FSSAI Egg Test: સોશિયલ મીડિયા પર સમયાંતરે પ્લાસ્ટિકના ઈંડા હોવાના વીડિયો વાયરલ થતા રહે છે. આવા વીડિયો જોઈને લોકોમાં બજારમાં મળતા ઈંડાની ગુણવત્તા અને તેની અસલિયતને લઈને શંકા ઊભી થાય છે. ખાસ કરીને ઈંડું તોડ્યા પછી જરદી અને સફેદ ભાગ એકબીજા સાથે ભળી જાય અથવા ઈંડું પાણીમાં તરવા લાગે તો તેને નકલી માનવાની વાતો પણ જોવા મળે છે. પરંતુ આ બંને બાબતોને સમજવા માટે ઈંડાની તાજગી અને નકલી હોવા વચ્ચેનો તફાવત જાણવો જરૂરી છે.
પાણીમાં ઈંડું નાખીને જાણો કેટલું તાજું છે
ઈંડાની તાજગી ચકાસવા માટે ઘરે જ સરળ વોટર ટેસ્ટ કરી શકાય છે. આ માટે એક ગ્લાસ, વાટકી કે ઊંડા વાસણમાં પૂરતું પાણી ભરો અને તેમાં ઈંડું ધીમેથી નાખો.
જો ઈંડું પાણીમાં નીચે જઈને આડું પડેલું રહે, તો તે સામાન્ય રીતે તાજું હોવાનું સૂચવે છે. જો ઈંડું તળિયે રહે પરંતુ એક છેડે ઊભું અથવા ઢળેલું દેખાય, તો તે થોડું જૂનું હોઈ શકે છે. જ્યારે ખૂબ જૂનું ઈંડું પાણીમાં ઉપર તરફ તરવા લાગે, ત્યારે તેની અંદર હવાની જગ્યા વધી ગઈ હોવાનું માનવામાં આવે છે.
| ઈંડાની સ્થિતિ | શું સંકેત મળે? |
|---|---|
| પાણીમાં નીચે જઈને આડું પડે | તાજું ઈંડું |
| તળિયે રહીને ઊભું/ઢળેલું રહે | થોડું જૂનું |
| પાણીમાં ઉપર તરે | વધુ જૂનું |
ઈંડું પાણીમાં કેમ તરવા લાગે છે?
ઈંડાની છાલ સંપૂર્ણપણે બંધ નથી હોતી. તેમાં ખૂબ જ નાના છિદ્રો હોય છે. સમય પસાર થવા સાથે ઈંડાની અંદરની ભેજ ધીમે ધીમે બહાર નીકળે છે અને તેની જગ્યાએ હવા ભરાતી જાય છે. પરિણામે ઈંડાની અંદર હવાનું પ્રમાણ વધે છે અને તે પાણીમાં ઉપર તરફ આવવા લાગે છે.
જરદી અને સફેદ ભાગ ભળી જાય તો શું ઈંડું પ્લાસ્ટિકનું છે?
આ વાત સોશિયલ મીડિયા પર સૌથી વધુ ફેલાતી ગેરસમજોમાંની એક છે. જૂના ઈંડામાં અંદરની રચના અને સફેદ ભાગની મજબૂતી સમય સાથે ઘટી શકે છે. તેના કારણે ઈંડું તોડતી વખતે જરદી અને સફેદ ભાગ વધુ સરળતાથી ફેલાઈ કે ભળી શકે છે. માત્ર આ કારણથી ઈંડું પ્લાસ્ટિકનું છે એવું સાબિત થતું નથી.
તેથી સોશિયલ મીડિયા પર પ્લાસ્ટિકના ઈંડાના નામે કોઈ વીડિયો વાયરલ થાય તો તરત વિશ્વાસ કરવાને બદલે ઈંડાની તાજગી માટે આ સરળ પાણીનો ટેસ્ટ કરી શકાય છે. સાથે જ ઈંડાની ગંધ, દેખાવ અને યોગ્ય રીતે સંગ્રહ કરવામાં આવ્યો છે કે નહીં તે પણ ધ્યાનમાં રાખવું જરૂરી છે.