Gold-Silver Price Drop: છેલ્લા કેટલાક દિવસોમાં ગુજરાત સહિત ભારતભરના વિવિધ બજારોમાં સોના અને ચાંદીના ભાવમાં નોંધપાત્ર ઘટાડો થઈ રહ્યો છે, જે ગ્રાહકો માટે રાહતના સમાચાર સાબિત થયા છે. લગ્નની સિઝન શરૂ થવાની છે ત્યારે સોના-ચાંદીના નીચા ભાવે ખરીદી કરવાની તક ઊભી થઈ છે. સોના-ચાંદીના ભાવમાં ઘટાડા પાછળનું કારણ શું છે અને આગામી સમયમાં સ્થિતિ શું રહેશે? જાણો વેપારીઓનો મત Gujarati Jagran ના અહેવાલમાં.
રાજકોટ અને સુરતના જેમ્સ એન્ડ જ્વેલરી ક્ષેત્રના મોટા વેપારી અને અગ્રણીઓના જણાવ્યા અનુસાર, આંતરરાષ્ટ્રીય બજારની સ્થિતિ અને US ડોલરમાં આવેલા ઘટાડાને કારણે કિંમતોમાં ઘટાડો નોંધાયો છે. બીજી તરફ, સોનાની ખરીદી ઓછી કરવા અંગે વડાપ્રધાન મોદીની અપીલ બાદ બજારમાં વેચાણના વોલ્યુમમાં 30%થી 35% સુધીનો ઘટાડો થયાનો પણ વેપારીઓએ દાવો કર્યો છે.
સોના-ચાંદીના ભાવમાં ઘટાડાનું કારણ શું?
સોના અને ચાંદીના ભાવમાં આવેલા ઘટાડા અંગે રાજકોટ ખાતે આવેલા રાધિકા જ્વેલર્સના માલિક મુકેશના જણાવ્યા અનુસાર, સોના અને ચાંદીની કિંમતોમાં થયેલો ઘટાડો સ્થાનિક બજારના પરિબળોને કારણે નહીં, પરંતુ આંતરરાષ્ટ્રીય બજારની સ્થિતિનું પરિણામ છે.
તેમના જણાવ્યા પ્રમાણે, US ડોલરમાં થયેલા ઘટાડાને કારણે સોના-ચાંદીના ભાવમાં થોડો ઘટાડો જોવા મળ્યો છે. હાલ બજારમાં સ્થિતિ સામાન્ય રીતે સ્થિર થઈ રહી છે. હાલમાં 22 કેરેટ સોનાનો ભાવ આશરે ₹1,15,000 આસપાસ ટ્રેડ થઈ રહ્યો છે, જે ગયા વર્ષની સરખામણીમાં લગભગ 10% જેટલો ઓછો છે.
લગ્નની સિઝન પહેલા સોનું ખરીદવાની મોટી તક
આગામી ડિસેમ્બર (December) અને જાન્યુઆરી (January) મહિનામાં લગ્નની સિઝન શરૂ થવાની છે. આ સમયગાળા દરમિયાન સોના-ચાંદીના દાગીનાની ખરીદીમાં વધારો થતો હોય છે. રાધિકા જ્વેલર્સના માલિક મુકેશભાઈના મતે, હાલ સોના અને ચાંદીના ભાવમાં નોંધપાત્ર ઘટાડો થયો છે. તેથી લગ્નની ખરીદી કરવાનું આયોજન કરી રહેલા ગ્રાહકો માટે સારો સમય છે.
તેમણે એવો મત વ્યક્ત કર્યો હતો કે હાલની સ્થિતિમાં ભાવ વધુ ઘટવાની શક્યતા ઓછી છે અને કિંમતો ધીમે-ધીમે સ્થિર થઈ રહી છે. જેથી ગ્રાહકો લગ્નની સિઝનને ધ્યાનમાં રાખીને ખરીદી કરી શકે છે.
સોનું ₹1.35 લાખ અને ચાંદી ₹1.60 લાખ રેન્જમાં
સુરતના જેમ્સ એન્ડ જ્વેલરી ક્ષેત્રના ઝોનલ ચેરમેન દીપક ચોક્સીના જણાવ્યા અનુસાર, સોના અને ચાંદીના ભાવમાં મોટો ઘટાડો નોંધાયો છે. એક સમયે સોનાનો ભાવ 2 લાખ સુધી પહોંચી ગયો હતો, જે ઘટીને હવે ₹1,35,000 પર આવી ગયો છે. તેવી જ રીતે, ચાંદીનો ભાવ પણ એક સમયે 4 લાખ હતો, જે ઘટીને હાલ ₹1,60,000થી ₹1,70,000 રેન્જમાં આવી ગયો છે.
