Surti Aloo Puri Recipe: સુરતનું સ્ટ્રીટ ફૂડ માત્ર લોચો અને સેવ ખમણી પૂરતું નથી. અહીંની આલૂ પુરી પણ ખૂબ લોકપ્રિય છે. સામાન્ય પુરી-શાકથી અલગ, સુરતી આલૂ પુરીમાં નાની ક્રિસ્પી મેંદાની પુરી ઉપર મસાલેદાર વટાણાનો રગડો, બટાકા, ચટણી, ડુંગળી અને સેવ ઉમેરવામાં આવે છે. ખાસ કરીને કોકમની ખાટી-મીઠી ચટણી તેનો સ્વાદ વધારે ખાસ બનાવે છે.
સુરતી આલૂ પુરી માટેની સામગ્રી
રગડા માટે
- સફેદ કે લીલા સૂકા વટાણા – 1 કપ
- બટાકા – 2
- ડુંગળી – 1
- ટામેટા – 2
- આદુ-મરચાંની પેસ્ટ – 1 ચમચી
- લસણની પેસ્ટ – ½ ચમચી
- હળદર – ½ ચમચી
- લાલ મરચું – 1 ચમચી
- ધાણાજીરું – ½ ચમચી
- ગરમ મસાલો – ½ ચમચી
- મીઠું – સ્વાદ અનુસાર
- લીંબુનો રસ – ½ ચમચી
- તેલ – 2 ચમચી
પૂરી માટે
- મેંદો – 2 કપ
- મીઠું – સ્વાદ અનુસાર
- મોણ માટે તેલ – 2 ચમચી
- પાણી – જરૂર મુજબ
- તળવા માટે તેલ
ચટણી અને સર્વિંગ માટે
- કોકમ – ½ કપ
- ગોળ – જરૂર મુજબ
- જીરું – 1 ચમચી
- લાલ મરચું – ½ ચમચી
- લીલી ચટણી – જરૂર મુજબ
- ઝીણી સમારેલી ડુંગળી
- સેવ
- કોથમીર
આલૂ પુરી બનાવવાની રીત
સૌપ્રથમ સૂકા વટાણાને 7થી 8 કલાક પાણીમાં પલાળી રાખો. ત્યારબાદ તેને બટાકા સાથે કુકરમાં બાફી લો. હવે એક પેનમાં તેલ ગરમ કરી તેમાં આદુ-મરચાં અને લસણની પેસ્ટ સાંતળો. તેમાં ડુંગળી અને ટામેટા ઉમેરીને નરમ થાય ત્યાં સુધી પકાવો.
હવે હળદર, લાલ મરચું, ધાણાજીરું, ગરમ મસાલો અને મીઠું ઉમેરો. તેમાં બાફેલા વટાણા અને બટાકા નાખી થોડું પાણી ઉમેરીને રગડાને સારી રીતે ઉકળવા દો. રગડો બહુ પાતળો નહીં, થોડો ઘટ્ટ રાખવો. છેલ્લે લીંબુનો રસ ઉમેરો.
હવે મેંદામાં મીઠું અને તેલનું મોણ નાખીને કઠણ લોટ બાંધો. થોડો સમય ઢાંકીને રાખ્યા બાદ તેની નાની લૂઈ બનાવી પાતળી પુરી વણી લો. પુરીને તેલમાં તળી લો. આ પુરીને સામાન્ય ભાતીગળ પુરીની જેમ ફુલાવવાની નથી; સુરતી આલૂ પુરી માટે તે પાતળી અને ક્રિસ્પી રાખવામાં આવે છે.
કોકમને પલાળી તેનું પાણી કાઢી તેમાં ગોળ, જીરું, લાલ મરચું અને મીઠું ઉમેરીને ચટણી તૈયાર કરો.
હવે પ્લેટમાં ગરમ ક્રિસ્પી પુરી ગોઠવો. તેના ઉપર ગરમ રગડો નાખો. પછી લીલી ચટણી અને કોકમ-ગોળની ચટણી ઉમેરો. ઉપરથી ઝીણી ડુંગળી, ભરપૂર સેવ અને કોથમીર નાખો. બસ તૈયાર છે સુરતની ફેમસ સુરતી આલૂ પુરી.