Tawa Pulao Recipe: ઘરે ભાત વધ્યા હોય તો તેને ફરીથી સાદો ગરમ કરીને ખાવાની જરૂર નથી. તમે આ જ ભાતમાંથી ખૂબ જ ટેસ્ટી અને ચટપટા મુંબઈ સ્ટાઈલ તવા પુલાવ બનાવી શકો છો. તેમાં શાકભાજી, પાવભાજી મસાલો અને થોડું બટર ઉમેરવાથી પુલાવમાં સ્ટ્રીટ ફૂડ જેવો સ્વાદ આવે છે. ખાસ વાત એ છે કે આ રેસીપી ઝડપથી તૈયાર થઈ જાય છે અને નાસ્તા કે લંચ માટે પણ સરસ વિકલ્પ છે.
તવા પુલાવ બનાવવાની સામગ્રી
- બાફેલા ભાત – 2 કપ
- બટર – 2 ટેબલસ્પૂન
- ડુંગળી – 1 સમારેલી
- ટામેટું – 1 સમારેલું
- કેપ્સિકમ – 1 નાનું સમારેલું
- લીલા વટાણા – ½ કપ
- ગાજર – ½ કપ સમારેલું
- આદુ-લસણની પેસ્ટ – 1 ચમચી
- પાવભાજી મસાલો – 1½ ચમચી
- લાલ મરચું પાઉડર – ½ ચમચી
- હળદર – ¼ ચમચી
- મીઠું – સ્વાદ મુજબ
- લીંબુનો રસ – 1 ચમચી
- કોથમીર – બારીક સમારેલી
તવા પુલાવ બનાવવાની રીત
સૌ પ્રથમ તવો ગરમ કરી તેમાં બટર નાખો. તેમાં સમારેલી ડુંગળી અને આદુ-લસણની પેસ્ટ ઉમેરીને ડુંગળી થોડી નરમ થાય ત્યાં સુધી સાંતળો. હવે તેમાં ટામેટું, કેપ્સિકમ, ગાજર અને લીલા વટાણા ઉમેરો. શાકભાજી થોડા ક્રન્ચી રહે એ રીતે મધ્યમ આંચ પર સાંતળો.
ત્યારબાદ હળદર, લાલ મરચું પાઉડર અને પાવભાજી મસાલો ઉમેરીને બરાબર મિક્સ કરો. મસાલો તવામાં સારી રીતે શેકાય એટલે તેમાં બાફેલા ભાત ઉમેરો. ભાતને મસાલા અને શાકભાજી સાથે હળવા હાથે મિક્સ કરો, જેથી ચોખા તૂટે નહીં. જરૂર લાગે તો થોડું મીઠું ઉમેરો અને 2-3 મિનિટ તવા પર શેકાવા દો.
છેલ્લે લીંબુનો રસ અને સમારેલી કોથમીર ઉમેરીને મિક્સ કરો. ઉપરથી થોડું બટર નાખીને ગરમાગરમ Mumbai Style Tawa Pulao સર્વ કરો.
ટિપ્સ
તવા પુલાવનો સ્ટ્રીટ ફૂડ જેવો સ્વાદ મેળવવા માટે પાવભાજી મસાલો અને બટરનું પ્રમાણ યોગ્ય રાખવું મહત્વનું છે. ભાત પહેલેથી ઠંડો હોય તો પુલાવ વધુ સરસ બને છે.