FASTag Portability News: દેશમાં રાષ્ટ્રીય ધોરીમાર્ગો (National Highways) પર મુસાફરી કરતા વાહનચાલકો માટે એક અત્યંત મહત્વના સમાચાર સામે આવ્યા છે. હવે વાહન માલિકો તેમના FASTag ને કોઈ પણ ઝંઝટ વગર એક બેંકમાંથી બીજી બેંકમાં સરળતાથી ટ્રાન્સફર કરી શકશે. આ સુવિધા સામાન્ય મોબાઈલ નંબર પોર્ટેબિલિટી (MNP) જેવી જ સરળ હશે. નેશનલ હાઈવે ઓથોરિટી ઓફ ઈન્ડિયા (NHAI) એ શુક્રવારે આ સંદર્ભે 'વન ટેગ' (One Tag) ફ્રેમવર્ક સત્તાવાર રીતે લોન્ચ કર્યું છે.
નવું ટેગ ખરીદ્યા વગર બદલી શકાશે બેંક
નવા 'વન ટેગ' ફ્રેમવર્ક હેઠળ, જો કોઈ વાહનચાલક પોતાની વર્તમાન FASTag જારી કરનાર બેંકની સેવાઓથી અસંતુષ્ટ હોય, તો તેમણે નવું ટેગ ખરીદવાની કે વિન્ડસ્ક્રીન પરથી જૂનું ટેગ હટાવવાની કે બદલવાની જરૂર નહીં રહે. ગ્રાહકો સીધા જ પોતાની પસંદગીની અન્ય સહભાગી બેંકમાં સ્વિચ કરી શકશે. આ પ્રોગ્રામમાં સ્ટેટ બેંક ઓફ ઈન્ડિયા (SBI), ICICI બેંક અને એરટેલ પેમેન્ટ્સ બેંક સહિત દેશની લગભગ એક ડઝન જેટલી અગ્રણી બેંકો જોડાઈ ચૂકી છે.
સ્થાનિક રહેવાસીઓ માટે 1,500 નો વાર્ષિક પાસ
સરકાર દ્વારા સ્થાનિક વાહનચાલકોને વધુ રાહત આપવા માટે એક નવી યોજના પર કામ કરવામાં આવી રહ્યું છે. ટોલ પ્લાઝાની 20 કિલોમીટરની ત્રિજ્યામાં રહેતા સ્થાનિક રહેવાસીઓ માટે ટૂંક સમયમાં જ વાર્ષિક સ્થાનિક પાસ રજૂ કરવામાં આવશે. આ પાસનો અંદાજિત ખર્ચ આશરે 1,500 જેટલો રહેશે. હાલમાં સ્થાનિક પાસ માસિક ધોરણે જારી કરવામાં આવે છે, જ્યારે વાર્ષિક FASTag પાસ સમગ્ર રાષ્ટ્રીય ધોરીમાર્ગ નેટવર્ક પર મુસાફરી કરવા માટે માન્ય ગણાય છે.
'હાઈવે યાત્રા' એપ દ્વારા થશે પોર્ટેબિલિટી
કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરીએ જણાવ્યું હતું કે વાહનચાલકો 'હાઈવે યાત્રા' (Highway Yatra) એપ્લિકેશનના માધ્યમથી અત્યંત સરળતાથી પોતાના FASTag નું પોર્ટેબિલિટી કરી શકશે. તેમણે વધુમાં ઉમેર્યું હતું કે આજે રાષ્ટ્રીય ધોરીમાર્ગ નેટવર્ક પર ૯૮ ટકાથી વધુ ટોલ વસૂલાત FASTag ની ડિજિટલ સિસ્ટમ દ્વારા ડિજિટલ માધ્યમથી સફળતાપૂર્વક કરવામાં આવી રહી છે.