Dashama Murti Visarjan Muhurat 2026: ગુજરાતભરમાં મહિલાઓ દ્વારા અત્યંત આસ્થા અને શ્રદ્ધાપૂર્વક કરવામાં આવતા 10 દિવસીય દશામાના વ્રતની આજે પૂર્ણાહુતિ થવા જઈ રહી છે. ગુજરાતી પંચાંગ અનુસાર, અષાઢ વદ અમાસના પવિત્ર દિવસે શરૂ થયેલા આ વ્રતમાં ભક્તો નિત્ય પૂજા-અર્ચના, આરતી, થાળ અને ગરબા દ્વારા માતાજીની વિશેષ આરાધના કરે છે. વ્રત પૂર્ણ થવાના આરે છે, ત્યારે ભક્તોમાં ઉજવણું, ઉત્થાપન, રાત્રિ જાગરણ અને મૂર્તિ વિસર્જનના શાસ્ત્રોક્ત સમય અને વિધિ જાણવા માટે ભારે ઉત્સુકતા જોવા મળી રહી છે. આ લેખમાં જાણો વર્ષ 2026 માટે દશામા વ્રતના જાગરણ, મૂર્તિ વિસર્જનના શુભ મુહૂર્ત અને ઉત્થાપન અંગેની સંપૂર્ણ વિગતો.
દશામા વ્રત રાત્રિ જાગરણ અને મૂર્તિ વિસર્જન મુહૂર્ત 2026
આ પણ વાંચો
આ વર્ષે દશામા વ્રતની પૂર્ણાહુતિ આજે 21 ઓગસ્ટ 2026, શુક્રવારના દિવસે થશે. વ્રતના અંતિમ દિવસે રાત્રિ જાગરણ કરવામાં આવશે. ત્યારબાદ બીજા દિવસે વહેલી સવારે એટલે કે 22 ઓગસ્ટ 2026 (શનિવાર) ના રોજ સૂર્યોદય (06:18 AM) પૂર્વે પવિત્ર જળમાં મા દશામાની મૂર્તિનું વિસર્જન કરવામાં આવશે.
વિસર્જન માટે 22 ઓગસ્ટ 2026 નું શુભ મુહૂર્ત
- બ્રહ્મ મુહૂર્ત: સવારે 04:49 થી 05:34 સુધી
- પ્રાતઃ સંધ્યા: સવારે 05:11 થી 06:18 સુધી
રાત્રિ જાગરણનું મહત્વ: 21 ઓગસ્ટની સાંજે નિયમાનુસાર માતાજીની મહાઆરતી, થાળ અને ગરબાનું આયોજન કરવામાં આવે છે. આખી રાત દરમિયાન શ્રદ્ધાળુઓ દશામાના નામ-સ્મરણ, જાપ અને ભજન-કીર્તનમાં લીન રહીને જાગરણ કરે છે.
દશામા મૂર્તિ વિસર્જનની શાસ્ત્રોક્ત વિધિ
22 ઓગસ્ટ 2026 (શનિવાર) ના રોજ સૂર્યોદય પૂર્વે મૂર્તિ વિસર્જન વખતે નીચે મુજબની બાબતોનું ધ્યાન રાખવું હિતાવહ છે:
- વિસર્જન માટે પ્રસ્થાન કરતાં પહેલાં ઘરે માતાજીની અંતિમ આરતી કરી થાળ ધરાવવો.
- 10 દિવસની પૂજા દરમિયાન જાણે-અજાણે થયેલી કોઈપણ ભૂલ માટે માતાજી સમક્ષ બે હાથ જોડી ક્ષમા માંગવી.
- નજીકના પવિત્ર જળાશય કે નદીમાં મૂર્તિ અને સાંઢણીનું ભાવપૂર્વક વિસર્જન કરવું.
- માતાજી હંમેશા ઘરમાં સુખ-સમૃદ્ધિ જાળવી રાખે અને આગામી વર્ષે ફરી પધારે તેવી પ્રાર્થના કરવી.
દશામા વ્રતનું ઉજવણું (ઉત્થાપન) કેવી રીતે કરવું?
જે ભક્તોએ 5 વર્ષ કે 10 વર્ષ માટે દશામાનું વ્રત લીધું હોય અને આ વર્ષે તેનું ઉજવણું કરવા માંગતા હોય, તેમણે 21 ઓગસ્ટ 2026 ના રોજ નીચે મુજબ વિધિ કરવી જોઈએ:
- સવારે સ્નાન-ધ્યાનથી નિવૃત્ત થઈને નિત્ય નિયમ મુજબ માતાજીની પૂજા, આરતી, થાળ કરી વ્રતકથાનું શ્રવણ કરવું.
- દશામાનું વ્રત પૂર્ણ કરનારી સ્ત્રીઓ (ગોયણીઓ) ને આદરપૂર્વક ભોજન માટે આમંત્રિત કરવી.
- શ્રદ્ધાળુઓ પોતાની યથાશક્તિ ભોજન તૈયાર કરી શકે છે, પરંતુ તેમાં ઓછામાં ઓછું 1 મીઠાઈ અવશ્ય સામેલ કરવું.
- ભોજન બાદ દરેક ગોયણીને 'દશામા વ્રતની ચોપડી' ભેટમાં આપવી, જેથી માતાજીના વ્રતનો મહિમા વધુ પ્રસરે.
ગોયણી ન મળે તો કયા વૈકલ્પિક ઉપાયો કરવા?
જો ઉજવણાના દિવસે ગોયણીઓ ઉપલબ્ધ ન થઈ શકે, તો શાસ્ત્રોક્ત નિયમો અનુસાર નીચે મુજબના વૈકલ્પિક ઉપાયો કરી શકાય છે:
- યથાશક્તિ ચાંદીની સાંઢણી (ઊંટડી) બનાવીને તેને પવિત્ર જળમાં પધરાવી શકાય અથવા કોઈ વિદ્વાન બ્રાહ્મણને દાનમાં આપી શકાય.
- જો ચાંદીની સાંઢણી શક્ય ન હોય તો માટી અથવા અન્ય ધાતુની સાંઢણી બનાવીને તેનું દાન કરવું.
- બ્રાહ્મણોને ભોજન કરાવી વસ્ત્રદાન કરવું અથવા જરૂરિયાતમંદ બાળકોને ભોજન કરાવીને પુણ્ય મેળવી શકાય છે.