8th Pay Commission News: 8મા પગાર પંચ (8th Pay Commission) ની રચના અને અમલીકરણ અંગે ચાલી રહેલી ચર્ચાઓ વચ્ચે કેન્દ્ર સરકારના લાખો કર્મચારીઓના બોનસને લઈને એક નવો મોટો વિવાદ ઊભો થયો છે. આગામી તહેવારોની મોસમ પહેલાં કેન્દ્ર સરકાર તેના કર્મચારીઓને ₹7,000 ની જૂની ટોચમર્યાદાના આધારે બોનસ આપવાની તૈયારી કરી રહી છે, જેનો કર્મચારી સંગઠનો દ્વારા સખત વિરોધ કરવામાં આવી રહ્યો છે.
સરકારી ગેઝેટ નોટિફિકેશનથી જાગી અપેક્ષાઓ
શ્રમ અને રોજગાર મંત્રાલય દ્વારા જારી કરાયેલા તાજેતરના ગેઝેટ નોટિફિકેશનમાં 'વેતન સંહિતા, 2019' ની કલમ 26 નો ઉલ્લેખ કરવામાં આવ્યો છે. આ નિયમ મુજબ, જો કોઈ કર્મચારીનો માસિક પગાર ₹7,000 થી વધુ હોય, તો તેના બોનસની ગણતરી ₹7,000 અથવા સરકાર દ્વારા નિર્ધારિત લઘુત્તમ વેતનના આધારે થવી જોઈએ. આ ખુલાસા બાદ કર્મચારી મંડળોએ બોનસની સીલિંગ લિમિટ વધારવા મોરચો માંડ્યો છે.
NC-JCM એ કેબિનેટ સચિવને લખ્યો પત્ર
રાષ્ટ્રીય પરિષદ NC-JCM ના સચિવ શિવ ગોપાલ મિશ્રાએ કેબિનેટ સચિવને પત્ર પાઠવીને માંગ કરી છે કે જ્યારે કેન્દ્ર સરકારનું સત્તાવાર લઘુત્તમ વેતન ₹21,000 છે, ત્યારે બોનસ ગણતરી માટે ₹7,000 ની જૂની મર્યાદા રાખવી તર્કસંગત નથી. તેમણે આ મર્યાદા તાત્કાલિક વધારીને ₹21,000 કરવાની રજૂઆત કરી છે.
લઘુત્તમ વેતન ₹18,000 તો બોનસ ₹17,763 કેમ નહીં?
ઓલ ઈન્ડિયા NPS એમ્પ્લોયીઝ ફેડરેશનના રાષ્ટ્રીય પ્રમુખ ડૉ. મનજીત સિંહ પટેલે ગણિત સ્પષ્ટ કરતાં જણાવ્યું હતું કે, કેન્દ્રીય કર્મચારીઓનો વર્તમાન લઘુત્તમ મૂળ પગાર ₹18,000 છે. જો સ્થાપિત સૂત્ર (₹18,000 × 30 ÷ 30.4) મુજબ ગણતરી કરવામાં આવે, તો બોનસની રકમ ઓછામાં ઓછી ₹17,763 થવી જોઈએ. સરકાર પોતે ₹18,000 ને લઘુત્તમ વેતન તરીકે સ્વીકારતી હોવા છતાં ગણતરી વખતે ₹7,000 ની મર્યાદા રાખવી એ કર્મચારીઓ સાથે સીધો અન્યાય છે.
8મા પગાર પંચમાં ₹27,694 બોનસની માંગ
ફેડરેશને આગામી 8મા પગાર પંચ હેઠળ બોનસ વધારીને ₹27,694 કરવાની સત્તાવાર અપીલ કરી છે. દશેરા અને દિવાળી જેવા મોટા તહેવારો નજીક આવી રહ્યા છે ત્યારે હવે સૌની નજર સરકારના નિર્ણય પર મંડાયેલી છે. કર્મચારીઓને આશા છે કે સરકાર જૂના ધોરણો બદલીને વાજબી રાહત આપશે.