8th Pay Commission: કેન્દ્રીય કર્મચારીઓ અને પેન્શનરો માટે આગામી 8મા પગાર પંચ (8th Pay Commission) અંગે મોટા સમાચાર સામે આવ્યા છે. આ જ અઠવાડિયે 7 અને 8 ઓક્ટોબર, 2026ના રોજ બેંગલુરુ ખાતે પગાર પંચની એક અત્યંત મહત્વપૂર્ણ બેઠક યોજાવા જઈ રહી છે. આ બેઠકમાં પંચના હોદ્દેદારો વિવિધ સરકારી કર્મચારી સંગઠનો અને પેન્શનર એસોસિએશનો સાથે તેમના પગાર, ભથ્થાં અને સેવાઓ સંબંધિત મુદ્દાઓ પર વિગતવાર ચર્ચા કરશે. નોંધનીય છે કે, આ બેઠકમાં માત્ર એ જ હિતધારકો ભાગ લઈ શકશે જેમણે 18 સપ્ટેમ્બર સુધીમાં ‘યુનિક મેમો ID’ મેળવી લીધું હતું.
બેંગલુરુ બેઠકનો મુખ્ય એજન્ડા અને માંગણીઓ
આ પણ વાંચો
બેંગલુરુ ખાતે યોજાનારી આ બેઠક દરમિયાન કર્મચારી પ્રતિનિધિઓ પગાર પંચ સમક્ષ પોતાની મુખ્ય માંગણીઓ, પડકારો અને ભવિષ્યની જરૂરિયાતો રજૂ કરશે. ચર્ચાના કેન્દ્રમાં મુખ્યત્વે ફિટમેન્ટ ફેક્ટર (Fitment Factor), મોંઘવારી ભથ્થું (DA), ઘર ભાડા ભથ્થું (HRA) અને પેન્શન સુધારણા જેવા મહત્વપૂર્ણ વિષયો રહેશે. આ ઉપરાંત પેન્શનરો માટેના નિવૃત્તિ લાભોમાં વધારો કરવાની રજૂઆતો પણ હાથ ધરવામાં આવશે.
ફિટમેન્ટ ફેક્ટર 4 કરવાની માંગ: ન્યૂનતમ પગાર ₹72,000 થઈ શકે
કેન્દ્રીય કર્મચારી સંગઠનોએ પંચ સમક્ષ ફિટમેન્ટ ફેક્ટર વધારીને 4.0 કરવાની જોરદાર રજૂઆત કરી છે. જો કમિશન દ્વારા ફિટમેન્ટ ફેક્ટર 4 નક્કી કરવામાં આવે, તો કર્મચારીઓનો પ્રારંભિક મૂળ પગાર (Basic Pay) હાલના ₹18,000 થી સીધો વધીને ₹72,000 થઈ શકે છે. ઉલ્લેખનીય છે કે, 6ઠ્ઠા પગાર પંચમાં ફિટમેન્ટ ફેક્ટર 1.86 હતું, જ્યારે 7મા પગાર પંચમાં તેને વધારીને 2.57 કરવામાં આવ્યું હતું. જો આ વખતે 4 નું ફિટમેન્ટ ફેક્ટર મંજૂર થાય છે, તો કર્મચારીઓના વેતનમાં મોટો ઉછાળો જોવા મળશે.
મોંઘવારી ભથ્થા (DA) અંગે અનોખી ફોર્મ્યુલાની માંગ
હાલમાં કેન્દ્ર સરકારના કર્મચારીઓ માટે મોંઘવારી ભથ્થું (DA) 60 ટકાના સ્તરે પહોંચી ગયું છે. આ અંગે પણ કર્મચારી સંગઠનોએ નવી દલીલો રજૂ કરી છે:
- વર્ષમાં 4 વખત DA વધારો: હાલમાં વર્ષમાં બે વાર (જાન્યુઆરી અને જુલાઈ) DA વધારવામાં આવે છે, પરંતુ નાણાકીય બોજ અને મોંઘવારીને ધ્યાને રાખીને તેને વર્ષમાં ચાર વખત સુધારવાની માંગ કરાઈ છે.
- બેઝિક પે માં વિલીનીકરણ: જ્યારે પણ DA 25 ટકાના સ્તરે પહોંચે, ત્યારે તેને મૂળ પગાર સાથે ભેળવી દેવાની નીતિ બનાવવાની માગ કરવામાં આવી છે, જે જોગવાઈ હાલના નિયમોમાં અસ્તિત્વમાં નથી.
મુંબઈમાં પણ બેઠકનું આયોજન
દિલ્હી, લખનૌ અને બેંગલુરુ બાદ પગાર પંચ આ જ મહિને મુંબઈ ખાતે પણ બેઠક યોજશે. મુંબઈમાં 22 અને 23 ઓક્ટોબર, 2026ના રોજ સત્ર નિર્ધારિત કરાયું છે, જેના માટે હિતધારકોએ 10 ઓક્ટોબર સુધીમાં ‘યુનિક મેમો ID’ મેળવવું ફરજિયાત રહેશે. 8મા પગાર પંચના આ ક્રમિક આયોજનોથી દેશના લાખો કેન્દ્રીય કર્મચારીઓ અને પેન્શનરોમાં મોટી આશાઓ જાગી છે.