Spicy Rice Khichu Recipe: ગુજરાતીઓના મનપસંદ નાસ્તામાં ખીચાનું નામ આવે ત્યારે મોઢામાં પાણી આવી જાય છે. ગરમાગરમ ખીચા પર તેલ, અથાણાનો મસાલો અને તલનો સ્વાદ મળી જાય તો તેની મજા જ કંઈક અલગ હોય છે. જો તમને પણ બજારમાં મળતું સ્ટ્રીટ સ્ટાઈલ મસાલેદાર ચોખાનું ખીચું ભાવતું હોય, તો હવે તેને ઘરે પણ સરળતાથી બનાવી શકો છો. ચોખાના લોટ અને રોજિંદા રસોડામાં મળતી સામગ્રીથી માત્ર 10 મિનિટમાં આ ટેસ્ટી નાસ્તો તૈયાર થઈ જશે.
સામગ્રી (Ingredients)
- ચોખાનો લોટ – 1 કપ
- પાણી – 2 કપ
- લીલાં મરચાંની પેસ્ટ – 1 નાની ચમચી
- જીરું – ½ ચમચી
- અજમો – ¼ ચમચી
- આદુની પેસ્ટ – ½ ચમચી
- મીઠું – સ્વાદ મુજબ
- તેલ – 1 મોટી ચમચી
- હિંગ – 1 ચપટી
- લીલાં ધાણા – બારીક સમારેલાં
- લાલ મરચું પાઉડર – સ્વાદ મુજબ
- અથાણાનો મસાલો – 1 ચમચી
- તલ – 1 ચમચી
બનાવવાની રીત (Spicy Rice Khichu Recipe)
સૌપ્રથમ એક કડાઈમાં પાણી લો અને તેમાં મીઠું, જીરું, અજમો, હિંગ, આદુની પેસ્ટ અને લીલાં મરચાંની પેસ્ટ ઉમેરો. હવે પાણીને ઉકળવા દો, જેથી બધા મસાલાનો સ્વાદ પાણીમાં સારી રીતે ભળી જાય.
પાણી ઉકળવા લાગે એટલે ગેસ ધીમો કરો અને તેમાં ચોખાનો લોટ ધીમે ધીમે ઉમેરતા જાઓ. સાથે સતત હલાવતા રહો, જેથી લોટમાં ગઠ્ઠા ન પડે. હવે મિશ્રણને બરાબર મિક્સ કરીને ઢાંકણ ઢાંકી 3થી 4 મિનિટ સુધી ધીમા તાપે ચડવા દો.
થોડીવાર પછી ઢાંકણ ખોલીને ખીચાને ફરીથી હલાવો. ખીચું નરમ, મુલાયમ અને એકસમાન થઈ જાય એટલે ગેસ બંધ કરી દો. હવે તેને ગરમાગરમ સર્વિંગ પ્લેટમાં કાઢો.
સ્ટ્રીટ સ્ટાઈલ સ્વાદ માટે ઉપરથી ગરમ તેલમાં તલ અને લાલ મરચું પાઉડર મિક્સ કરીને ઉમેરો. ત્યારબાદ અથાણાનો મસાલો અને લીલાં ધાણા છાંટો. તૈયાર છે તમારું ચટાકેદાર ચોખાનું ખીચું, જેને ગરમાગરમ ખાવાની મજા જ અલગ છે.
ખીચાને વધુ સ્વાદિષ્ટ બનાવવાની ટિપ્સ
- ખીચું બનાવતી વખતે ચોખાનો લોટ ઉમેર્યા પછી સતત હલાવતા રહો, જેથી ગઠ્ઠા ન પડે.
- સ્ટ્રીટ સ્ટાઈલ સ્વાદ માટે ઉપરથી અથાણાનો મસાલો અને તલવાળું તેલ જરૂર ઉમેરો.
- ખીચું વધુ ઘટ્ટ લાગે તો થોડું ગરમ પાણી ઉમેરીને બરાબર મિક્સ કરી શકો છો.
- ખીચાનો અસલી સ્વાદ માણવા માટે તેને ગરમાગરમ જ પીરસો.