Sweet Thepla Recipe: ગુજરાતમાં શીતળા સાતમના તહેવાર સાથે રાંધણછઠની પરંપરા જોડાયેલી છે. રાંધણછઠના દિવસે મહિલાઓ સાતમના દિવસે ખાવા માટે વિવિધ વાનગીઓ બનાવીને રાખે છે. તેમાં ગળ્યા થેપલા પણ એક એવી પરંપરાગત વાનગી છે, જે બીજા દિવસે ઠંડી ખાવામાં પણ સ્વાદિષ્ટ લાગે છે. જો તમે પણ શીતળા સાતમ માટે ઘરે ગળ્યા થેપલા બનાવવા માંગતા હો, તો આ સરળ રેસીપીથી નરમ, મીઠા અને સ્વાદિષ્ટ ગળ્યા થેપલા બનાવી શકો છો.
ગળ્યા થેપલા માટેની સામગ્રી
- ઘઉંનો લોટ – 2 કપ
- ગોળ – 1 કપ
- દૂધ – જરૂર મુજબ
- ઘી – 3-4 ચમચી
- એલચી પાવડર – ½ ચમચી
- વરિયાળી – 1 ચમચી
- તલ – 1 ચમચી
- મીઠું – એક ચપટી
- તેલ અથવા ઘી – થેપલા શેકવા માટે
ગળ્યા થેપલા બનાવવાની રીત
સૌ પ્રથમ એક વાસણમાં ગોળ લો અને તેમાં થોડું દૂધ ઉમેરીને ગોળ સારી રીતે ઓગાળી લો. ત્યારબાદ તેમાં ઘઉંનો લોટ, એલચી પાવડર, વરિયાળી, તલ અને એક ચપટી મીઠું ઉમેરો.
હવે આ મિશ્રણમાં થોડું-થોડું દૂધ ઉમેરીને નરમ લોટ બાંધો. લોટ બહુ કઠણ કે બહુ ઢીલો ન રાખવો. તેમાં 1-2 ચમચી ઘી ઉમેરીને લોટને સારી રીતે મસળી લો.
લોટ તૈયાર થઈ જાય પછી તેને 10-15 મિનિટ માટે ઢાંકીને રાખો. ત્યારબાદ લોટના સરખા ભાગના લૂઆ બનાવી લો.
હવે એક લૂઓ લઈને થોડો લોટ લગાવીને તેને ગોળ થેપલા જેવો વણી લો. તવો ગરમ કરી તેના પર થેપલો મૂકો અને બંને બાજુથી ધીમા-મધ્યમ તાપે શેકો. થેપલો શેકતી વખતે ઉપર થોડું ઘી અથવા તેલ લગાવો.
થેપલો બંને બાજુથી સરસ રીતે શેકાઈ જાય અને હળવો સોનેરી રંગ આવે એટલે તેને તવામાંથી ઉતારી લો. આ રીતે બધા ગળ્યા થેપલા તૈયાર કરી લો.
ઉપયોગી ટિપ્સ
- થેપલા નરમ બનાવવા માટે લોટમાં થોડું ઘી જરૂર ઉમેરો.
- ગોળમાં દૂધ ઉમેરતી વખતે ગોળ સંપૂર્ણપણે ઓગળી જાય તેનું ધ્યાન રાખો.
- થેપલા ધીમા-મધ્યમ તાપે શેકવાથી તે અંદરથી પણ સારી રીતે પાકે છે.
- સાતમ માટે બનાવવાના હોવાથી થેપલા સંપૂર્ણ ઠંડા થયા બાદ જ સ્ટોર કરો.
- ગળ્યા થેપલાનો સ્વાદ વધારવા માટે તેમાં એલચી અને વરિયાળીનો ઉપયોગ કરી શકો છો.