Navratri Special Dudhi Halwa Recipe: નવરાત્રી દરમિયાન માતાજીને ભોગ ધરાવવા માટે ઘરે બનાવેલી મીઠાઈનું ખાસ મહત્વ હોય છે. જો તમે આ નવરાત્રીમાં કંઈક સરળ, સ્વાદિષ્ટ અને પરંપરાગત મીઠાઈ બનાવવા માંગતા હોવ તો દૂધીનો હલવો બેસ્ટ વિકલ્પ છે. દૂધી, દૂધ, માવો અને ડ્રાયફ્રૂટ્સથી તૈયાર થતો આ હલવો સ્વાદમાં રિચ લાગે છે અને ગરમાગરમ પીરસવામાં આવે તો ખૂબ જ સ્વાદિષ્ટ લાગે છે. ચાલો જાણીએ ઘરે સરળતાથી દૂધીનો હલવો બનાવવાની રીત.
દૂધીનો હલવો બનાવવાની સામગ્રી
- દૂધી – 1 કિલો
- દૂધ – 500 મિલી
- માવો – 200 ગ્રામ
- ખાંડ – 150 ગ્રામ
- ઘી – 3-4 ટેબલસ્પૂન
- ઈલાયચી પાવડર – 1/2 ટીસ્પૂન
- કાજુ – 2 ટેબલસ્પૂન
- બદામ – 2 ટેબલસ્પૂન
- પિસ્તા – 1 ટેબલસ્પૂન
દૂધીનો હલવો બનાવવાની રીત
સૌથી પહેલા દૂધીની છાલ ઉતારીને તેને સારી રીતે ધોઈ લો. ત્યારબાદ દૂધીને છીણી લો. દૂધીમાં રહેલું વધારે પાણી હોય તો તેને હળવા હાથે નિચોવી લો, જેથી હલવો બનાવવામાં વધારે સમય ન લાગે.
હવે એક જાડા તળિયાવાળી કડાઈમાં ઘી ગરમ કરો અને તેમાં છીણેલી દૂધી ઉમેરીને મધ્યમ આંચ પર સાંતળો. દૂધીનું કાચાપણું દૂર થાય અને તેનો રંગ થોડો બદલાય ત્યાં સુધી તેને સારી રીતે પકાવો.
દૂધી સારી રીતે સાંતળાઈ જાય પછી તેમાં દૂધ ઉમેરો. હવે તેને મધ્યમ આંચ પર પકવા દો અને વચ્ચે-વચ્ચે હલાવતા રહો. દૂધી અને દૂધનું મિશ્રણ ઘટ્ટ થવા લાગે ત્યાં સુધી તેને રાંધવું જરૂરી છે.
જ્યારે દૂધીનું મિશ્રણ ઘટ્ટ થઈ જાય ત્યારે તેમાં ખાંડ ઉમેરો. ખાંડ ઉમેર્યા પછી હલવો થોડો ઢીલો થશે, તેથી ફરીથી તેને સારી રીતે પકાવો. ત્યારબાદ તેમાં માવો ઉમેરીને સતત હલાવતા રહો, જેથી માવો કડાઈના તળિયે ચોંટે નહીં.
હવે તેમાં ઈલાયચી પાવડર, સમારેલા કાજુ, બદામ અને પિસ્તા ઉમેરો. હલવો ઘી છોડવા લાગે અને કડાઈમાંથી સરળતાથી છૂટવા લાગે ત્યારે ગેસ બંધ કરી દો.
ગરમાગરમ દૂધીનો હલવો એક બાઉલમાં કાઢીને ઉપરથી થોડા ડ્રાયફ્રૂટ્સથી ગાર્નિશ કરો. નવરાત્રી દરમિયાન તેને માતાજીને ભોગ તરીકે પણ ધરાવી શકાય છે.
ટિપ્સ
દૂધી હલવો બનાવવા માટે નરમ અને તાજી દૂધી પસંદ કરવી. દૂધી છીણ્યા પછી તેનો વધારે પાણીનો ભાગ કાઢી લેવાથી હલવો ઝડપથી તૈયાર થાય છે. માવો ઉમેરવાથી હલવો વધુ રિચ અને ક્રીમી બને છે.