આગામી લગ્નપ્રસંગો અને ઉત્સવોને ધ્યાનમાં રાખીને લોકો હાલના ભાવનો લાભ લઈ ખરીદી કરી રહ્યા છે. લાંબા સમયની મંદી બાદ ભાવમાં આવેલા ઘટાડાથી જ્વેલરીના વેપારમાં સકારાત્મક વાતાવરણ સર્જાયું છે અને વેપારીઓમાં નવી આશા જાગી છે.
PM મોદીની અપીલથી સોનાની ખરીદી ઘટી?
દીપક ચોક્સીએ સોનાના બજારની સ્થિતિ અંગે વધુમાં જણાવ્યું હતું કે, વડાપ્રધાન મોદીએ સોનાની આયાતને કારણે દેશની વિદેશી હૂંડિયામણ અનામત (Foreign Exchange Reserves) પર પડતી અસર અંગે બે વાર ચિંતા વ્યક્ત કરી હતી. વડાપ્રધાન મોદીએ લોકોને સોનાની ખરીદી ઘટાડવા માટે અપીલ કરી હતી.
શરૂઆતમાં ઓછી ખરીદી કરવા અને ત્યારબાદ માત્ર જરૂરિયાત પૂરતું જ સોનું ખરીદવા અંગે લોકોને અપીલ કરવામાં આવી હતી. વેપારીના જણાવ્યા અનુસાર, વડાપ્રધાનની આ અપીલ બાદ ભારતીય બજારમાં સોનાની ખરીદીમાં નોંધપાત્ર ઘટાડો જોવા મળ્યો હતો. તેની સીધી અસર જ્વેલરીના વેપાર પર પડી હતી.
જ્વેલરીના વેચાણમાં 35% સુધીનો ઘટાડો
દીપક ચોક્સીના જણાવ્યા અનુસાર, સોનાની ખરીદી ઘટાડવાની અપીલ બાદ બજારમાં વેચાણના વોલ્યુમમાં અંદાજે 30% થી 35% સુધીનો ઘટાડો નોંધાયો હતો. લોકોએ વડાપ્રધાન મોદીની અપીલને ધ્યાનમાં રાખીને સોનાની ખરીદીમાં ઘટાડો કરતાં વેપાર પર સીધી અસર થઈ હતી.
જ્વેલર્સના જણાવ્યા અનુસાર, આ સ્થિતિને કારણે બજારમાં કિંમતોમાં પણ મોટો ઘટાડો જોવા મળ્યો છે. વેપારીઓએ આ અપીલને પગલે સોનાની ખરીદીમાં આવેલા ઘટાડા અંગે વડાપ્રધાનનો આભાર પણ વ્યક્ત કર્યો હતો.
લગ્નસિઝન પહેલા ગ્રાહકોની ભાવ પર નજર
સોના-ચાંદીના ભાવમાં આવેલા ઘટાડાથી એક તરફ લગ્નની ખરીદી કરનારા ગ્રાહકોને રાહત મળી છે. બીજી તરફ જ્વેલરીના વેપારીઓમાં પણ વેપાર વધવાની આશા જાગી છે. લગ્નની સિઝન પહેલા ગ્રાહકો ખરીદી તરફ વળી રહ્યા છે. જોકે, સોના-ચાંદીના ભાવમાં આગળ શું ફેરફાર થાય છે તે આંતરરાષ્ટ્રીય બજારની સ્થિતિ અને અન્ય પરિબળો પર નિર્ભર રહેશે.
ગુજરાતમાં આજે સોનાનો ભાવ | Gold Rate in Gujarat
અમદાવાદ, સુરત, વડોદરા અને રાજકોટ જેવા મુખ્ય શહેરો સહિત ગુજરાતના વિવિધ બજારોમાં આજે 24 કેરેટ સોનાનો ભાવ ₹1,22,450 પ્રતિ 10 ગ્રામ છે. જ્યારે 22 કેરેટ સોનાની કિંમત ₹1,12,246 પ્રતિ 10 ગ્રામ નોંધાઈ છે.
ભારતમાં આજે ચાંદીનો ભાવ | Silver Rates in India
સોનાની સાથે ચાંદીના ભાવમાં પણ ઘટાડો જોવા મળી રહ્યો છે. શનિવાર, 21 નવેમ્બર 2026ના રોજ સવારે 08:00 વાગ્યે ભારતમાં ચાંદીનો ભાવ ₹1,49,590 પ્રતિ કિલોગ્રામ નોંધાયો છે.
