Mehli Mistry Tata Trusts Exit: ટાટા ગ્રૂપમાંથી મેહલી મિસ્ત્રીને દૂર કરવાની તૈયારીઓ ચાલી રહી છે. સર દોરાબજી ટાટા ટ્રસ્ટ (SDTT) અને સર રતન ટાટા ટ્રસ્ટ (SRTT) ના બોર્ડરૂમમાંથી તેમને બહાર કાઢવા માટે ખુદ ટાટા ગ્રૂપના ચેરમેન નોએલ ટાટાએ તેમની વિરુદ્ધ વોટિંગ કર્યું છે. આ ઘટના રતન ટાટાના નિધન પછી બરાબર એક વર્ષ બાદ બની રહી છે. ચાલો જાણીએ શું છે આ વિવાદ અને રતન ટાટાના સૌથી નજીકના ગણાતા મેહલી મિસ્ત્રી સાથે ટ્રસ્ટને શું વાંધો પડ્યો....
પરિવાર વિરુદ્ધ જઈને રતન ટાટાને ટેકો આપ્યો
મેહલી મિસ્ત્રીની ગણતરી રતન ટાટાના સૌથી વિશ્વાસપાત્ર અને નજીકના વ્યક્તિમાં થતી હતી. વર્ષ 2016માં જ્યારે રતન ટાટા અને ટાટા ગ્રૂપના ચેરમેન સાયરસ મિસ્ત્રી વચ્ચે વિવાદ થયો હતો, ત્યારે મેહલી મિસ્ત્રી માટે આ એક મોટું ધર્મ-સંકટ હતું. એક તરફ તેમનો પરિવાર હતો એટલે કે સાયરસ મિસ્ત્રી તેમના પિતરાઈ ભાઈ હતા અને બીજી તરફ તેમના મિત્ર અને મેન્ટર રતન ટાટા હતા. જો કે આ વિવાદમાં મેહલી મિસ્ત્રીએ રતન ટાટાનો મજબૂત સાથ આપ્યો.
રતન ટાટા અને મેહલી મિસ્ત્રી વચ્ચે ગાઢ સંબંધો
સાયરસ પી. મિસ્ત્રીને ટાટા ગ્રૂપના ચેરમેન પદ પરથી હટાવવાના નિર્ણયમાં પણ મેહલી મિસ્ત્રી રતન ટાટાના મજબૂત સમર્થક બન્યા હતા. ભલે તેમના પર એવા આરોપો લાગ્યા કે રતન ટાટાએ તેમની કંપનીને ફાયદો પહોંચાડ્યો, તેમ છતાં તેમણે પોતાનો નિર્ણય બદલ્યો નહીં અને તેના કારણે રતન ટાટા સાથે તેમની મિત્રતા વધુ મજબૂત બની.
રતન ટાટાએ આ મિત્રતાના બદલામાં મેહલી મિસ્ત્રીને ગ્રુપના બે નિર્ણાયક ટ્રસ્ટોમાં સામેલ કરવાની ભલામણ કરી હતી. વર્ષ 2022માં મેહલી મિસ્ત્રીને પહેલીવાર સર દોરાબજી ટાટા ટ્રસ્ટ (SDTT) અને સર રતન ટાટા ટ્રસ્ટ (SRTT) માં સામેલ કરવામાં આવ્યા હતા. આ બંને ટ્રસ્ટ ટાટા સન્સમાં 66 ટકા હિસ્સો નિયંત્રિત કરે છે, જે ટાટા સમૂહની હોલ્ડિંગ કંપની છે.
રતન ટાટા સાથે મેહલીના સંબંધો ખૂબ મજબૂત હતા. તેમની પ્રથમ મુલાકાત ત્યારે થઈ હતી જ્યારે મેહલી માત્ર 10 વર્ષના હતા અને રતન ટાટા તેમના પરિવારના એપાર્ટમેન્ટ કોમ્પ્લેક્સમાં રહેતા હતા. ત્યારથી તેઓ અવારનવાર સાથે ટ્રાવેલ કરતા જોવા મળતા હતા.
