Anil Ambani : અગ્રણી ઉદ્યોગતિ અનિલ અંબાણી(Anil Ambani) ગ્રુપની કંપની રિલાયન્સ ઇન્ફ્રાસ્ટ્રક્ચર(Reliance Infrastructure) સામે ચાલી રહેલી ફોરેન એક્સચેન્જ મેનેજમેન્ટ એક્ટ (FEMA) તપાસના ભાગ રૂપે એન્ફોર્સમેન્ટ ડિરેક્ટોરેટ (ED) એ મંગળવારે મહારાષ્ટ્ર અને મધ્યપ્રદેશમાં દરોડા પાડ્યા હતા.
મુંબઈ અને ઈન્દોરમાં મહુમાં ઓછામાં ઓછા 6 પરિસરમાં દરોડા પાડવામાં આવ્યા હતા. ED ટીમોએ મહુમાં પાથ ઇન્ડિયા ગ્રુપના મુખ્ય મથક અને તેના ડિરેક્ટરોના નિવાસસ્થાનોની પણ તપાસ કરી હતી.
તપાસકર્તાઓના મતે રિલાયન્સ ગ્રુપ કંપનીઓ અને પાથ ઈન્ડિયા ગ્રુપ વચ્ચે વિવિધ બાંધકામ પ્રોજેક્ટ્સ માટે કરારો પર હસ્તાક્ષર કરવામાં આવ્યા હતા, જેમાં મોટી રકમનો ખર્ચ થઈ શકે છે. રોઇટર્સના અહેવાલ મુજબ રિલાયન્સ ઇન્ફ્રાસ્ટ્રક્ચરે તેના જવાબમાં જણાવ્યું હતું કે તેના કેટલાક પરિસરમાં ED દ્વારા કરવામાં આવેલી તપાસ વર્ષ 2010માં રાજસ્થાનમાં ટોલ રોડ પ્રોજેક્ટ્સ અને અન્ય સાહસો માટેના કરાર સાથે સંબંધિત હતી અને તેનો FEMA તપાસ સાથે કોઈ સંબંધ ન હતો.
વિદેશમાં ગેરકાયદેસર નાણાં ટ્રાન્સફરના આરોપો
અત્યારે ED સૂત્રોએ જણાવ્યું હતું કે આ દરોડા રિલાયન્સ ઈન્ફ્રાસ્ટ્રક્ચર સામે વિદેશમાં ગેરકાયદેસર નાણાં ટ્રાન્સફરના આરોપો પર ચાલી રહેલી FEMA તપાસનો એક ભાગ છે. ED પહેલાથી જ પ્રિવેન્શન ઓફ મની લોન્ડરિંગ એક્ટ (PMLA) ની ફોજદારી જોગવાઈઓ હેઠળ રિલાયન્સ ઈન્ફ્રાસ્ટ્રક્ચર સહિત અનેક ગ્રુપ કંપનીઓ દ્વારા કથિત નાણાકીય અનિયમિતતાઓ અને ₹17,000 કરોડથી વધુના સામૂહિક લોન ડાયવર્ઝનની તપાસ કરી રહી છે.
PMLA હેઠળ EDની કાર્યવાહી SEBIના એક અહેવાલ બાદ થઈ છે જેમાં આરોપ મૂકવામાં આવ્યો છે કે રિલાયન્સ ઇન્ફ્રાસ્ટ્રક્ચરે CLE નામની કંપની દ્વારા રિલાયન્સ ગ્રુપ કંપનીઓમાં ઇન્ટર-કોર્પોરેટ ડિપોઝિટ (ICD)ના રૂપમાં ગેરકાયદેસર રીતે ભંડોળ ડાયવર્ટ કર્યું હતું. તેણે એવો પણ આરોપ લગાવ્યો હતો કે રિલાયન્સ ઇન્ફ્રાસ્ટ્રક્ચરે શેરધારકો અને ઓડિટ પેનલની મંજૂરી ટાળવા માટે CLE ને તેના "સંબંધિત પક્ષ" તરીકે જાહેર કર્યું ન હતું.
જોકે, રિલાયન્સ ગ્રુપે અગાઉ કોઈપણ ખોટા કામનો ઇનકાર કર્યો હતો. કંપની દ્વારા જારી કરાયેલા એક નિવેદનમાં કહેવામાં આવ્યું હતું કે ₹10,000 કરોડનું કથિત ટ્રાન્સફર એક અજાણ્યા પક્ષને લગભગ 10 વર્ષ જૂનું મામલો છે અને કંપનીએ તેના નાણાકીય નિવેદનોમાં જણાવ્યું હતું કે તેનું દેવું ફક્ત ₹6,500 કરોડ હતું. રિલાયન્સ ઇન્ફ્રાસ્ટ્રક્ચરે લગભગ છ મહિના પહેલા 9 ફેબ્રુઆરીના રોજ આ બાબતનો જાહેરમાં ખુલાસો કર્યો હતો.