Ganesh Chaturthi 2026 Date Gujarat: ગણેશોત્સવ એટલે ભગવાન શ્રી ગણેશની ભક્તિ, શ્રદ્ધા અને આરાધનાનો મહાપર્વ. સમગ્ર ભારતભરમાં અને ખાસ કરીને મહારાષ્ટ્ર તથા ગુજરાતમાં આ તહેવાર અનોખા ઉત્સાહ સાથે ઉજવવામાં આવે છે. ભાદરવા મહિનાના શુક્લ પક્ષની ચતુર્થીથી શરૂ થતા આ 10 દિવસીય ઉત્સવમાં ભક્તો પોતાના ઘરે અને પંડ્યાલોમાં વિધિ-વિધાનપૂર્વક ગણપતિ બાપ્પાની મૂર્તિની સ્થાપના કરે છે. જો તમે પણ ઘરે બાપ્પાને બિરાજમાન કરવા જઈ રહ્યા છો, તો વર્ષ 2026 માં ગણેશ ચતુર્થીની ચોક્કસ તારીખ, મૂર્તિ સ્થાપનાનું શ્રેષ્ઠ મુહૂર્ત અને પૂજા વિધિ વિશે આ લેખમાં સંપૂર્ણ જાણકારી મેળવી લો.
ગણેશ ચતુર્થી 2026 તારીખ અને શુભ મુહૂર્ત
આ પણ વાંચો
હિંદુ પંચાંગ અનુસાર, વર્ષ 2026 માં ભાદરવા સુદ ચોથની તિથિનો પ્રારંભ 14 સપ્ટેમ્બરના રોજ સવારે 7 વાગ્યે 6 મિનિટે થશે. આ તિથિનું સમાપન 15 સપ્ટેમ્બરની સવારે 7 વાગ્યે 44 મિનિટે થશે. ઉદયાતિથિ (સૂર્યોદય સમયની તિથિ) ની માન્યતા અનુસાર, આ વર્ષે ગણેશ ચતુર્થીનું પાવન પર્વ 14 સપ્ટેમ્બર 2026, સોમવારના રોજ ઉજવવામાં આવશે.
પૌરાણિક માન્યતાઓ અનુસાર, ભગવાન ગણેશનો જન્મ મધ્યાહ્ન એટલે કે બપોરના સમયે થયો હોવાથી બાપ્પાની મૂર્તિની સ્થાપના પણ મધ્યાહ્ન કાળમાં કરવી સૌથી ઉત્તમ અને ફળદાયી માનવામાં આવે છે. 14 સપ્ટેમ્બર 2026ના રોજ મધ્યાહ્ન પૂજા મુહૂર્ત સવારે 11:20 વાગ્યાથી બપોરે 1:48 વાગ્યા સુધી રહેશે, જેનો કુલ સમયગાળો 2 કલાક અને 27 મિનિટનો છે.
ઘરે ગણેશજીની પૂજા માટેની સરળ વિધિ શું છે?
- ગણેશ ચતુર્થીના દિવસે વહેલી સવારે સ્નાન કરી સ્વચ્છ વસ્ત્રો ધારણ કરો.
- ઘરના ઈશાન ખૂણા અથવા પૂર્વ દિશામાં એક લાકડાની પાટલી મૂકી તેના પર લાલ કે પીળું વસ્ત્ર પાથરો.
- ચોખા (અક્ષત) વડે અષ્ટદલ કમળ બનાવી, તેના પર ગણેશજીની નવી પ્રતિમાની સ્થાપના કરો.
- મૂર્તિ સ્થાપિત કરતી વખતે તમારું મુખ પૂર્વ અથવા ઉત્તર દિશા તરફ હોવું જોઈએ.
- હાથમાં જળ, અક્ષત અને પુષ્પ લઈ વ્રત તથા પૂજાનો સંકલ્પ કરો અને 'ૐ ગં ગણપતયે નમઃ' મંત્રના ઉચ્ચારણ સાથે બાપ્પાનું આહ્વાન કરો.
- મૂર્તિ પર પ્રતીકાત્મક રૂપે જળ અને પંચામૃતના છાંટા આપો.
- ત્યારબાદ બાપ્પાને રોળી, ચંદન, અક્ષત, જનોઈ, લાલ વસ્ત્ર અને તાજા ફૂલ અર્પણ કરો.
- ગણેશજીને 21 દૂર્વાની જોડી અર્પણ કરો. ખાસ ધ્યાન રાખો કે દૂર્વા હંમેશા તેમના મસ્તક પર ચઢાવવી, ચરણોમાં નહીં.
- બાપ્પાના પ્રિય એવા 21 મોદક અથવા લાડુ તેમજ ફળોનો ભોગ ધરાવો.
- અંતમાં ધૂપ-દીપ પ્રગટાવી આરતી કરો અને પૂજા દરમિયાન અજાણતાં થયેલી કોઈપણ ભૂલચૂક માટે ક્ષમાયાચના કરો.
ગણપતિ બાપ્પાનું વિસર્જન ક્યારે થશે?
14 સપ્ટેમ્બરે સ્થાપના સાથે શરૂ થતો આ 10 દિવસીય ભક્તિમય ઉત્સવ અનંત ચતુર્દશીના દિવસે પૂર્ણ થશે. પંચાંગ અનુસાર, 10 દિવસની વિશેષ પૂજા-અર્ચના બાદ 25 સપ્ટેમ્બર 2026, શુક્રવારના રોજ શ્રદ્ધાપૂર્વક બાપ્પાની મૂર્તિનું વિસર્જન કરવામાં આવશે.