શું છે ટાટા ટ્રસ્ટનો આંતરિક વિવાદ
સપ્ટેમ્બરમાં મેહલી મિસ્ત્રીના નેતૃત્વમાં 4 ટ્રસ્ટીઓના જૂથે ટાટા સન્સના બોર્ડમાં વિજય સિંહની પુનઃનિયુક્તિનો વિરોધ કર્યો હતો. આ નિર્ણયે ટાટા ટ્રસ્ટ્સની અંદર પહેલીવાર મોટો મતભેદ જાહેર કર્યો હતો. નોએલ ટાટા અને વીણુ શ્રીનિવાસને વિજય સિંહને ટેકો આપ્યો હતો, પરંતુ નિયમોને કારણે તેમનું સમર્થન ન મળ્યું અને વિજય સિંહે ટાટા સન્સ બોર્ડમાંથી રાજીનામું આપ્યું હતું. હવે આ ઘટનાના એક મહિના પછી મેહલી મિસ્ત્રીના ટ્રસ્ટીશિપ પર જોખમ તોળાઈ રહ્યું છે અને ટ્રસ્ટમાંથી તેમની વિદાય લગભગ નક્કી માનવામાં આવે છે.
ટાટા ટ્રસ્ટમાંથી મેહલી મિસ્ત્રીને બહાર કરવા માટે ટાટા ગ્રુપના ચેરમેન નોએલ ટાટાએ તેમની વિરુદ્ધમાં મત આપ્યો છે. તેમની સાથે ટીવીએસ સમૂહના પ્રમુખ વેણુ શ્રીનિવાસન અને પૂર્વ રક્ષા સચિવ વિજય સિંહએ પણ મત આપ્યો છે. મેહલી મિસ્ત્રી માટે આ મોટો ઝટકો માનવામાં આવે છે કારણ કે રતન ટાટાના નિધન બાદ જ્યારે ટાટા ગ્રુપના ચેરમેનની દાવેદારીની લાઇનમાં તેમનું નામ ચાલતું હતું, ત્યારે તેમણે નોએલ ટાટાને આ પદ માટે સમર્થન આપ્યું હતું. અને આજે તે જ નોએલ ટાટા તેમને બે મોટા ટ્રસ્ટમાંથી બહાર કરી રહ્યા છે.
મેહલી મિસ્ત્રી કોણ છે?
નામ પરથી સ્પષ્ટ છે કે મેહલી મિસ્ત્રી શાપૂરજી પલોનજી પરિવાર સાથે સંબંધ ધરાવે છે. આ પરિવાર દાયકાઓથી ટાટા સમૂહમાં એક મોટા શેરધારક તરીકે જાણીતો છે. મેહલી મિસ્ત્રી દિવંગત સાયરસ મિસ્ત્રી અને શાપૂરજી મિસ્ત્રીના પિતરાઈ ભાઈ છે. મેહલી અને સાયરસ મિસ્ત્રીની માતાઓ સગી બહેનો હતી.
મેહલી મિસ્ત્રી નાના છતાં સ્થિર બિઝનેસ સમૂહ એમ. પલોનજી ગ્રુપ ઓફ કંપનીઝ સાથે જોડાયેલા છે. આ ગ્રુપ પેઇન્ટિંગ, ડ્રેજિંગ, લોજિસ્ટિક્સ સોલ્યુશન્સ, શિપિંગ, ફાઇનાન્સ, રોકાણ, જીવન વીમા અને ઓટોમોબાઇલ ડીલરશિપ જેવા અનેક પ્રકારના વ્યવસાયો કરે છે. એમ. પલોનજી એન્ડ કંપની આ સમૂહની મુખ્ય કંપની છે, જેમાં મેહલી મિસ્ત્રી ડાયરેક્ટર છે.