Malai Penda Recipe: નવરાત્રીના ત્રીજા દિવસે માતા ચંદ્રઘંટાની પૂજા કરવામાં આવે છે. ધાર્મિક માન્યતા અનુસાર, માતા ચંદ્રઘંટાને દૂધ અને દૂધમાંથી બનેલી મીઠાઈઓનો ભોગ ધરાવવો શુભ માનવામાં આવે છે. જો તમે પણ માતાજીના ભોગ માટે કંઈક ખાસ બનાવવાનું વિચારી રહ્યા છો, તો ઘરે જ મલાઈ પેંડા બનાવી શકો છો. દૂધ, પનીર, એલચી અને કેસરથી બનતા આ પેંડા સ્વાદમાં ખૂબ જ સરસ લાગે છે. તો ચાલો જાણીએ મલાઈ પેંડા બનાવવાની સરળ રીત.
મલાઈ પેંડા બનાવવા માટેની સામગ્રી
- ફુલ ક્રીમ દૂધ – 4થી 5 કપ
- ગરમ દૂધ – 2 નાની ચમચી
- આરારોટ પાઉડર – 1 મોટી ચમચી
- મિલ્ક પાઉડર – ¾ કપ
- છીણેલું પનીર – 200 ગ્રામ
- ખાંડ – ½ કપ
- એલચી પાઉડર – ¼ નાની ચમચી
- ઘી – 1 મોટી ચમચી
- સમારેલા પિસ્તા – 1 મોટી ચમચી
- સમારેલી બદામ – 1 મોટી ચમચી
- કેસર – થોડા તાંતણા
મલાઈ પેંડા બનાવવાની રીત
સૌપ્રથમ એક ઊંડા નોન-સ્ટિક પેનમાં ફુલ ક્રીમ દૂધ લો અને તેને મધ્યમથી તેજ આંચ પર 4થી 5 મિનિટ સુધી ઉકાળો. ત્યારબાદ ગેસની આંચ મધ્યમ રાખીને દૂધને ધીમે ધીમે ઘટવા દો. દૂધ ઉકળે ત્યારે વચ્ચે વચ્ચે ચમચાથી હલાવતા રહો અને પેનની કિનારીઓ પર જામી ગયેલી મલાઈને દૂધમાં ભેળવતા રહો. દૂધ લગભગ અડધું થઈ જાય ત્યાં સુધી આ પ્રક્રિયા ચાલુ રાખો.
હવે એક નાની વાટકીમાં ગરમ દૂધ લો અને તેમાં કેસરના થોડા તાંતણા નાખીને બાજુ પર રાખો. દૂધ ઘટી જાય ત્યારબાદ તેમાં ખાંડ અને કેસરવાળું દૂધ ઉમેરો. આ મિશ્રણને વધુ 5 મિનિટ સુધી ઉકાળો. ખાંડ સારી રીતે ઓગળી જાય અને દૂધમાં કેસરનો રંગ ભળી જાય ત્યાં સુધી વચ્ચે વચ્ચે હલાવતા રહો.
બીજી તરફ, એક નાની વાટકીમાં થોડું દૂધ લઈને તેમાં આરારોટ પાઉડર ઉમેરો. ગઠ્ઠા ન રહે ત્યાં સુધી તેને સારી રીતે મિક્સ કરો. હવે આ મિશ્રણને ઉકળતા દૂધમાં ઉમેરો. તેની સાથે છીણેલું પનીર પણ નાખીને બધી સામગ્રીને સારી રીતે હલાવો. મિશ્રણને ધીમીથી મધ્યમ આંચ પર પકવતા રહો, જેથી તે તળિયે ચોંટે નહીં.
જ્યારે દૂધનું મિશ્રણ ઘટ્ટ થઈને માવા જેવું દેખાવા લાગે અને પેનની કિનારીઓ છોડવા લાગે, ત્યારે ગેસ બંધ કરી દો. હવે તેમાં એલચી પાઉડર ઉમેરીને બરાબર મિક્સ કરો. તૈયાર મિશ્રણને એક થાળીમાં કાઢીને થોડું ઠંડું થવા દો, જેથી તેમાંથી પેંડા બનાવી શકાય.
મિશ્રણ સહેજ ઠંડું થાય એટલે હાથમાં થોડું ઘી લગાવો. હવે તેમાંથી સરખા ભાગના નાના ગોળા બનાવો અને હથેળીથી હળવા હાથે દબાવીને પેંડાનો આકાર આપો. દરેક પેંડા પર સમારેલા પિસ્તા અને બદામ લગાવીને સજાવો.
આ રીતે તૈયાર થઈ જશે સ્વાદિષ્ટ અને મલાઈદાર પેંડા. તેને માતા ચંદ્રઘંટાને ભોગ ધરાવવા માટે ઉપયોગમાં લઈ શકો છો અને ત્યારબાદ પ્રસાદ તરીકે પરિવારના સભ્યોને વહેંચી શકો છો.