8th Pay Commission Salary Hike: દેશના લાખો કેન્દ્રીય કર્મચારીઓ અને પેન્શનરો માટે 8મા પગારપંચ (8th Pay Commission) ના અમલીકરણને લઈને ભારે ઉત્સુકતાનો માહોલ જોવા મળી રહ્યો છે. 8મા પગારપંચની રચના અને અમલની દિશામાં પંચની મહત્વપૂર્ણ બેઠકોનો તબક્કો શરૂ થઈ ચૂક્યો છે. કેન્દ્રીય કર્મચારી સંગઠનો દ્વારા પગારમાં આશરે 3 ગણો વધારો કરવાની જોરદાર માંગ કરવામાં આવી રહી છે. જોકે, પંચ દ્વારા હજુ આખરી રિપોર્ટ તૈયાર કરવાનો બાકી છે અને ત્યારબાદ જ કેન્દ્ર સરકારની મંજૂરી મળ્યા પછી નવું સેલરી સ્ટ્રક્ચર જાહેર કરવામાં આવશે.
જાણો કેટલો વધારો થઇ શકે છે?
જો આપણે 7મા પગારપંચના 2.57 ફિટમેન્ટ ફેક્ટર (Fitment Factor) ની ફોર્મ્યુલાને આધાર માનીને ગણતરી કરીએ, તો 8મા પગારપંચમાં વર્ગ-4 (લેવલ-1) થી લઈને ક્લાસ-1 ઓફિસર્સ (લેવલ-10) સુધીના તમામ કર્મચારીઓના મૂળ પગાર (Basic Salary) માં મજબૂત ઉછાળો જોવા મળી શકે છે. ફિટમેન્ટ ફેક્ટર એ એવું ગણિત છે જે જૂના મૂળ પગારને ગુણીને નવો મૂળ પગાર નક્કી કરે છે.
ગ્રેડ-ડી એટલે કે લેવલ-1 ના પટાવાળા અને સફાઈ કર્મચારી જેવા કર્મચારીઓની હાલની ન્યૂનતમ બેઝિક સેલરી ₹18,000 છે. જો 8મા પગારપંચમાં પણ 2.57 ફિટમેન્ટ ફેક્ટર લાગુ કરવામાં આવે, તો આ મૂળ પગાર સીધો વધીને ₹46,260 થઈ જશે. આ બેઝિક સેલરી પર મોંઘવારી ભથ્થું (DA), મકાન ભાડા ભથ્થું (HRA) અને ટ્રાન્સપોર્ટ ભથ્થું (TA) જેવા અન્ય ભથ્થાં અલગથી ઉમેરવામાં આવશે, જેનાથી હાથમાં આવતો કુલ પગાર ઘણો વધારે હશે.
બીજી તરફ, 7મા પગારપંચ હેઠળ લેવલ-6 માં આવતા પ્રાથમિક અથવા TGT શિક્ષકોનો વર્તમાન મૂળ પગાર ₹35,400 છે. 2.57 ના ફિટમેન્ટ ફેક્ટર સાથે આ બેઝિક સેલરી વધીને આશરે ₹90,978 સુધી પહોંચી શકે છે. એટલે કે શિક્ષકોનો મૂળ પગાર જ 91 હજાર રૂપિયાની નજીક પહોંચી જશે. ભથ્થાં ઉમેરાયા બાદ શિક્ષકોનો ટેક-હોમ પગાર 1 લાખ રૂપિયાને વટાવી જવાની પૂરી શક્યતા છે.
ઉચ્ચ અધિકારીઓ એટલે કે લેવલ-10 ના ક્લાસ-1 ઓફિસર્સના વર્તમાન બેઝિક પેની વાત કરીએ તો તે હાલ ₹56,100 છે. નવી ફોર્મ્યુલા મુજબ 2.57 ફિટમેન્ટ ફેક્ટર લાગુ થતાં તેમનો મૂળ પગાર વધીને સીધો ₹1,44,177 થઈ શકે છે. ભથ્થાં ઉમેરાયા બાદ તેમનો કુલ પગારનો આંકડો અત્યંત મોટો અને આકર્ષક બનશે.
આ પગારપંચથી માત્ર નોકરીરત કેન્દ્રીય કર્મચારીઓ જ નહીં પરંતુ નિવૃત્ત પેન્શનરોને પણ બમ્પર લાભ મળશે. જો કોઈ નિવૃત્ત કર્મચારીનું લઘુત્તમ પેન્શન હાલ ₹9,000 હોય, તો 2.57 ફિટમેન્ટ ફેક્ટરની ગણતરી મુજબ તે વધીને સીધું ₹23,130 થઈ શકે છે. આ ગણતરીથી સ્પષ્ટ થાય છે કે 8મું પગારપંચ કર્મચારીઓના આર્થિક સ્તરમાં મોટો સકારાત્મક ફેરફાર લાવશે.