકસાથે મળે છે.
માસિક પેન્શન: પાત્રતા પૂર્ણ થવા પર નિવૃત્તિ પછી માસિક પેન્શન યોજના (EPS) નો લાભ મળે છે.
જીવન વીમા કવચ: EDLI યોજના હેઠળ કર્મચારીને નિઃશુલ્ક જીવન વીમા સુરક્ષા પ્રાપ્ત થાય છે.
નવી વેતન મર્યાદા અને કપાતનું ગણિત
EPFO નિયમ અનુસાર, કર્મચારીના બેઝિક સેલરીમાંથી 12% રકમ EPF માં કાપવામાં આવે છે અને એટલી જ 12% રકમ કંપની રોજગારદાતા ઉમેરે છે. કંપનીના 12% યોગદાનમાંથી 8.33% રકમ પેન્શન ફંડમાં અને 3.67% રકમ EPF ખાતામાં જમા થાય છે. નવા નિયમ હેઠળ ₹25,000 નો મૂળભૂત પગાર ધરાવતા કર્મચારીના ખાતામાંથી દર મહિને ₹3000 ની ફરજિયાત કપાત થશે અને કંપની પણ ₹3000 જમા કરાવશે.
ટેક-હોમ સેલરી અને વધુ પગારદારો પર અસર
આ નિર્ણયથી હાથમાં આવતા પગાર (Take-Home Salary) પર સીધી અસર પડશે. જે કર્મચારીઓની કપાત અગાઉ ₹15,000 ની મર્યાદા આધારિત થતી હતી, તેમની PF કપાત વધવાથી દર મહિને હાથમાં આવતી નેટ સેલરીમાં થોડો ઘટાડો થઈ શકે છે. જોકે, આ રકમ ભવિષ્યની બચતમાં ઉમેરાશે.
જે કર્મચારીઓનો બેઝિક સેલરી ₹40,000 કે ₹50,000 છે અને તેમની કંપનીઓ જો પહેલેથી જ પૂર્ણ વેતન પર 12% PF કાપે છે, તો તેમના પગાર કે નિવૃત્તિ લાભો પર કોઈ નકારાત્મક અસર નહીં પડે.